ខ្លោងទ្វារអង្គរសង្ក្រាន្តឆ្នាំ ២០១៧ ស្រស់ស្អាត យករចនាបថខ្លោងទ្វារប្រាសាទបុរាណ

2017-03-25 08:40:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមការងារអង្គរសង្ក្រាន្តបានបង្ហាញរូបរាងខ្លោងទ្វារអង្គរសង្ក្រាន្តដែលបានអះអាងថា ខ្លោងទ្វារនេះបានយកតាមរចនាបថខ្លោងទ្វារប្រាសាទបុរាណខ្មែរ។ ការបង្ហាញអំពីប្លង់ខ្លោងទ្វារអង្គរសង្ក្រាន្ត កាលពីព្រឹកមិញនេះ ព្រោះតែមិនចង់ជាន់ដានចាស់កាលពីឆ្នាំ ២០១៥ ដែលខ្លោងទ្វារអង្គរសង្ក្រាន្តរងការរិះគន់ខ្លាំងៗពីសាធារណៈមតិថា បានយករចនាបថពីបរទេសច្រើនជាងខ្មែរ។

លោក សំហេង បុរស អនុប្រធានក្រុមការងារប្រតិបត្តិនៃព្រឹត្តិការណ៍អង្គរសង្ក្រាន្ត បានប្រាប់ក្រុមអ្នកសារព័ត៌មានក្រោយចប់វេទិកា"ស្វែងយល់អំពីទិដ្ឋភាពនៃព្រឹត្តិការណ៍អង្គរសង្ក្រាន្តឆ្នាំ២០១៧" នៅសាលពហុបំណងមជ្ឈមណ្ឌលសហប្រតិបត្តិការកម្ពុជា-កូរ៉េ កាលពីព្រឹកមិញនេះថា វេទិកានេះគោលបំណងសំខាន់ចង់កៀរគរយុវជនទាំងអស់ឲ្យយល់អំពីព្រឹត្តិការណ៍អង្គរសង្រ្កាន្ត និង ស្វែងយល់អំពីកម្មវិធីនានារបស់អង្គរសង្ក្រាន្តឆ្នាំ ២០១៧។ មួយទៀតវេទិកានេះក៏ចង់ឲ្យប្រជាពលរដ្ឋទាំងមូលបានដឹងអំពីប្លង់ខ្លោងទ្វារអង្គរសង្ក្រាន្តឆ្នាំ ២០១៧ មុននឹងចាប់ផ្ដើមសាងសង់ផ្លូវការនៅពេលខាងមុខ។ "អីចឹង!ឆ្នាំនេះអត់ឲ្យហួសពេលទេ ឆ្នាំនេះយើងនឹងស្នើសុំយោបល់ពួកគាត់មុន"។

កាលពីឆ្នាំ ២០១៥ មហាជន ជាពិសេសអ្នកប្រើប្រាស់បណ្ដាញសង្គម ហ្វេសបុក បានរិះគន់ខ្លាំងៗ នៅពេលបានឃើញរូបរាងខ្លោងទ្វារអង្គរសង្ក្រាន្តថា រូបរាងនោះដូចរចនាបថបរទេស ដូច្នេះហើយកំហឹងជាតិនិយមបានឈានដល់ដុតខ្លោងទ្វារនោះផងដែរ។ ប៉ុន្តែ ភ្លាមៗក្រុមការងារអង្គរបានសង្ក្រាន្តបានចេញប្លង់ថ្មី នៃខ្លោងទ្វារអង្គរសង្ក្រាន្តបានរំងាប់ចិត្តមហាជន និង សាទរជាច្រើនវិញ។

លោក ឈឹម សុធី ប្រធាននាយកដ្ឋានសិល្បៈសូនរូប និង សិប្បកម្ម នៃក្រសួងវប្បធម៌ និងវិចិត្រសិល្បៈ បាននិយាយដែរថា មហាជនប្រតិកម្មចំពោះខ្លោងទ្វារអង្គរសង្ក្រាន្តកាលពី ២ឆ្នាំមុននោះ គឺមិនមានការសហការជាមួយនឹងក្រសួងវប្បធម៌។ ប៉ុន្តែឆ្នាំ ២០១៦-១០១៧ នេះ ខ្លោងទ្វារថ្មី គឺមានគណៈកម្មការចម្រុះ ដោយខាងសហភាពសហព័ន្ធយុវជន សហការជាមួយក្រសួងវប្បធម៌ ជាពិសេសនាយកដ្ឋានសិល្បៈសូនរូប បានរចនាបថខ្លោងទ្វារមានលក្ខណៈដូចប្រាសាទបុរាណ។

*ក្រុមយុវជនបានចូលរួមវេទិកាព្រឹកមិញ នៅ CKCC*

លោក សុធី បានធ្វើបទបង្ហាញមួយទៅកាន់យុវវ័យរាប់រយនាក់ ដែលបានចូលរួមវេទិកាព្រឹកមិញនេះថា ក្លោងទ្វារអង្គរសង្ក្រាន្តឆ្នាំ ២០១៧ បានប្រើប្រាស់រចនាបថជាខ្មែរ ដោយបានដកស្រង់ក្បាច់ជាច្រើន ដូចជា៖

១. ក្បាច់ត្របកឈូកអង្គរ

២. ក្បាច់ចកអង្គរ

៣. ក្បាច់ចង្វាយអង្គរ

៤. ក្បាច់ពងត្រី

៥. ក្បាច់អង្គរសន្លឹកទម្រង់ហានបំបែក

៦. ព្ធរ៉ា

៧. កូនក្រឡឹងកំពូលពេជ្រ រឺកំពូលមិត

៨. ក្បាច់ហោជាង

*នេះជារូបរាងនៃប្លង់ខ្លោងទ្វារអង្គរសង្ក្រាន្ត២០១៧ (រូបរបស់ ស.ស.យ.ក)*

យ៉ាងណាក៏ដោយ លោក ឈឹម សុធី បានលើកឡើងថា ក្រោយពីវេទិកានេះ ក្រុមការងារអង្គរសង្ក្រាន្តនឹងបង្ហោះរូបខ្លោងទ្វារទៅកាន់បណ្ដាញសង្គម ដើម្បីរង់ចាំមតិរិះគន់ក្នុងន័យស្ថាបនា ប្រសិនបើពុំមានអ្វីខុសឆ្គងទេ នោះក្រុមការងារនឹងសម្រេចយកគំរូនោះហើយ៕