តារាសិចជប៉ុនលេចមុខលើក្របសៀវភៅគណិតវិទ្យានៅថៃ

2014-09-13 16:18:02
ចំនួនមតិ 0 | ចំនួនចែករំលែក 0

ចន្លោះមិនឃើញ

អុញ! ម៉េចបានជាតារាស្រីក្នុងរឿងអាសអាភាសជប៉ុន ត្រូវបានគេយកទៅដាក់លើក្របសៀវភៅពុម្ពគណិតវិទ្យាវិញ? វាជារឿងមិនគួរឲ្យជឿ ប៉ុន្តែវាជាការពិត បើយោងតាមគេហទំព័រ Rocket News 24 របស់ជប៉ុន។

ប្រភពដដែលបានបញ្ជាក់ថា រូបនៅលើសៀវភៅ មូលដ្ឋានគ្រឹះគណិតវិទ្យា ឬ Basic Mathematics របស់ថៃ ជារូបនាង Mana Aoki តារាល្បីមួយក្នុងចំណោមតារាស្រីល្បីៗក្នុងពិភពរឿងក្ដៅសាច់របស់ជប៉ុន។ នៅលើក្របនោះ គេឃើញនាងស្លៀកពាក់សុភាពរាបសារដូចគ្រូបង្រៀនធម្មតា មិនសិចស៊ីដូចឈុតឆាកក្នុងរឿងនោះឡើយ។

យ៉ាងណាក្ដី បើយោងតាមអ្នកលេងអ៊ីនធើណិតមួយចំនួន បានបញ្ជាក់ថា រូបមួយសន្លឹកនោះ មានប្រភពដើមពីក្នុងរឿងអាសអាភាសដែលមានចំណងជើងថា "Costume Play Working Girl” មិនមែនជារូបថតថ្មីដែលថតដើម្បីតែដាក់លើក្របសៀវភៅសិក្សានេះឡើយ។

គ្រឹះស្ថានបោះពុម្ពផ្សាយ MuangThaiBook ដែលជាអ្នកផលិតសៀវភៅនេះ កំពុងរងកម្ដៅនៃការរិះគន់យ៉ាងខ្លាំង ក្រោយបោះពុម្ពចំនួន៣០០០ក្បាលសម្រាប់ដាក់លក់រួចទៅហើយ មុនពេលគេរកឃើញប្រភពដើមនៃរូបភាព។ មកទល់ពេលនេះ សៀវភៅនេះត្រូវបានដកចេញពីទីផ្សារហើយ ដើម្បីយកទៅប្ដូរក្របថ្មី៕