គន្លឹះសំខាន់ៗ ដើម្បីឲ្យរៀបការរួចសល់លុយ ហើយមានរបររកស៊ីទៀត

2017-02-20 23:26:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយរៀបការហើយ ស្វាមីភរិយាមិនមែនចង់បានតែលុយសល់ពីចំណងដៃនោះទេ។ មានស្វាមីភរិយាជាច្រើន ក្រោយរៀបការរួចសល់លុយនិងមានអាជីវកម្មពីរនាក់ប្ដីប្រពន្ធ។ តើគួររៀបចំផែនការដូចម្ដេច? ទើបរៀបការរួចសល់លុយហើយ មានរបររកស៊ីទៀត?

ខាងក្រោមនេះជាការផ្ដល់បទសម្ភាសន៍ដោយផ្ទាល់ពី លោក ខាំ ពិសិដ្ឋ ម្ចាស់ក្រុមហ៊ុន PM LEADERSHIP ក្នុងឱកាសដែលលោកធ្វើជាវាគ្មិនក្នុងកម្មវិធី "ស្ថាបនាធនធាន (Wealth Building)" នៅសណ្ឋាគារសុខាភ្នំពេញ។

១. កំណត់ពីលក្ខណៈសម្បត្តិដៃគូជីវិតដែលចង់បាន

លោក ខាំ ពិសិដ្ឋ ដែលមានអាជីវកម្មរួមគ្នាជាមួយភរិយារបស់លោក បានប្រាប់ថា មុនសម្រេចជ្រើសរើសនរណាម្នាក់ជាដៃគូជីវិត ត្រូវកំណត់ថា ចង់បានស្វាមី ឬភរិយាមានលក្ខណៈសម្បត្តិយ៉ាងម៉េចខ្លះ? ដើម្បីផ្សារភ្ជាប់ជាមួយគោលដៅជីវិតរបស់ខ្លួនដែលបានកំណត់ ថាតើអនាគតទៅចង់បានអ្វី? ចង់មានអ្វី?

លោកបន្តទៀតថា ត្រូវសួរខ្លួនឯងថា ចង់បានមនុស្សប្រភេទណាជាគូរអនាគត ដើម្បីរួមចំណែកក្នុងជីវិត ដើម្បីសម្រេចគោលដៅដែលបានកំណត់ និងទទួលបាននូវភាពជោគជ័យ។ ដូច្នេះហើយត្រូវកំណត់ពីគុណសម្បត្តិ នៃដៃគូជីវិត ថាតើម្នាក់នោះអាចជួយឱ្យជីវិតក្រោយរៀបអាពាហ៍ពិពាហ៍ល្អប្រសើរឬទេ?

លោក ខាំ ពិសិដ្ឋ

**២. ដឹងពីខ្លួនឯងច្បាស់**

សហគ្រិនឆ្នើមក្នុងអាជីវកម្មរូបនេះ លើកឡើងទៀតថា ចំណុចដែលសំខាន់មួយទៀតនោះគឺត្រូវសួរខ្លួនឯងថា តើដៃគូជីវិតដែលសម្រេចចិត្តជ្រើសរើសនោះ មានអ្វីដែលខ្លួនចង់បានហើយឬនៅ? ហើយក៏ត្រូវសួរខ្លួនឯងវិញថា "តើយើងមានលក្ខណៈសម្បត្តិគ្រប់គ្រាន់សម្រាប់ដៃគូជីវិតយើងវិញដែរឬទេ?”

ដូច្នេះហើយក្នុងនាមជាស្វាមីភរិយា ត្រូវមានគុណសម្បត្តិដូចគ្នាពីព្រោះថាភាគីណាម្នាក់ពុំមានគុណសម្បត្តិស្របគ្នានោះក៏ជាបញ្ហាដែរ។ លោក ខាំ ពិសិដ្ឋ ប្រាប់ថា កាលណាគូស្វាមីភរិយា មានលក្ខណៈសម្បត្តិស្របគ្នា នោះទើបជំរុញឱ្យមានការអភិវឌ្ឍ ធ្វើអ្វីស្របគ្នា ទើបគ្រួសារមានភាពរីកចម្រើន។

