លោកជំទាវឧកញ៉ា កែវ មុំ ប្រាប់ពីគន្លឹះសំខាន់ៗ ដើម្បីឱ្យអាជីវកម្មជោគជ័យ
- 2017-02-16 23:18:00
- ចំនួនមតិ 0 | ចំនួនចែករំលែក 0
លោកជំទាវឧកញ៉ា កែវ មុំ ប្រាប់ពីគន្លឹះសំខាន់ៗ ដើម្បីឱ្យអាជីវកម្មជោគជ័យ
ចន្លោះមិនឃើញ
មានគំនិតក្នុងការបើកអាជីវកម្មមួយឱ្យចេញជារូបរាង គឺជាភាពជោគជ័យមួយដំណាក់កាលរបស់សហគ្រិនភាព។ ប៉ុន្តែការរក្សាបាននូវភាពជោគជ័យ និងភាពរីកចម្រើនជាលំដាប់ នៃអាជីវកម្មមួយគឺមិនមែនជារឿងងាយស្រួលនោះឡើយ។
ជួបសម្ភាសដោយផ្ទាល់ជាមួយ Sabay ក្នុងកម្មវិធីស្ថាបនាធនធាន ដែលរៀបចំដោយក្រុមហ៊ុន 360 ads & events លោកជំទាវឧកញ៉ា កែវ មុំ ជាម្ចាស់ក្រុមហ៊ុននំស្រួយលីលី បានចែករំលែកនូវគន្លឹះសំខាន់ៗ ដើម្បីឱ្យអាជីវកម្មជោគជ័យជានិរន្តដូចខាងក្រោម៖
១. ផ្ដោតទៅលើ សីលធម៌ សុជីវធម៌ គុណធម៌
លោកជំទាវ ឧកញ៉ា កែវ មុំ ជាម្ចាស់ក្រុមហ៊ុននំស្រួយលីលី និងជាប្រធានសមាគមសហគ្រិនស្ត្រីកម្ពុជា បានប្រាប់ថា ដើម្បីឱ្យអាជីវកម្មមួយមាននិរន្តរភាព និងបន្តរីកចម្រើនរហូតរឿងដែលសំខាន់បំផុតនោះ គឺសីលធម៌ សុជីវធម៌ និង គុណធម៌។ លោកជំទាវលើកឡើងថា អាជីវកម្មមួយមិនមែនផ្ដោតតែលើរឿងប្រាក់ចំណេញនោះទេ ព្រោះអាជីវកម្មដែលអាចរកប្រាក់ចំណេញបានច្រើន ប៉ុន្តែធ្វើឱ្យប៉ះពាល់ដល់សង្គមក៏មិនល្អដែរ។
ដូច្នេះហើយអាជីវកម្មមួយដែលមាននិរន្តរភាព គឺផ្ដោតទៅលើ សីលធម៌ សុជីវធម៌ និង គុណធម៌ ធ្វើយ៉ាងណាឱ្យបុគ្គលិក កម្មករ ពេញចិត្តនឹងការងារ ធ្វើការបានល្អ ហើយអាចជួយដល់សង្គមតាមរយៈការបង្កើតឱកាសការងារដល់បងប្អូនប្រជាពលរដ្ឋ។
២. យុទ្ធសាស្ត្រទីផ្សារ
ម្ចាស់ក្រុមហ៊ុនផលិតនំស្រួយលីលីដ៏ល្បីល្បាញរូបនេះ បន្តទៀតថា ទីផ្សារក៏ជារឿងសំខាន់បំផុតដើម្បីឱ្យអាជីវកម្មជោគជ័យ និងបន្តរីកចម្រើន។ លោកជំទាវឧកញ៉ា កែវ មុំ បន្តថា ក្នុងនាមជាអង្គភាពអាជីវកម្មមួយត្រូវរៀបចំផ្សព្វផ្សាយ ឱ្យចំគោលដៅនៃអតិថិជនដែលបានកំណត់។ នៅត្រង់ចំណុចនេះមានន័យថា ប្រសិនបើផលិតផលនោះ កំណត់យកអតិថិជនជាយុវវ័យ កូនក្មេង មនុស្សចាស់ គឺត្រូវធ្វើយ៉ាងណាផ្សព្វផ្សាយឱ្យចំគោលដៅតែម្ដង។ លោកជំទាវលើកឡើងទៀតថា ប្រសិនបើផលិតផលមួយពុំមានការផ្សព្វផ្សាយនោះទេ នោះអតិថិជនមិនដឹងថាគួររកទិញផលិតផលនោះនៅឯណាដែរ។ ហើយម្យ៉ាងវិញប្រសិនបើពុំមានការផ្សព្វផ្សាយ ផលិតផលលក់មិនដាច់ នោះនឹងធ្វើឱ្យថ្លៃដើមនៃការផលិតកាន់តែច្រើនឡើង អាចនាំឱ្យអាជីវកម្មមានបញ្ហា។
៣. បង្កើនដើមទុន៣ឆ្នាំម្ដង
ប្រធានសមាគមសហគ្រិនស្ត្រីកម្ពុជា និងជាម្ចាស់អាជីវកម្មមួយកំពុងជោគជ័យខ្លាំងរូបនេះ ប្រាប់ថា ជាធម្មតាអាជីវកម្មតែងមានការរីកចម្រើន និងការធ្លាក់ចុះតែត្រូវមានយុទ្ធសាស្ត្រច្បាស់លាស់ទើប អាជីវកម្មនៅតែបន្តរីកចម្រើន។ លោកជំទាវ លើកឡើងថា រយៈពេល២ឆ្នាំ ឬ៣ឆ្នាំដំបូង អាជីវកម្មចាប់ផ្ដើមមានការរីកចម្រើនខ្លាំង ប៉ុន្តែចូលដល់ឆ្នាំទី៤ និងទី៥ អាជីវកម្មនឹងចាប់ផ្ដើមធ្លាក់ចុះវិញ។ ដូច្នេះហើយ ក្នុងឆ្នាំទី៤ និងទី៥នេះត្រូវបន្ថែមដើមទុន ដើម្បីផ្លាស់ប្ដូរបច្ចេកវិទ្យា បង្កើនការផលិត បង្កើតគំនិតច្នៃប្រឌិតថ្មីៗ ដើម្បីឱ្យអាជីវកម្មរីកចម្រើនឡើងវិញ។
លោកជំទាវ ឧកញ៉ា កែវ មុំ បានឱ្យដឹងទៀតថា បន្ទាប់ពីបន្ថែមដើមទុនក្នុងឆ្នាំទី ៤ និងទី ៥ ហើយចូលដល់ឆ្នាំទី ៨ និងទី៩ អាជីវកម្មនឹងចាប់ផ្ដើមធ្លាក់ចុះសារជាថ្មី ដូច្នេះហើយទើបរយៈពេល៣ឆ្នាំម្ដងគួរបន្ថែមដើមទុនជានិច្ច ធ្វើយ៉ាងណាកុំឱ្យការលក់ធ្លាក់ចុះ។
សហគ្រិនជាស្រ្តីដ៏ឆ្នើមរូបនេះបន្ថែមទៀតថា អាជីវកម្មដែលបើកហើយ មានការដួល ឬក្ស័យធនទៅវិញ គឺអាចបណ្ដាលមកពីមូលហេតុនេះ ដោយមិនបានបន្ថែមដើមទុន ដើម្បីពង្រឹងអាជីវកម្មនៅពេលដែលអាជីវកម្មធ្លាក់ចុះ។
គួរបញ្ជាក់ផងដែរថា កម្មវិធី ស្ថាបនាធនធាន មានការអញ្ជើញចូលរួមពីវាគ្មិនល្បីៗជាច្រើនរូប ដើម្បីចែករំលែកបទពិសោធន៍ទាក់ទងនឹងការធ្វើអាជីវកម្ម។ កម្មវិធីនេះធ្វើឡើងរយៈពេល ២ថ្ងៃ គឺថ្ងៃទី ១៦ និង ១៧កុម្ភៈ ចាប់ពីវេលាម៉ោង ៨ព្រឹក ដល់ម៉ោង៥ល្ងាច នៅឯសណ្ឋាគារសុខាភ្នំពេញ៕