ធ្លាប់ឲ្យទឹកដោះគោក្មេងមួយកែវ ពេលខ្លួនឈឺធ្ងន់បែរជួបរឿងគួរឲ្យភ្ញាក់ផ្អើល

2017-01-17 23:04:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មានក្មេងប្រុសកម្សត់ម្នាក់ឈ្មោះ Howard Kelly ដើរលក់ឥវ៉ាន់បន្តិចបន្តួចតាមផ្ទះអ្នកភូមិ ដើម្បីបានប្រាក់ផ្គត់ផ្គង់ការសិក្សារបស់ខ្លួនជាមួយការតស៊ូព្យាយាមខ្ពស់។

រូបតំណាង

ថ្ងៃមួយ Kelly ដើរលក់មិនដាច់ និងមានប្រាក់ជាប់ខ្លួនមួយកាក់ប៉ុណ្ណោះ ប៉ុន្តែក្រពះចាប់ផ្ដើមឃ្លានខ្លាំងទ្រាំលែងបាន។ Kelly បានទៅដល់ផ្ទះមួយនៅក្បែរនោះ ហើយសម្រេចចិត្តទាំងបង្ខំសុំអាហារគេញ៉ាំ។

ប៉ុន្តែពេលស្ត្រីជាម្ចាស់ផ្ទះបើកទ្វារទទួល ស្រាប់តែក្មេងនោះហ៊ានសុំត្រឹមតែទឹកមួយកែវប៉ុណ្ណោះ។ នាងសម្លឹងមើល Kelly ពីចុងជើងដល់ចុងសក់ រួចដឹងថាគេប្រហែលជាឃ្លានខ្លាំងណាស់ហើយ ដូច្នេះនាងបានយកទឹកដោះគោមួយកែវធំឲ្យ។

ឃើញបែបនេះ ក្មេងប្រុសកម្សត់បានទទួលយកដៃពីរទាំងរំភើបរីករាយ។ ពេលផឹករួច គេបានសួរស្ត្រីនោះថា "តើខ្ញុំជំពាក់ប៉ុន្មាន?” ស្រ្តីនោះឆ្លើយ៖ "ក្មួយមិនជំពាក់មីងអីទេ ម្ដាយមីងបង្រៀនមីងមិនឲ្យចង់បានសំណង ពេលជួយគេដោយទឹកចិត្តនោះទេ"។ ឮដូចនេះ Kelly ត្រេកអរពន់ពេកព្រោះខ្លួនមិនមានប្រាក់ស្រាប់ផង និងបានលើកដៃអរគុណអស់ពីចិត្តពីថ្លើម។ បន្តិចក្រោយមក Kelly តបវិញ៖ "ឥឡូវនេះ ខ្ញុំមានអារម្មណ៍ថា មិនត្រឹមតែរាងកាយរឹងមាំទេ ព្រមទាំងជំនឿស្មារតីក្នុងការគិតក៏មានច្រើនដោយសារពាក្យសម្ដីប៉ុន្មានម៉ាត់របស់មីង ខ្ញុំនឹងចងចាំជានិច្ច"។

អស់រយៈពេលជាច្រើនឆ្នាំកន្លងផុតទៅ ស្ត្រីនោះបានធ្លាក់ខ្លួនឈឺធ្ងន់ សូម្បីគ្រូពេទ្យក្នុងភូមិក៏មិនអាចមើលនាងជា ដូច្នេះត្រូវបញ្ជូនទៅព្យាបាលនៅទីក្រុង។ បន្ទាប់ពីក្រុមគ្រូពេទ្យជំនាញសិក្សាវិភាគរោគ ទើបរកឃើញថានាងកើតជំងឺកម្រម្យ៉ាងពិបាកព្យាបាល ទើបហៅលោកវេជ្ជបណ្ឌិត Howard Kelly មកពិគ្រោះយោបល់។ នៅពេលលោកចូលបន្ទប់សង្គ្រោះរបស់ស្ត្រីនោះក្នុងមន្ទីរពេទ្យ គាត់ស្រាប់តែចំណាំស្ត្រីនោះបានភ្លាមព្រោះនាងជាអ្នកមានគុណកាលខ្លួននៅក្រខ្សត់។

លោកវេជ្ជបណ្ឌិតដដែល បានប្ដេជ្ញាប្រឹងប្រែងឲ្យអស់សមត្ថភាពជួយសង្គ្រោះស្ត្រីនេះឲ្យជាសះស្បើយពីជំងឺទាល់តែបាន។ ការតស៊ូព្យាយាមរបស់ Kelly បានចំណាយអស់រយៈពេលជាច្រើនថ្ងៃ ហើយរូបគេបានខ្នះខ្នែងសុំជំនួយសង្គ្រោះពីគ្រូពេទ្យផ្សេងទៀត រហូតព្យាបាលជំងឺនាងជាសះស្បើយតែម្ដង។

បន្ទាប់អាការៈបានធូរច្រើន នាងបានទទួលវិក្កយបត្របង់ប្រាក់ថ្លៃព្យាបាល។ នាងព្រួយបារម្ភខ្លាំងព្រោះតាមស្ថានភាពជំងឺធ្ងន់ធ្ងរ និងរយៈពេលព្យាបាលយូរ នាងថាខ្លួនរកស៊ីមួយជីវិតក៏ប្រហែលគ្មានប្រាក់ឲ្យគ្រូពេទ្យដែរ។ ប៉ុន្តែនៅទីបំផុត ពេលបើកវិក្កយបត្រមើល នាងបែរជារកឃើញពាក្យបីបួនម៉ាត់នៅជ្រុងម្ខាងនៃសំបុត្រថា "មីងមិនជំពាក់ពេទ្យអ្វីទេ ថ្លៃព្យាបាលទាំងអស់ត្រូវសងដោយថ្លៃទឹកដោះគោមួយកែវដែលមីងធ្លាប់ឲ្យក្មួយ៕"

តម្លៃអប់រំ៖ ការជួយអ្នកដទៃដោយមិនគិតចង់បានសំណងមកវិញ ត្រូវគេចាត់ទុកជារឿងប្រពៃ និងឲ្យតម្លៃបំផុតក្នុងសង្គមមួយ។ អ្នកដទៃធ្លាប់ជួយយើងតិច ឬច្រើនក្ដី ត្រូវចេះតបស្នងដឹងគុណគេវិញតាមលទ្ធភាពខ្លួនមាន។ មិនត្រូវម៉ាក់ងាយកុមារតូចៗ ព្រោះពួកគេអាចនឹងមានអនាគតប្រសើរជាងយើង។