ជួបម្ចាស់ហាងនិយាយការនាំ Nokia 6 លើទីផ្សារក្នុងស្រុក
- 2017-01-19 07:50:38
- ចំនួនមតិ 0 | ចំនួនចែករំលែក 0
ជួបម្ចាស់ហាងនិយាយការនាំ Nokia 6 លើទីផ្សារក្នុងស្រុក
ចន្លោះមិនឃើញ
Nokia 6 មិនត្រឹមតែទទួលការចាប់អារម្មណ៍ខ្លាំងនៅចិន រហូតទទួលការកុម្ម៉ង់ទិញកើនដល់ ១ លានគ្រឿង អ្នកប្រើប្រាស់នៅកម្ពុជាមួយចំនួនឯណេះ ក៏អន្ទះសាចង់ទិញស្មាតហ្វូននេះដូចគ្នា។ យ៉ាងណាតាមបណ្ដាហាងលក់ទូរសព្ទទំនើបនៅភ្នំពេញហាក់នៅស្ទាក់ស្ទើរ រឿងដាក់លក់ Nokia 6 លើទីផ្សារ។
ត្បិតឃើញប្រិយមិត្តច្រើនសួរនាំដំណឹង Nokia 6 តែហាងលក់ទូរសព្ទទំនើប ស្រី អូន ម្តុំគិរីរម្យនៅមិនទាន់ប្រាកដរឿងដាក់លក់នោះទេ ដោយហេតុថាគ្រប់សេវាកម្មផ្សេងៗរបស់ Nokia នៅកម្ពុជាមិនសូវទូលំទូលាយដូចពីមុន។ ដូច្នេះវាអាចជាហានិភ័យខ្លះដែរ បើសិនដាក់លក់ផលិតផល Nokia លើទីផ្សារ។
ទោះនៅស្ទាក់ស្ទើររឿងការដាក់លក់ តែម្ចាស់ហាងខាងលើនៅរង់ចាំខាងភ្នាក់ងាររបស់ Nokia នៅក្នុងស្រុក ចាត់ចែងរឿងចែកចាយស្មាតហ្វូន ដែលទទួលការគាំទ្រខ្លាំងនៅចិននេះ។
ចំណែកម្ចាស់ហាងលក់ទូរសព្ទ សុខ លី ក៏អះអាងស្រដៀងគ្នានេះដែរ ដោយខាងលោករង់ចាំតែខាង Nokia នៅកម្ពុជា នាំចូលនឹងចែកចាយតាមហាងលក់បន្ត។ ត្បិត Nokia 6 បច្ចុប្បន្នកំពុងទទួលការចាប់អារម្មណ៍ខ្លាំងនៅបរទេសពិសេសចិន តែលទ្ធភាពលក់នៅក្នុងទីផ្សារក្នុងស្រុក ហាក់មានការប្រកួតប្រជែងខ្លាំងពីម៉ាកទូរសព្ទដទៃ។
Nokia 6 ផលិតដោយក្រុមហ៊ុនវ័យក្មេង HMD ដែលមានបុគ្គលិកជាច្រើនធ្លាប់ធ្វើការឲ្យ Nokia ពីមុន។ ក្រុមហ៊ុននេះមានទីស្នាក់ការនៅប្រទេសហ្វាំងឡង់ ដែលជាទីកំណើតក្រុមហ៊ុន Nokia។
ស្មាតហ្វូន Nokia 6 ដាក់លក់លើទីផ្សារបរទេសថ្ងៃព្រហស្បតិ៍នេះ ក្នុងតម្លៃ ២៤៥ ដុល្លារ។ វាបំពាក់អេក្រង់ប្រភេទ Gorilla Glass 3 ទំហំ ៥,៥ អ៊ីញ មាន Resolution ១០៨០x១៩២០ (Full HD) ដំណើរការដោយបន្ទះឈីប Snapdragon 430 , Octa-Core CPU និង Adreno 505 GPU។ កាន់តែពិសេស Nokia 6 មាន RAM 4GB អង្គផ្ទុកទិន្នន័យ 64GB កាមេរ៉ាក្រោយ 16MP ជាមួយ Aperture f/2.0 និងកាមេរ៉ាមុខ 8MP៕