រកស៊ីក្នុងទីផ្សារភាគហ៊ុន មានអត្ថប្រយោជន៍ច្រើននឹកស្មានមិនដល់
- 2017-02-07 06:48:40
- ចំនួនមតិ 0 | ចំនួនចែករំលែក 0
រកស៊ីក្នុងទីផ្សារភាគហ៊ុន មានអត្ថប្រយោជន៍ច្រើននឹកស្មានមិនដល់
ចន្លោះមិនឃើញ
កន្លងមកបងប្អូនប្រជាពលរដ្ឋមួយចំនួន ប្រាកដជាធ្លាប់បានដឹងពីការទិញភាគហ៊ុន ប៉ុន្តែមានប្រជាពលរដ្ឋនៅមិនទាន់បានដឹងថាការរកស៊ីភាគហ៊ុននេះមានអត្ថប្រយោជន៍អ្វី? ហើយធ្វើដូចម្ដេចទើបអាចរកស៊ីក្នុងទីផ្សារភាគហ៊ុននេះបាន ? ខាងក្រោមនេះជាអត្ថប្រយោជន៍នៃការរកស៊ីក្នុងទីផ្សារភាគហ៊ុន និងលក្ខខណ្ឌមួយចំនួន។
១.ទទួលបានប្រាក់ចំណេញពីការជួញដូរភាគហ៊ុន និងទទួលបានភាគលាភ
ឯកឧត្ដម ស៊ូ សុជាតិ អគ្គនាយកនៃគណៈកម្មការមូលបត្រកម្ពុជាបានឱ្យដឹងថា អត្ថប្រយោជន៍ចម្បងពីការវិនិយោគក្នុងទីផ្សារភាគហ៊ុន គឺឱកាសទទួលបានប្រាក់ចំណេញ។ ចំណុចនេះមានន័យថា ប្រជាពលរដ្ឋអាចចំណាយដើមទុនវិនិយោគជាមួយក្រុមហ៊ុនដែលមានស្ថិរភាពនិងមានសក្ដានុពល នឹងធ្វើឱ្យអ្នកវិនិយោគ ទទួលបានប្រាក់ចំណេញ ដោយទិញនៅពេលថ្លៃទាប ហើយលក់វិញនៅពេលឡើងថ្លៃ។
ឯកឧត្ដមបានបន្តទៀតថា ប្រជាពលរដ្ឋនឹងទទួលបានប្រាក់ចំណេញទាំងនោះ តាមរយៈការផ្ដល់ជាប្រាក់ចំណូលក្នុងទម្រង់ជាភាគលាភ ដែលជាចំណែកនៃប្រាក់ចំណេញដែលក្រុមហ៊ុនទទួលបាន ហើយប្រាក់ចំណេញទាំងនោះនឹងបង់ជាប្រចាំឆ្នាំទៅកាន់ប្រជាពលរដ្ឋ។
២. ការទិញភាគហ៊ុនជម្រើសល្អបំផុតសម្រាប់ការសន្សំ
អគ្គនាយកនៃគណៈកម្មការមូលបត្រកម្ពុជាលើកឡើងទៀតថា ភាគហ៊ុនជាជម្រើសសម្រាប់ការវិនិយោគដ៏ល្អមួយ ដែលអាចបង្កើនប្រាក់ក្នុងអត្រាចំណូលខ្ពស់ ជាងជម្រើសក្នុងការវិនិយោគផ្សេងទៀតក្នុងរយៈពេលវែង។ លោកបានបន្តទៀតថា ការវិនិយោគភាគហ៊ុនមានសារៈសំខាន់ណាស់ សម្រាប់ការសន្សំ និងវិនិយោគសម្រាប់អនាគត ពីព្រោះថា ប្រជាពលរដ្ឋអាចចាយលុយដើម្បីបង្កើតលុយតាមរយៈការទិញមូលបត្រ ឬភាគហ៊ុននេះរបស់ក្រុមហ៊ុនណាមួយដែលស្ថិរភាព និងកំពុងជោគជ័យ។
៣. ទីផ្សារភាគហ៊ុនជាឧបករណ៍វាស់ស្ទង់សេដ្ឋកិច្ច
