កំពូលតារាសម្ដែងស្រីឥណ្ឌាទាំង១០ មានទ្រព្យសម្បត្តិច្រើនជាងគេក្នុងឆ្នាំ២០១៧

2017-05-17 05:12:46
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីលើកមុន យើងធ្លាប់ដឹងរួចមកហើយពីបណ្ដាតារាសម្ដែងប្រុសល្បីៗរបស់ឥណ្ឌាដែលមានទ្រព្យសម្បត្តិដល់ទៅរាប់រយលានដុល្លារឯណោះ។ ប៉ុន្តែថ្ងៃនេះ បង្វែរអារម្មណ៍មកដឹងពីទ្រព្យសម្បត្តិរបស់តារាៗស្រីឥណ្ឌាវិញម្ដង។ ចាំមើលថាតើមានតារារូបណាខ្លះ ដែលជារាជិនីសម្ដែងមានទ្រព្យសម្បត្តិច្រើនជាងគេ? តោះ! មកដឹងទាំងអស់គ្នា!

១០. Priyanka Chopra ទ្រព្យសម្បត្តិ ៨លានដុល្លារ

តារាសម្ដែង Priyanka Chopra កើតនៅថ្ងៃទី ១៨ខែកក្កដាឆ្នាំ ១៩៨២។ នាងជាតារាសម្ដែងសញ្ជាតិឥណ្ឌា អ្នកចម្រៀង ផលិតករ និង ជាសប្បុរសជនផងដែរ។ តារាម្នាក់នេះចាប់ផ្ដើមអាជីពដោយ ឈ្នះពានបវរកញ្ញាពិភពលោក Miss World កាលពីឆ្នាំ ២០០០។ នាងជាតារាដ៏ល្បីឈ្មោះម្នាក់ក្នុងបូលីវូដ ហើយថ្មីៗនេះនាងក៏បានប្រឡូកចូលក្នុង ហូលីវូដផងដែរដោយសម្ដែងនៅក្នុងរឿងភាគរបស់ស្ថានីយទូរទស្សន៍ ABC គឺរឿង Quantico ហើយថ្មីៗនេះនាងក៏បានចូលរួមសម្ដែងជាមួយ Zac Efron និង The Rock ក្នុងរឿង "Baywatch” ទៀតផង។

៩. Mallika Sherawat ទ្រព្យសម្បត្តិ ១០លានដុល្លារ

Malloka Sherawat កើតនៅថ្ងៃទី២៤ ខែតុលាឆ្នាំ១៩៧៦ ជាតារាសម្ដែងសញ្ជាតិឥណ្ឌានិងធ្លាប់ជាតារាម៉ូដែលផងដែរ។ នាងជាតារាម្នាក់ដែលត្រូវបានគេកត់សម្គាល់ថាជាតារាសិចស៊ី "Sex Symbol” នៅតាមប្រព័ន្ធព័ត៌មានផ្សព្វផ្សាយភាគច្រើននៅប្រទេសឥណ្ឌា។ អ្នកគឺជាតារាម្នាក់ដែលត្រូវគេនិយាយច្រើនពីនាង នៅក្នុងសង្គមភាពយន្តរបស់ឥណ្ឌា មួយវិញទៀតនាងគឺជាតារាម៉ូដែលដ៏ជោគជ័យផងដែរមុននឹង ប្រឡូកចូលវិស័យសម្ដែង។

៨. Karisma Kapoor ទ្រព្យសម្បត្តិ ១២លានដុល្លារ

កើតនៅថ្ងៃទី២៥ ខែឧសភាឆ្នាំ ១៩៧៤ Karisma Kapoor គឺជាតារាសម្ដែងសញ្ជាតិឥណ្ឌាម្នាក់ដែលបង្ហាញខ្លួននៅក្នុងរឿង Bollywood យ៉ាងច្រើន។ ដោយសារតែនាងជាសមាជិករបស់ក្រុមគ្រួសារ Kapoor ជាកូនស្រីរបស់តារាសម្ដែង Randhir Kapoor និង Babita ធ្វើឲ្យនាងជាតារាម្នាក់ដែលមានសម្រស់ស្រស់ស្អាត ព្រោះតែឪពុកម្ដាយរបស់នាងសុទ្ធតែជាតារាដែលមានរូបរាងស្អាតៗ។

