Leicester ឬ Sevilla ឡើងវគ្គ៨ក្រុម UEFA Champions League យប់នេះ?
- 2017-03-14 07:46:51
- ចំនួនមតិ 0 | ចំនួនចែករំលែក 0
Leicester ឬ Sevilla ឡើងវគ្គ៨ក្រុម UEFA Champions League យប់នេះ?
ចន្លោះមិនឃើញ
ក្រុមកញ្ជ្រោងខៀវ Leicester City របស់អង់គ្លេស នឹងស្វាគមន៍ក្រុមអេស្ប៉ាញ Sevilla នៅកីឡដ្ឋាន King Power ក្នុងការប្រកួត UEFA Champions League វគ្គ១៦ក្រុម ជើងទី២ វេលាម៉ោង០២:៤៥នាទីយប់នេះ។
កាលជើងទី១ នៅទឹកដីអេស្ប៉ាញ Sevilla បានយកឈ្នះលើក្រុមម្ចាស់ជើងឯក Premier League ២-១ ដែលពេលនោះដឹកនាំដោយអ្នកចាត់ការចាស់ Claudio Ranieri។ ប៉ុន្តែចុងសប្ដាហ៍កន្លងទៅ Leicester បានប្រកាសតែងតាំងលោក Craig Shakespeare អតីតជំនួយការ ឲ្យក្លាយជាអ្នកចាត់ការពេញសិទ្ធិ រហូតដល់ចប់រដូវកាលនេះ ហើយយប់នេះគឺជាប្រកួតដំបូងរបស់លោក ក្នុងនាមជាអ្នកចាត់ការ។
អ្នកចាត់ការក្រុម Leicester លោក Shakespeare បានលើកឡើងថា ក្រុម Sevilla ជាក្រុមដែលសម្បូរកីឡាករល្អៗលំដាប់ World Class ច្រើន។ ប៉ុន្តែយ៉ាងណា ក្រុមរបស់លោកអាចរកបាន១គ្រាប់ក្រៅដីដ៏សំខាន់កាលជើងទី១ ដូច្នេះយប់នេះនឹងក្លាយជាការប្រកួតដ៏ជក់ចិត្ត ជាមួយនឹងបរិយាកាសដ៏ល្អបំផុត។
ប្រវត្តិជួបគ្នា និងស្ថិតិមួយចំនួន៖
ក្រុមទាំងពីរនេះទើបប៉ះគ្នានៅពានអឺរ៉ុបលើកទី១ទេ ដែលជើងទី១ប្រកួតមុន Sevilla ឈ្នះ ២-១ ខណៈដែលខ្សែប្រយុទ្ធ Jamie Vardy ស៊ុតឲ្យ Leicester បានគ្រាប់ក្រៅដី១គ្រាប់។
Leicester មិនដែលឈ្នះក្រុមអេស្ប៉ាញនៅពានអឺរ៉ុបទេ ពោលគឺ៥ប្រកួត ស្មើ៤ និងចាញ់១។
Leicester ជាក្រុមដំបូងគេ បន្ទាប់ពីក្រុម Malaga រដូវកាល២០១២-២០១៣ ដែលបញ្ចប់កំពូលតារាងវគ្គចែកពូល UEFA Champions League ពេលបង្ហាញខ្លួនលើដំបូង។
Sevilla ឡើងផុតវគ្គចែកពូល UEFA Champions League ៣ដង រយៈពេល៤រដូវកាលចុងក្រោយ ប៉ុន្តែពួកគេមិនដែលឆ្លងផុតវគ្គ១៦ក្រុមនោះទេ។
៥ប្រកួតចុងក្រោយ៖
Leicester៖ ចាញ់ Swansea ២-០, ចាញ់ Millwall ១-០, ចាញ់ Sevilla ២-១, ឈ្នះ Liverpool ៣-១ និងឈ្នះ Hull City ៣-១។
Sevilla៖ ឈ្នះ Leicester City ២-១, ឈ្នះ Real Betis ២-១, ឈ្នះ Athletic Bilbao ១-០, ស្មើ Alaves ១-១ និងស្មើ Leganes ១-១៕