នៅត្រង់ចំណុចនេះ មានន័យថា ទីផ្សារភាគហ៊ុន ប្រៀបដូចជាកញ្ចក់ដែលឆ្លុះបញ្ចាំងពីស្ថានភាពសេដ្ឋកិច្ចរបស់ប្រទេស តាមរយៈការកើនឡើងឬធ្លាក់ចុះនៃតម្លៃភាគហ៊ុន។ ដូច្នេះហើយប្រជាពលរដ្ឋអាចដឹងច្បាស់ពីស្ថានភាពសេដ្ឋកិច្ច កំពុងធ្លាក់ចុះឬកើនឡើង ដើម្បីផ្ដល់ជាភាពងាយស្រួលក្នុងការសម្រេចចិត្តថាតើគួរតែវិនិយោគ ឬរកស៊ីអ្វីអាចទទួលបានជោគជ័យ។
៤. រួមចំណែកទទួលបានភាពជាម្ចាស់កម្មសិទ្ធិក្នុងក្រុមហ៊ុនជោគជ័យ
ឯកឧត្ដម ស៊ូ សុជាតិ ថ្លែងបន្តទៀតថា ជាទូទៅពេលដែលប្រជាពលរដ្ឋវិនិយោគភាគហ៊ុនជាមួយក្រុមហ៊ុនដែលជោគជ័យនឹងរកចំណូលបានច្រើន។ លោកអះអាងថា ការទិញភាគហ៊ុនមានន័យថា ប្រជាពលរដ្ឋក្លាយជាចំណែក នៃភាពជាម្ចាស់កម្មសិទ្ធិពីក្រុមហ៊ុនដែលលក់ភាគហ៊ុន។ បន្ថែមលើពីនេះទៀត នៅពេលដែលទិញភាគហ៊ុនក្រុមហ៊ុនណាមួយ ប្រជាពលរដ្ឋមានសិទ្ធិ ធ្វើការសម្រេចចិត្តក្នុងអាជីវកម្មរបស់ក្រុមហ៊ុន តាមទំហំទុនដែលបានវិនិយោគ។
៥. ការវិនិយោគភាគហ៊ុនជាការរួមចំណែកដល់កំណើនសេដ្ឋកិច្ចជាតិ
នៅត្រង់ចំណុចនេះមានន័យថា នៅពេលដែលប្រជាពលរដ្ឋបានយកលុយទៅទិញភាគហ៊ុនក្នុងក្រុមហ៊ុនមួយ គឺបានជួយឱ្យក្រុមហ៊ុននោះកាន់តែមានស្ថិរភាព និងកាន់តែរឹងមាំ។ ដូច្នេះមានន័យថា ប្រជាពលរដ្ឋបានចូលរួមចំណែកក្នុងការអភិវឌ្ឍសេដ្ឋកិច្ច តាមរយៈការបង្កើនការងារដោយជំរុញឱ្យក្រុមហ៊ុនជ្រើសរើសបុគ្គលិកកាន់តែច្រើន និងជួយដល់កំណើនសេដ្ឋកិច្ចជាតិ។ ឯកឧត្ដម ស៊ូ សុជាតិបន្ថែម។
ដោយឡែកចំពោះលក្ខខណ្ឌវិញ គឺពុំមានភាពស្មុគស្មាញនោះទេ ប្រជាពលរដ្ឋអាចសាកសួររាល់ព័ត៌មានលម្អិតនៅគណៈកម្មការមូលបត្រកម្ពុជា ឬអញ្ជើញទៅកាន់ក្រុមហ៊ុនមូលបត្រណាមួយមួយដែលមានអាជ្ញាប័ណ្ណពីគណៈកម្មការមូលបត្រកម្ពុជា។ ចំពោះឯកសារតម្រូវប្រជាពលរដ្ឋគ្រាន់តែមានអត្តសញ្ញាណប័ណ្ណ ឬលិខិតស្នាមផ្សេងទៀត ដែលអាចបញ្ជាក់ពីអត្តសញ្ញាណ។
ឯកឧត្ដម ស៊ូ សុជាតិ ក៏បានបញ្ជាក់ផងដែរថា ដើម្បីឱ្យកាន់តែច្បាស់ពីអត្ថប្រយោជន៍ ឬហានិភ័យនៃការទិញមូលបត្រនេះ គួរតែប្រឹក្សាយោបល់ជាមួយក្រុមហ៊ុនប្រឹក្សាភាគហ៊ុន ដែលមានអាជ្ញាប័ណ្ណពីគណៈកម្មការមូលបត្រកម្ពុជា៕