មិនគួរឲ្យជឿ ម៉ឺន សុភា ផ្ដួល កែវ រំចង់ក្នុងទឹកទី២

2014-11-08 15:14:17
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រើកណ្តាប់ដៃឥតស្រមោល ម៉ឺន សុភា បានប្រើសមត្ថភាពពិតៗផ្តួលជើងខ្លាំង កែវ រំចង់ឲ្យលោកអាជ្ញាកណ្តាលបញ្ឈប់ត្រឹមទឹកទី២សម្រាប់ការប្រកួតសងសឹកកាលពីយប់មិញរបស់សង្វៀនបាយ័នក្នុងព្រឹត្តិការណ៍ព្រះរាជពិធីបុណ្យអុំទូកថ្ងៃបញ្ចប់។

ការពិតលើសង្វៀនក្នុងទឹកទី១ កែវ រំចង់បង្ហាញយ៉ាងច្បាស់អំពីភាពអង់អាចរបស់ខ្លួនក្នុងការចូលវាយមិនថយក្រោយដែលជាចំណុចខ្លាំងមួយដែលរូបគេធ្លាប់ទទួលបានការគាំទ្រខ្លាំងពីអ្នកគាំទ្រកាលពីប៉ុន្មានឆ្នាំមុន។ តាមរយៈការចូលវាយមិនដកថយនេះ កែវ រំចង់បានព្យាយាមទាត់ជើងក្រោម ម៉ឺន សុភាបីទៅបួនជើងដែលធ្វើឲ្យសុភាព្យាយាមទប់ ដកថយក្រោយតិចៗ និងចេញកណ្តាប់ដៃសងវិញមួយៗ។ តាមបច្ចេកទេសទឹកទី១ឃើញថា កែវ រំចង់ទំនងជាអាចមានប្រៀបតិចតូច។

ប៉ុន្តែអ្វីគួរឲ្យភ្ញាក់ផ្អើលនោះគឺទឹកទី២ កែវ រំចង់នៅតែរក្សាគោលជំហរចូលវាយដូចទឹកទី១ ប៉ុន្តែបែរ ម៉ឺន សុភាគ្រប់គ្រងស្ថានភាពបានយ៉ាងល្អដោយប្រើកណ្តាប់ដៃវាយផ្ទួនៗលើមុខរបស់កែវ រំចង់បណ្តាលឲ្យដួលផ្តាច់ផ្ងាររហូតលោកអាជ្ញាកណ្ដាល៨ម្តង។ សម្រាប់ការរាប់៨នេះ កែវ រំចង់បង្ហាញកាយវិការហាក់មិនទទួលយកការរាប់របស់អាជ្ញាកណ្ដាលឡើយ។

បន្ទាប់ពីរាប់៨លើកទី១ កែវ រំចង់មិនបានព្យាយាមដកថយ ឬចូលអោបដើម្បីពង្រឹងស្មារតីទេគឺនៅតែសម្រុកចូលវាយប្តូរជាមួយ ម៉ឺន សុភាទាំងកម្រោលចូល ហើយទទួលរង់កណ្ដាប់ដៃផ្ទួនៗសាជាថ្មីបណ្តាលឲ្យដួល ហើយអាជ្ញាកណ្ដាលរាប់៨ជាលើកទី២។ ការរាប់៨លើកនេះ កែវ រំចង់ក៏នៅតែបង្ហាញកាយវិការមិនពេញចិត្តនឹងចំណាត់ការរបស់អាជ្ញាកណ្តាលដដែល។

ក្រោយរាប់៨លើកទី២ ម៉ឺន សុភាបានព្យាយាមវាយកណ្តាប់ដៃផ្ទួនៗទៀត ខណៈកែវ រំចង់បានចូលវាយទាំងបាត់បង់ស្មារតី ហើយដួលមួយលើកជាទីពីរលើក ប៉ុន្តែលោកអាជ្ញាកណ្ដាលនៅតែទុកឱកាសឲ្យបន្តប្រកួត។ ដោយសារស្ថានភាពកាន់តែដុនដាប់ លោកអាជ្ញាកណ្តាលសម្រេចបញ្ឈប់ការប្រកួត និងផ្តល់ជ័យជម្នះដល់ម៉ឺន សុភានៅចំពោះមុខអ្នកទស្សនារាប់ម៉ឺននាក់។

កាលពីប៉ុន្មានខែមុន កែវ រំចង់ធ្លាប់ចាញ់ពិន្ទុម៉ឺន សុភាម្តងហើយសម្រាប់ការប្រកួតដណ្តើមពានគូប៊ូតានៅសង្វៀនបាយ័ន។ ការមកសងសឹកនេះ កែវ រំចង់មិនអាចស្តារមុខមាត់បានទេ ហើយរឹតតែដុនដាបជាងលើកមុនទៀត។

លោកអ្នកយល់ឃើញយ៉ាងណាសម្រាប់បរាជ័យរបស់ កែវ រំចង់លើកនេះ?

វីដេអូ http://youtu.be/gyNL-kiD-xI

អត្ថបទ៖ ជាន ចាន់រ៉ា