៧. Ileana D'Cruz ទ្រព្យសម្បត្តិ ១៤លានដុល្លារ

តារាសម្ដែងសញ្ជាតិឥណ្ឌា Ileana D'Cruz កើតនៅថ្ងៃទី១ខែវិច្ឆិកាឆ្នាំ ១៩៨៧ ដែលដំបូងឡើយបង្ហាញខ្លួននៅប្រភេទរឿង Telugu និង Hindi។ ដោយសារតែប្រជាប្រិយភាព ធ្វើឲ្យនាងបានទទួលបានពានរង្វាន់យ៉ាងច្រើនដូចជា Filmfare Awards ជាច្រើនដងនិង Vogue Beauty Awards ព្រោះតែសម្រស់ដ៏ស្រស់ស្អាតរបស់នាង នៅឆ្នាំ២០១២។

៦. Kajol Devgan ទ្រព្យសម្បត្តិ ១៨លានដុល្លារ

Kajol Devgan កើតនៅថ្ងៃទី ៥ ខែសីហាឆ្នាំ ១៩៧៤ នាងគឺតារាសម្ដែងឥណ្ឌាដែលមានកេរ្តិ៍ឈ្មោះល្បីល្បាញខ្លាំងដោយសារការសម្ដែងនៅក្នុងរឿងប្រភេទ Hindi របស់នាង។ ដោយសារតែប្រជាប្រិយភាព និងការស្រលាញ់ពេញចិត្តរបស់អ្នកគាំទ្ររឿងប្រភេទ Bollywood មានលើនាងយ៉ាងច្រើនលើសលុបដូច្នេះហើយ នាងគឺជាតារាម្នាក់ដែលមានតម្លៃខ្លួនខ្ពស់ដែលអាចស៊ីថ្លៃដល់លានដុល្លារឯណោះសម្រាប់ការថតរឿងមួយរឿងៗ។

៥. Amrita Rao ទ្រព្យសម្បត្តិ ២០លានដុល្លារ

Amrita Rao កើតនៅថ្ងៃទី ១៧ខែមិថុនាឆ្នាំ ១៩៨១ គឺជាតារាសម្ដែងនិងម៉ូដែលសញ្ជាតិឥណ្ឌា។ នាងបានលេខមុខសម្ដែងនៅក្នុងរឿងជាភាសា Hindi របស់ Bollywood និងរឿងជាភាសា Telugu ផងដែរ។ ដោយមានទ្រព្យសម្បត្តិប្រមាណ២០លានដុល្លារ Amrita Rao គឺជាវីរនារីក្នុងវិស័យភាពយន្តឥណ្ឌា។ មិនត្រឹមតែប៉ុណ្ណោះនាងត្រូវបានគេតែងតាំងជា ឯកអគ្គរដ្ឋទូតផ្នែកម៉ូតសំលៀកបំពាក់នៅ Indian bridal fashion week ទៀតផង។

