បឹងទំនប់ខ្ពបត្របែក ជាទីលម្ហែថ្មីនៅថ្ងៃឈប់សម្រាក

2017-05-15 02:57:19
ចំនួនមតិ 0 | ចំនួនចែករំលែក 0

ចន្លោះមិនឃើញ

បឹងទំនប់ខ្ពបត្របែក មានទីតាំងស្ថិតនៅភូមិអូរសារាយ ឃុំអូរសារាយ ស្រុកត្រាំកក់ ខេត្តតាកែវក្លាយជាទីរមណីយដ្ឋានថ្មីមួយដ៏គួរអោយទាក់ទាញសម្រាប់អ្នកមកកម្សាន្តនៅថ្ងៃឈប់សម្រាកជាពិសេសរាល់ពេលមានពិធីបុណ្យជាតិម្តងៗមានភ្ញៀវមកលេងយ៉ាងកកកុញតាមបណ្ដោយទំនប់ និងលើស្ពានដើម្បីស្រូបយកខ្យល់អាកាស។

ដោយធ្វើដំណើរចេញពីផ្សារអង់តាសោមឆ្ពោះទៅលិចសំដៅទៅផ្សារអង្គ រការរួចបន្តដំណើរទៅមុខទៀតប្រមាណជា១០គីឡូម៉ែត្រ គេនឹងបានឃើញកូនបឹងតូចមួយ ដែលបង្កប់ខ្លួនតាមបណ្តោយជួរភ្នំដ៏ស្រស់ត្រកាល។ បើភ្ញៀវឈរសម្លឹងមើលផ្ទៃទឹកសំដៅទៅខ្នងភ្នំទាំងនោះហាក់បីដូចពួកគេកំពុងបណ្តែតអារម្មណ៏អោយលង់ក្នុងពិភពសុបិនមួយដែលនឹកស្មានមិនដល់។

ជាមួយនឹងខ្យល់ជំនោរបរិសុទ្ធបក់មកត្រសៀកៗពីទិសនិរតីធ្វើអោយភ្ញៀវដែលកំពុងពិសាអាហារនៅតាមតូបឫស្សីប្រក់ស្លឹកត្នោតតម្រៀបគ្នាជាជួរៗប្របតាមមាត់ទំនប់រឹតតែមានអារម្មណ៍ស្រស់ថ្លាបំបាត់អស់នូវទុក្ខកង្វល់ទាំងពួង។

យុវសិស្សម្នាក់ឈ្មោះតារា កំពុងតែឈរបណ្ដែតអារម្មណ៍គយគន់សម្រស់ផ្ទៃទេសភាពសងខាងបឹងបានប្រាប់ Sabay “ពួកខ្ញុំតែងនាំគ្នាមកកម្សាន្តទីនេះរៀងរាល់ល្ងាចជាពិសេសនៅថ្ងៃចុងសប្តាហ៏ព្រោះទីនេះមានខ្យល់អាកាសល្អណាស់” ។

បន្ថែមពីលើសម្តីរបស់តារា កញ្ញាជាម្ចាស់ហាងលក់គ្រឿងក្លែមម្នាក់សុំមិនបញ្ចេញឈ្មោះប្រាប់ថា៖ "ទំនប់ខ្ពបត្របែកនេះមានភ្ញៀវមកលេងរៀងរាល់ថ្ងៃតែនៅថ្ងៃបុណ្យចូលឆ្នាំឬ បុណ្យភ្ជំបិណ្ឌទៀតរិតតែច្រើនធ្វើអោយការលក់នៅហាងរបស់ខ្ញុំកាន់តែដាច់ជាងថ្ងៃធម្មតា"។

បឹងទំនប់ខ្ពបត្របែកនេះមានប្រភពទឹកហូរធ្លាក់មកពីតំបន់ភ្នំដែលធ្វើអោយទីនេះមានទឹករហូតសូម្បីតែនៅរដូវប្រាំងជាហេតុធ្វើអោយភ្ញៀវទាំងជិតទាំងឆ្ងាយចង់មកលេងកម្សាន្តបំបាត់ទុក្ខកង្វល់៕

អត្ថបទ៖ ជិន វេន

រូបថត៖ ទូរសព្ទដៃ