មិនចេះតិកនិកតថ្លៃអស់នេះ ប្រយ័ត្នអ្នកលក់សំលៀកបំពាក់កោរមិនដាក់ទឹក
- 2016-10-27 18:03:52
- ចំនួនមតិ 0 | ចំនួនចែករំលែក 0
មិនចេះតិកនិកតថ្លៃអស់នេះ ប្រយ័ត្នអ្នកលក់សំលៀកបំពាក់កោរមិនដាក់ទឹក
ចន្លោះមិនឃើញ
ពេលដើរផ្សារទិញសំលៀកបំពាក់ម្ដងៗ ក្រៅពីត្រៀមលុយហើយនោះ គឺត្រូវត្រៀមមាត់សម្រាប់តថ្លៃអ្នកលក់ទៀត បើមិនអីចឹងទេអាចត្រូវអ្នកលក់ចំណេញ១គុណនឹង២។ ឥឡូវនេះសាកល្បងដកស្រង់បទពិសោធន៍ពីកំពូលអ្នកតថ្លៃវិញម្ដងមើល ធ្វើយ៉ាងណាទើបទិញហើយមិនស្ដាយក្រោយ។
១. កុំខ្លាច និងកុំអោយអ្នកលក់ដឹងចិត្ត៖
ធាវី ដែលជានិស្សិតទើបបញ្ចប់ការសិក្សាផ្នែកធនាគារបាននិយាយថា៖ "និយាយពីរឿងអ្នកលក់កោរវិញខ្ញុំមិនដែលទេបង រឿងតថ្លៃនឹងលេខ១ហ្មង"។ ធាវី បន្តទៀតថា៖ " ចាស.. ថ្វីបើយើងស្រឡាញ់ខោអាវនឹងមែន តែយើងកុំអោយអ្នកលក់ដឹងចិត្តយើង បើគាត់ដឹងថាយើងស្រឡាញ់ខ្លាំងគាត់មិនងាយចុះទេ ហើយរឹតតែកាត់ថ្លៃខ្ពស់" ។ ធាវី បន្ថែមទៀតថា អ្នកលក់អាចកោរបានមកពីអ្នកទិញខ្លួនឯងដែលសម្ដែងអោយឃើញថាចង់បានខោអាវនឹងខ្លាំងពេក ដែលធ្វើអោយអ្នកលក់ដឹងចិត្ត។ ២. វិភាគលើគុណភាពទំនិញ និងតម្លៃ៖ សុជាតា ដែលជានិស្សិតឆ្នាំទី៣ ជំនាញ International Business ក៏ជាអ្នកដែលចូលចិត្តដើរផ្សារម្នាក់ផងដែរនិយាយថា៖ " ចាសបង... ដូចអាវមួយចឹង បើគេកាត់ 20$ ចឹងញ៉ុមតនៅតែ 7$ ឬ 8$ បើ 15$ តនៅសល់ 5$ អីនឹង"។
ជាតា លើកឡើងថា៖ "ជាទូទៅអ្នកលក់អាចកាត់ថ្លៃមួយជាបី បើមិនតទេប្រាកដជាចំណេញកប់ក្ដោងមិនខាន"។ ជាតាបានបន្តទៀតថា៖ "មុននឹងយើងអោយតម្លៃប៉ុននេះ ប៉ុននោះ គឺត្រូវវិភាគមើលគុណភាពនៃរបស់នោះដែរ ពេលដែលយើងដឹងថារបស់ល្អឬមិនល្អ យើងកំណត់តម្លៃហើយតថ្លៃយកតែម្ដង ជួនកាលរបស់ខ្លះយើងធ្លាប់ដឹងតម្លៃរួចហើយ ចឹងគាត់ក៏មិនអាចកោរយើងបានដែរ"។
៣. ចេះបញ្ចុះបញ្ចូលអ្នកលក់៖ នៅត្រង់ចំណុចនេះ ធាវី និយាយថា៖ "ពេលខ្លះយើងត្រូវចេះលេងពាក្យសម្ដី ទឹកមុខយ៉ាងម៉េចអោយអ្នកលក់ទន់ចិត្តហើយលក់អោយយើងក្នុងតម្លៃទាប"។ ធាវី បានលើកជាឧទាហរណ៍ ពេលនិយាយទៅកាន់អ្នកលក់ថា៖ "ទៅបងលក់អោយប្អូនមួយនឹងទៅណា គ្នាឯងសោះខ្ញុំទិញតែកន្លែងបងទេ ធ្វើមើលតែមិនធ្លាប់ស្គាល់ចឹង ចាំបាច់កាត់ថ្លៃធ្វើអីទេស" ។ ធាវី បន្តទៀតថា ទោះមិនដែលទិញកន្លែងគាត់ក៏ដោយ តែយើងចេះតែថាខ្លះទៅ និយាយចុះនិយាយឡើងអ្នកលក់បាក់ចិត្តស្ដូក។
៤. ដើរចេញ អ្នកស្រី ភារុណ ដែលជាងកាត់ដេរសំលៀកបំពាក់មួយរូប បានចែករំលែកនូវតិកនិករបស់គាត់ថា បើសិនជាអ្នកលក់នោះមិនព្រមលក់គឺដើរចេញតែម្ដង ដោយគាត់បាននិយាយថា៖ "ចា.. អូនហ្នឹងហើយបើគាត់ថាតម្លៃនឹងគាត់លក់មិនបានទេ យើងដើរចេញហ្មងអូន"
អ្នកស្រីបានបន្តថា៖ " អូនឯងទៅខ្លាចអីបើអ្នកលក់ម៉ាគគោក បើគាត់លក់បានគាត់ប្រាកដជាហៅយើងវិញហើយ តែបើគាត់មិនហៅមានន័យថាគ្នាលក់មិនកើតដែរ"។ ស្ត្រីចូលចិត្តដើរផ្សាររូបនេះ បានបន្ថែមទៀតថា៖ "បើទៅសួរកន្លែងផ្សេងទំនិញនោះមានតម្លៃដូចគ្នាយើងអាចបកទៅជួយទិញគាត់វិញទៅ"។
មានធ្លាប់ទិញខោអាវ ត្រូវគេកោរអត់?
អត្ថបទ៖ ថោ ច័ន្ទឬទ្ធិ