៤. Deepika Padukone ទ្រព្យសម្បត្តិ ២០លានដុល្លារ

Deepika Padukone កើតនៅថ្ងៃទី ៥ ខែមករាឆ្នាំ ១៩៨៦ ជាតារាសម្ដែងឥណ្ឌាម្នាក់ដែលមានរូបសម្រស់ស្រស់ស្អាត និងជាតារាម៉ូដែលផងដែរ។ នាងចាប់ផ្តើមល្បីដោយសារការសម្ដែងរបស់នាងនៅក្នុងរឿង Hindi ដោយបានទទួលពានរង្វាន់ជាច្រើន រាប់បញ្ចូលទាំងពានរង្វាន់ធំ Filmfare Awards ចំនួន ៣ ទៀតផង។ មិនត្រឹមតែប៉ុណ្ណោះនាងបានក្លាយជាតារាឥណ្ឌាដែលត្រូវបានស្វែងរកច្រើនជាងគេលើ Internet កាលពីឆ្នាំ២០០៧ទៀតផង។ ក្រៅពីអាជីពសម្ដែងនាងក៏ជាដៃគូផ្សាយពាណិជ្ជកម្មឲ្យក្រុមហ៊ុនធំៗដូចជា Tissot, Sony Cyber-Shot, Nest Cafe, Vogue 3.Eyewear, Maybelline និង Pepsi ផងដែរ។

៣. Preity Zinta ទ្រព្យសម្បត្តិ ៣០លានដុល្លារ

Preity Zinta កើតនៅថ្ងៃទី៣១ ខែមករាឆ្នាំ ១៩៧៥ ជាតារាសម្ដែងសញ្ជាតិឥណ្ឌាដែលមានសមត្ថភាពខ្លាំង។ នាងបានសម្តែងរឿង Bollywood ដែលនិយាយភាសា Hindi, Telugu, Punjabi និង ភាសាអង់គ្លេសទៀតផង។ នាងគឺតារាម្នាក់ក្នុងចំណោមតារាដែលមានទ្រព្យសម្បត្តិច្រើននៅ Bollywood ដោយមានក្លឹបបាល់ទាត់ផ្ទាល់ខ្លួនឈ្មោះ Kings XI Punjab។ កាលពីឆ្នាំ ២០១៥ នាងបានក្លាយជាគណៈកម្មការក្នុងកម្មវិធីមួយដែលមានឈ្មោះថា Baliye បន្ទាប់ពីនាងធ្វើជាពិធីករក្នុងកម្មវិធីរបស់នាងឈ្មោះ Up Close & Personal with PZ និងធ្លាប់ជាពិធីករក្នុងកម្មវិធី Guinness World Records នៅឆ្នាំ ២០១១ផងដែរ។

២. Ameesha Patel ទ្រព្យសម្បត្តិ ៣០លានដុល្លារ

Ameesha Patel កើតនៅថ្ងៃទី៩ខែមិថុនាឆ្នាំ ១៩៧៦ ជាតារាសម្ដែងឥណ្ឌា និងតារាម៉ូដែលដែលល្បីនិងជោគជ័យខ្លាំងក្នុងវិស័យ Bollywood។ នាងបានចូលរួមសម្ដែងរហូតដល់ចាង ១២៥ រឿងបូលីវូដ។ Ameesha Patel គឺជាតារាស្រីម្នាក់ដែលគេចង់បានបំផុត ក្នុងចំណោមតារាល្បីៗនៅប្រទេសឥណ្ឌា។

១. Aishwarya Rai Bachchan ទ្រព្យសម្បត្តិ ៣៥លានដុល្លារ

តារាសម្ដែង Aishwarya Rau Bachchan កើតនៅថ្ងៃទី១ខែវិច្ឆិកាឆ្នាំ ១៩៧៣ ជាតារាសម្ដែងនិងម៉ូដែលសញ្ជាតិឥណ្ឌា ហើយក៏ធ្លាប់ជាបវរកញ្ញាពិភពលោក Miss World កាលពីឆ្នាំ ១៩៩៤ ផងដែរ។ នាងត្រូវបានគេទទួលស្គាល់ទូទាំងពិភពលោកថាជាតារាម្នាក់ដែលមានភ្នែកស្អាតបំផុត។ ជាមួយនឹងទ្រព្យសម្បត្តិ ៣៥លានដុល្លារ នាងគឺតារាស្រី Bollywood ដែលមានទ្រព្យសម្បត្តិច្រើនបំផុតក្នុងឆ្នាំ ២០១៧នេះ៕

ប្រភព៖ top10reviewof ប្រែសម្រួល៖ ធារ៉ូ