៣. ចំណាយពេលដើម្បីពិភាក្សាក្រោយរៀបការហើយ

សហគ្រិនភាពកំពុងជោគជ័យលើមុខជំនួញរូបនេះ បន្តទៀតថា ក្នុងភាពជាស្វាមីភរិយា ត្រូវពិភាក្សាគ្នាក្រោយរៀបការពីរនាក់ប្ដីប្រពន្ធថា តើគួរធ្វើការរយៈពេលប៉ុន្មានដើម្បីមានអ្វីដែលជារបស់ខ្លួនឯង។ លោក ខាំ ពិសិដ្ឋ ប្រាប់ថា ពេលដែលកំពុងធ្វើការត្រូវចាប់ផ្ដើមកំណត់ពីគោលដៅឱ្យហើយ បូករួមការអភិវឌ្ឍសមត្ថភាពកំឡុងពេលធ្វើការ។ ដូច្នេះត្រូវកំណត់ពីនាក់ប្ដីប្រពន្ធថា ចង់រកស៊ីអ្វី? ក្រោយពេលធ្វើការឱ្យគេហើយ?

លោកបន្ថែមទៀតថា ពីរនាក់ប្ដីប្រពន្ធត្រូវ រៀបចំផែនការអភិវឌ្ឍសមត្ថភាព ដូចជា ការរាប់អានមិត្តភក្ដិដែលជាអ្នករកស៊ី ការអានសៀវភៅមុខជំនួញផ្សេងៗ ឬចូលរួមកម្មវិធីនានាពីរនាក់ប្ដីប្រពន្ធដែលពាក់ព័ន្ធនឹងការធ្វើអាជីវកម្ម និងសិក្សាពីអ្នកជោគជ័យជាដើម។

៤. សួរ១សំណួរក្រោយពេលមានសមត្ថភាពទាំងពីរនាក់ប្ដីប្រពន្ធ លោក ខាំ ពិសិដ្ឋ ប្រាប់ថា សំណួរនេះពិតជាសំខាន់ណាស់ក្រោយពេលទាំងពីរនាក់ប្ដីប្រពន្ធមានសមត្ថភាពរៀងខ្លួនហើយ។ មកដល់ចំណុចនេះមានន័យថា ស្វាមីភរិយាគួរហ៊ានប្រថុយនៅក្នុងការរកស៊ី ប៉ុន្តែត្រូវសួរថា តើនរណាមានប្រាក់ខែច្រើនជាង?

លោកប្រាប់ថា គួរទុកឱ្យអ្នកមានប្រាក់ខែច្រើននៅធ្វើការធម្មតា។ ដោយឡែកសម្រាប់អ្នកប្រាក់ខែតិច ត្រូវចេញមុនដើម្បីគ្រប់គ្រងអាជីវកម្ម ហើយអ្នកប្រាក់ខែច្រើន គួរនៅធ្វើការ រួចហើយជួយនៅគាំទ្រពីក្រោយខ្នង។

ចំណុចនេះពិតជាសំខាន់ណាស់ ព្រោះថា ប្រសិនបើអាជីវកម្មមានបញ្ហាអ្នកប្រាក់ខែច្រើននៅរកប្រាក់ចំណូលដើម្បីទប់ទល់ជីវភាព នៅពេលដែលក្រុមហ៊ុនមានលំនឹងហើយអាចចេញមកទាំងពីរនាក់ ធ្វើយ៉ាងឱ្យអាជីវកម្មកាន់តែរីកចម្រើន។

៥. បង្កើតគោលនយោបាយពីរនាក់ប្ដីប្រពន្ធ

លោក ខាំ ពិសិដ្ឋ បានប្រាប់ថា នេះជាបទពិសោធន៍ដែលលោកឆ្លងកាត់ពីរនាក់ភរិយារបស់លោកផ្ទាល់។ ភាពជាស្វាមីភរិយា ត្រូវមានផែនការគ្រប់គ្រងប្រាក់ចំណូលឱ្យបានច្បាស់លាស់ មានន័យត្រូវត្រូវបង្កើតគោលនយោបាយហិរញ្ញវត្ថុ ទាំងនៅក្នុងគ្រួសារ និងនៅក្នុងក្រុមហ៊ុន។ ប្រសិនបើមិនបានរៀបចំផែនការលុយកាក់ ឬគោលនយោបាយហិរញ្ញវត្ថុនេះទេ អាចនាំឱ្យមានបញ្ហាហិរញ្ញវត្ថុ ហើយវាក៏ជាហានិភ័យមួយដែរ សម្រាប់ស្វាមីភរិយាដែលមានអាជីវកម្ម៕