ក្ដៅៗ! ភរិយាក្រោយនាយ ហុងដា សង្ស័យត្រូវគេរឹតកសម្លាប់នៅក្នុងខុនដូមួយកន្លែង
- 2017-05-11 07:18:59
- ចំនួនមតិ 0 | ចំនួនចែករំលែក 0
ក្ដៅៗ! ភរិយាក្រោយនាយ ហុងដា សង្ស័យត្រូវគេរឹតកសម្លាប់នៅក្នុងខុនដូមួយកន្លែង
ចន្លោះមិនឃើញ
មានការភ្ញាក់ផ្អើលមួយនៅរសៀលនេះ ក្រោយគេឃើញនារីម្នាក់ស្លាប់ក្នុងខុនដូមួយកន្លែងស្ថិតក្នុងសង្កាត់ដង្កោ ដែលការសង្ស័យជំហានដំបូង នារីរងគ្រោះ គឺជាភរិយាក្រោយរបស់តារាកំប្លែងនាយ ហុងដា។
ស្ត្រីដែលគេសង្ស័យថាជាភរិយាក្រោយរបស់តារាកំប្លែងក្នុងក្រុមកំប្លែងនាយកុយ ត្រូវបានគេប្រទះឃើញ ដេកស្លាប់នៅនឹងជាន់ទី៥របស់ខុនដូ ដោយនៅនឹងក មានស្នាមខ្សែរឹតក ដែលនាំឲ្យគេសន្និដ្ឋានជំហានដំបូងថា គឺករណីនេះ គឺជាករណីឃាតកម្ម។ នេះបើតាមព័ត៌មានដែលបែកធ្លាយលើបណ្ដាញសង្គមរសៀលនេះ។
បន្ថែមពីនេះទៀតផងដែរ ករណីនេះ ត្រូវបានសង្ស័យជាការ ប្លន់សម្លាប់ ទៀតផង ព្រោះតែមានសាក្សីនៅជិតកន្លែងកើតហេតុ បានអះអាងថា កាលពីយប់ប្រហែលម៉ោង១២យប់ មានការឈ្លោះគ្នា លុះម៉ោងប្រមាណជា ១១ ថ្ងៃត្រង់នេះ ស្រាប់តែមានការភ្ញាក់ផ្អើល ថាមានមនុស្សស្លាប់ ព្រោះតែគេបានប្រទះឃើញសាកសពរុំនៅលើពូកផងរ។
យ៉ាងណាក៏ដោយជុំវិញបញ្ហានេះ មិនទាន់មានការអះអាងផ្លូវការនៅឡើយ។ លោក ជួង ជី ហៅ នាយកុយ ដែលជាមេក្រុមកំប្លែងរបស់នាយ ហុងដា បានឆ្លើយប្រាប់ Sabay តាមទូរសព្ទថា លោកមិនទាន់បានដឹងដំណឹងនេះនៅឡើយ។ ដោយឡែកនាយ ក្រិន ជាមិត្តរួមក្រុម ក៏បញ្ជាក់ថា មិនទាន់ទទួលបានព័ត៌មានដូចគ្នា។
វិលមកសាមីខ្លួននាយ ហុងដា វិញ បានឆ្លើយទូរសព្ទជាមួយ Sabay ថា លោកទើបទទួលបានដំណឹងតាមរយៈប្អូនស្រីទូរសព្ទប្រាប់មុននេះដែរ ដោយមិនទាន់ដឹងច្បាស់ថាយ៉ាងណានៅឡើយ ហើយឥឡូវកំពុងឲ្យឪពុកម្ដាយក្មេកទៅមើលនៅកន្លែងកើតហេតុ។ ឯលោក កំពុងនៅលើផ្លូវធ្វើដំណើរមកពីប៉ោយប៉ែត៕
ព័ត៌មានលម្អិត Sabay នឹងរាយការណ៍បន្តបន្ទាប់ទៀត!