នៅខាងក្រោយរូបចម្លាក់នេះ មានបន្ទប់សម្ងាត់ បង្កប់រឿងរ៉ាវគួរឲ្យភ្ញាក់ផ្អើល

2017-02-07 03:27:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ចម្លាក់ភ្នំ Mount Rushmore ដែលស្ថិតនៅរដ្ឋ South Dakota សហរដ្ឋអាមេរិក គឺជាការងារចម្លាក់ដ៏អស្ចារ្យបំផុតមួយ ដែលឆ្លាក់ចេញជាផ្ទៃមុខ របស់អតីតប្រធានាធិបតីអាមេរិក ចំនួន៤រូប គឺ លោក George Washington (ទី១), Thomas Jefferson (ទី៣), Theodore Roosevelt (ទី២៦) និង Abraham Lincoln (ទី១៦)។

ចម្លាក់ភ្នំ Mount Rushmore

អ្វីដែលពិសេសជាងនេះទៅទៀត គឺមានបន្ទប់សម្ងាត់មួយ លាក់នៅពីក្រោយ រូបចម្លាក់ផ្ទៃមុខមនុស្សដ៏ធំសម្បើមទាំងនោះ។

ចម្លាក់ភ្នំ Mount Rushmore ត្រូវបានធ្វើឡើង ដោយជាងចម្លាក់ឈ្មោះ Gutzon Borglum និងកូនប្រុសរបស់លោក ឈ្មោះ Lincoln ដោយបានចាប់ផ្ដើមគម្រោង នៅក្នុងឆ្នាំ១៩២៧ និង បញ្ចប់នៅក្នុងឆ្នាំ១៩៤១។ លោក Gutzon ចង់ឲ្យគម្រោងនេះ បង្ហាញពីភាពជាប្រធានាធិបតីកាន់តែច្រើន ប៉ុន្តែជាអកុសល ផែនការរបស់លោកត្រូវបានច្រានចោល ដោយសារតែខ្វះខាតថវិកា។

បន្ទប់សម្ងាត់ Hall of Records

មូលហេតុខាងលើ បានធ្វើឲ្យជាងចម្លាក់សញ្ជាតិអាមេរិករូបនេះ ចាប់ផ្ដើមបង្កើតបន្ទប់សម្ងាត់មួយ ហៅថា «Hall of Records» ដែលត្រូវបានគេប្រើសម្រាប់ផ្ទុកឯកសារសំខាន់ៗ ដើម្បីបន្សល់ទុកដល់មនុស្សជំនាន់ក្រោយ។ ផ្ទុយទៅវិញ លោក Gutzon បានស្លាប់ មុនពេលបន្ទប់សម្ងាត់នោះរួចរាល់ ហើយវាត្រូវបានទុកចោល អស់រយៈពេលប្រហែល ៦០ឆ្នាំ។ ប៉ុន្តែ ក្រោយមកវាត្រូវបានសាងសង់បញ្ចប់ជាស្ថាពរ។

តើមានអ្វីខ្លះនៅក្នុងបន្ទប់សម្ងាត់នោះ?

ឯកសារសំខាន់ៗជាច្រើនត្រូវបានដាក់នៅក្នុងបន្ទប់នោះ ដូចជា វិសោធនកម្មទាំង១០ដំបូងបង្អស់ (Bill of Rights) , រដ្ឋធម្មនុញ្ញសហរដ្ឋអាមេរិក , ការប្រកាសឯករាជ្យ , ជីវប្រវត្តិរបស់ លោក Gutzon និង ការពិពណ៌នាផ្សេងៗនៃប្រធានាធិបតីទាំង៤រូប ដែលមាននៅលើចម្លាក់ភ្នំ Mount Rushmore នោះ រួមទាំង ប្រវត្តិសាស្ត្រពេញលេញរបស់សហរដ្ឋអាមេរិក ផងដែរ។ គេសង្ឃឹមថា មនុស្សជំនាន់ក្រោយនឹងស្វែងរកឃើញបន្ទប់សម្ងាត់នេះ ហើយសិក្សារៀនសូត្រពីប្រវត្តិសាស្ត្រទាំងនោះ៕