OnePlus 3T RAM 6GB តម្លៃថោកជាង iPhone 7 ពាក់កណ្ដាល

2016-11-17 01:56:39
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីប្រកាស One Plus 3 បានរយៈពេល ៥ ខែ ក្រុមហ៊ុនចិន OnePlus បានបញ្ចេញស្មាតហ្វូនថ្មីមួយទៀតម៉ូដែល OnePlus 3T ដែលជាការអាប់ដេតចេញពី OnePlus 3។

ដោយសារតែជាការអាប់ដេតចេញពី OnePlus 3 ហេតុនេះរូបរាងរបស់ OnePlus ជំនាន់ថ្មីនេះមិនខុសគ្នាពី OnePlus ជំនាន់មុនឡើយ ប៉ុន្តែលក្ខណៈសម្បត្តិទូរសព្ទខ្លាំងជាងមុន។ អេក្រង់នៅតែជាប្រភេទ Optic AMOLED ដោយមានទំហំ ៥,៥ អ៊ីញ អាចបង្ហាញរូបភាពកម្រិត 1920x1080។

RAM ទូរសព្ទនៅតែមានទំហំ 6GB ដដែល ប៉ុន្តែបន្ទះ Chip បានអាប់ដេតទៅកាន់ Snapdragon 821 ដែលមានល្បឿនដល់ 2.35GHz។ ចំពោះអង្គផ្ទុកទិន្នន័យមាន ២ ជម្រើស គឺ 64GB និង 128GB។

កាមេរ៉ាខាងក្រោយនៅតែមាន Sensor IMX 298កម្រិត 16MP ដែលផលិតដោយ Sony ប៉ុន្តែក្រុមហ៊ុន OnePlus លើកឡើងថាកាមេរ៉ានេះអាចចាប់យកវីដេអូបានប្រសើរជាងមុន។ ចំណុចប្រែប្រួលខ្លាំងរបស់ OnePlus 3T គឺកាមេរ៉ាខាងមុខដែលបានអាប់ដេតពី 8MP ឡើងដល់ 16MP។

បច្ចុប្បន្ន OnePlus 3T ដំណើរការដោយប្រព័ន្ធប្រតិបត្តិការ Android Marshmallow 6.0 ប៉ុន្តែនឹងអាចអាប់ដេតទៅ Android Nougat 7.0 នៅចុងឆ្នាំនេះ។

OnePlus 3T នឹងមានលក់នៅទីផ្សារសហរដ្ឋអាមេរិក និង អឺរ៉ុប នាថ្ងៃទី ២២ វិច្ឆិកា ខាងមុខដោយសម្រាប់ប្រភេទ 64GB មានតម្លៃ ៤៣៩ ដុល្លារ និង ប្រភេទ 128GB តម្លៃ ៤៧៩ ដុល្លារ៕