បើមិនចង់មានជំងឺមហារីកធ្ងន់ធ្ងរ អ្នកជំងឺត្រូវយកចិត្តទុកដាក់រឿងប្រព័ន្ធរំលាយអាហារ
- 2016-12-12 05:30:21
- ចំនួនមតិ 0 | ចំនួនចែករំលែក 0
បើមិនចង់មានជំងឺមហារីកធ្ងន់ធ្ងរ អ្នកជំងឺត្រូវយកចិត្តទុកដាក់រឿងប្រព័ន្ធរំលាយអាហារ
ចន្លោះមិនឃើញ
លោកវេជ្ជបណ្ឌិត ស៊ី ខេ លាវ (C K Leow) គ្រូពេទ្យឯកទេសជាន់ខ្ពស់ និងវេជ្ជបណ្ឌិតព្យាបាលនិងវះកាត់ជំនាញផ្នែកប្រព័ន្ធរំលាយអាហារបានឲ្យដឹងថា ពលរដ្ឋកម្ពុជាត្រូវយកចិត្តទុកដាក់ពីបញ្ហាប្រព័ន្ធរំលាយអាហារដែលក្នុងនោះរួមមានបំពង់ក ថ្លើម ប្រមាត់ លំពែង ពោះវៀនតូច និងពោះវៀនធំ ដើម្បីចៀសវាងកុំឲ្យមានជំងឺមហារីកធ្ងន់ធ្ងរ ដែលអាចឲ្យបាត់បង់ជីវិតបានភ្លាមៗ។
លោក ស៊ី ខេ លាវ បានប្រាប់អ្នកសារព័ត៌មានកាលពីថ្ងៃអាទិត្យកន្លងទៅនេះថា ធ្លាប់មកប្រទេសកម្ពុជាកាលពីឆ្នាំ ២០០៥ ក្នុងដំណើរទស្សនកិច្ចមនុស្សធម៌ ហើយលោកបានដឹងថា ប្រទេសនេះគឺមានប្រជាជនជាច្រើនមានបញ្ហាប្រព័ន្ធរំលាយអាហារតាំងពីលើរហូតដល់ក្រោម ពោលគឺគិតចាប់ពីកន្លែងដែលអាហារចូល និងកន្លែងដែលកាកសំណល់អាហារចេញ។
នៅឯមន្ទីរពេទ្យក្នុងប្រទេសសិង្ហបុរី លោក លាវ បានពិគ្រោះយោបល់ និងព្យាបាលជំងឺប្រព័ន្ធរំលាយអាហារដល់ជនជាតិកម្ពុជា ម៉ាឡេស៊ី ហ្វីលីពីន ឥណ្ឌូនេស៊ី និងវៀតណាម ហើយនៅទីនោះមានការចំណាយច្រើនដោយលោកលើកឧទាហរណ៍ថា ក្រៅពីថ្លៃពិគ្រោះយោបល់ និងព្យាបាលជំងឺ អ្នកជំងឺនិងអ្នករួមដំណើរត្រូវចំណាយលើសំបុត្រយន្តហោះ សណ្ឋាគារ ការធ្វើដំណើរ និងការហូបចុកអស់រាប់ពាន់ដុល្លារអាមេរិក ក្នុងរយៈពេលតែពីរបីថ្ងៃប៉ុណ្ណោះ។
“ឥឡូវ ដើម្បីសម្រួលដល់ប្រជាជនកម្ពុជា ខ្ញុំបានមកពិគ្រោះយោបល់ និងព្យាបាលផ្នែកប្រព័ន្ធរំលាយអាហារនេះនៅកម្ពុជាជាទៀងទាត់ប្រចាំខែ ដោយសហការជាមួយមន្ទីរពហុព្យាបាលអន្តរជាតិខេមាបឹងកេងកង រាជធានីភ្នំពេញ ព្រោះមន្ទីរពហុព្យាបាលអន្តរជាតិខេមានេះ មានឧបករណ៍ស្តង់ដារគ្រប់គ្រាន់ និងគ្រូពេទ្យមានវិជ្ជាជីវៈ គួរឲ្យទុកចិត្តបាន ដូចនៅប្រទេសរបស់ខ្ញុំដែរ ដែលអាចឲ្យខ្ញុំវះកាត់នៅទីនេះបាន”។ លោក លាវ និយាយ។
លោក លាវ បានរម្លឹកថា បញ្ហាតូចនៃប្រព័ន្ធរំលាយអាហារមានដូចជាបំពង់ក ថ្លើម ប្រមាត់ លំពែង ពោះវៀនតូច និងពោះវៀនធំអាចទៅជាបញ្ហាធំ ដោយក្លាយជាជំងឺមហារីកធ្ងន់ធ្ងរ ហេតុនេះបុគ្គលគ្រប់រូបត្រូវមកពិគ្រោះយោបល់ជាមួយគ្រូពេទ្យឯកទេសឲ្យបានពីដំបូង ដើម្បីព្យាបាលឲ្យទាន់ពេល។ សូមបញ្ជាក់ថា លោក លាវ បានសិក្សាទាំងនៅប្រទេសអង់គ្លេស និងសិង្ហបុរី ហើយក្លាយជាគ្រូពេទ្យឯកទេសវះកាត់ទូទៅ និង ផ្នែកប្រព័ន្ធរំលាយអាហារ។ លោកក៏ធ្លាប់បានស្រាវជ្រាវផ្នែកវេជ្ជសាស្ត្រ ធ្លាប់បានបង្រៀន និង ព្យាបាលជំងឺប្រព័ន្ធរំលាយអាហារនៅប្រទេសអង់គ្លេស សិង្ហបុរី និងហុងកុង ដែលមានអ្នកជំងឺគ្រប់ជាតិសាសន៍ ទៅពិគ្រោះយោបល់ និងព្យាបាលទាំងប្រើប្រាស់ឱសថ និងវះកាត់។
នៅកម្ពុជា លោកវេជ្ជបណ្ឌិត លាវ នឹងមក ៣ថ្ងៃក្នុងមួយខែ ដើម្បីផ្ដល់ការពិគ្រោះ ពិនិត្យ ធ្វើរោគវិនិច្ឆ័យ និងព្យាបាលជំងឺប្រព័ន្ធរំលាយអាហារទៅតាមស្ថានភាព នៃជំងឺនៅឯមន្ទីរពហុព្យាបាលអន្តរជាតិខេមាបឹងកេងកង ដោយលោកអះអាងថា តម្លៃពិតជាខុសគ្នានៅប្រទេសសិង្ហបុរី ខណៈដែលមានគ្រូពេទ្យឯកទេសដូចគ្នា។
សម្រាប់ការណាត់ជួបលោកវេជ្ជបណ្ឌិត ស៊ី ខេ លាវ អ្នកមានបញ្ហាផ្នែកប្រព័ន្ធរំលាយអាហារអាចទាក់ទងលោកវេជ្ជបណ្ឌិត អ៊ុំ សុភាព នាយកគ្រប់គ្រងមន្ទីរពហុព្យាបាលអន្តរជាតិខេមាបឹងកេងកង ស្ថិតនៅដីឡូត៍លេខ ២៨ ផ្លូវ ២៩៤ សង្កាត់បឹងកេងកង ១ ខណ្ឌចំការមន រាជធានីភ្នំពេញ ឬតាមទូរស័ព្ទលេខ ០១៧ ៥៨៨ ៥៨៨ និង ០៩៩ ៥៨៨ ៥៨៨៕