SISTAR បង្ហោះសារចុងក្រោយទៅកាន់ Fan ជុំវិញព័ត៌មានរំសាយក្រុម

2017-05-23 06:29:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមចម្រៀងស្រីកូរ៉េ មួយទៀតហើយដែលប្រកាសពីគម្រោងរំសាយក្រុម គឺ ក្រុមចម្រៀង SISTAR។

ក្រុមនារីមួយនេះ បានពិភាក្សាគ្នាពីការចុះកុងត្រាជាថ្មីជាមួយផលិតកម្ម Starship។ យោងតាមវិបសាយ Allkpop បានលើកយកសម្ដីរបស់ប្រភពច្បាស់ការមួយថា៖ "សមាជិកក្នុងក្រុមបាននិយាយគ្នាពីគម្រោងទៅថ្ងៃខាងមុខជាមួយផលិតកម្ម រីឯខាងផលិតកម្មក៏បានគោរពទៅតាមការសម្រេចចិត្តរបស់សមាជិកដែលប្រឹងប្រែងធ្វើការរយៈពេល ៧ឆ្នាំកន្លងមកដែរ" ។

ទោះបីក្រុមទាំងមូលត្រូវបានរំសាយ តែនៅតែមិនទាន់ច្បាស់ ថាតើស្រីស្អាតទាំង៤ នឹងបន្តកុងត្រារបស់ពួកគេទៀត ឫយ៉ាងណា ស្របពេលដែលសមាជិក ២រូបក្នុងក្រុមគឺ Soyu និង Hyorin នឹងនៅតែជាតារាចម្រៀងដដែល រីឯសមាជិក ២រូបទៀត Dasom និង Bora អាចនឹងដើរលើវិថីជាតារាសម្ដែង។

ជាមួយគ្នានេះដែរ វិបសាយ Koreaboo ក៏បានចេញផ្សាយពី សាមីខ្លួនម្នាក់ៗក្នុងក្រុម ដែលបានបង្ហោះសារពីអារម្មណ៍រៀងៗខ្លួនទៅកាន់អ្នកគាំទ្រ បន្ទាប់ពីបានប្រកាសពីដំណឹងគួរឲ្យសោកស្ដាយមួយនេះ។

Soyu ៖"ខ្ញុំមានអារម្មណ៍សប្បាយចិត្ត ហើយបានធូរចិត្ត ពីព្រោះសមាជិកទាំងអស់ យល់ពីខ្ញុំ ក៏ដូចជាអ្នកគាំទ្រ SISTAR ទាំងអស់ (STAR1)។ ក្រឡេកទៅមើលពេលអតីតកាល ខ្ញុំមានអារម្មណ៍សោកស្ដាយ ដែលមិនបានចំណាយពេលឲ្យបានច្រើនជាមួយអ្នកគាំទ្រពួកយើង ប៉ុន្តែយ៉ាងណាក្ដី បើទោះជាបច្ចុប្បន្ន ខ្ញុំធ្វើអ្វីក៏ដោយ ក៏ខ្ញុំមិនបំភ្លេចក្ដីស្រលាញ់ចំពោះមិត្តរួមក្រុម និងអ្នកគាំទ្ររបស់ខ្ញុំទាំងអស់ដែរ ”។

Dasom ៖“អស់រយៈពេល ៧ឆ្នាំហើយដែល ចាប់តាំងពីពួកយើងបង្ហាញខ្លួនដំបូង ជាក្រុម SISTAR។ ខ្ញុំចង់និយាយថា អរគុណចំពោះអ្នកទាំងអស់គ្នា ដែលបានគាំទ្រពួកយើង រយៈពេលប៉ុន្មានឆ្នាំកន្លងមកនេះ។ ពិតជាមានអារម្មណ៍តឹងតែងណាស់ នៅពេលដែលត្រូវនិយាយថាយើងនឹងរំសាយក្រុម ក្រោយចេញអាល់ប៊ុមនេះ ។ សង្ឃឹមថាអ្នកទាំងអស់ នឹងគាំទ្រពួកយើង ចំពោះស្នាដៃថ្មីៗរៀងៗខ្លួនរបស់សមាជិកម្នាក់ៗ ហើយខ្ញុំនឹងប្រឹងប្រែងឲ្យខ្លាំងជាងមុនទៀត”។

Hyorin៖ "អស់រយៈពេលជាង ៧ឆ្នាំហើយ ចាប់តាំងពី SISTAR ចេញមុខដំបូង ទាំងសមាជិក និងអ្នកគាំទ្រពិតជាមានតម្លៃណាស់។ ដោយឡែកសមាជិកទាំងអស់ បានជ្រើសរើសផ្លូវដើរថ្មី សម្រាប់ជំហានបន្ទាប់ក្នុងជីវិត។ អរគុណអ្នកទាំងអស់គ្នាសម្រាប់ការគាំទ្រកន្លងមក។ យើងនឹងបន្តគាំទ្រលើកទឹកចិត្តគ្នាទៅវិញ ទៅមក ក៏ដូចជាបង្ហាញអ្នកនូវស្នាដៃថ្មីៗរបស់ពួកយើងម្នាក់ៗដដែល។ មិត្តរួមក្រុម និង STAR1 នឹងនៅក្នុងចិត្តខ្ញុំជារៀងរហូត”។

Bora៖ "ពេលវេលាដែល SISTAR បានចំណាយពេលជាមួយ STAR1 ពិតជាមានតម្លៃណាស់ និងរីករាយបំផុត។ ខ្ញុំពិតជាមានអារម្មណ៍ពិបាកចិត្ត ដែលមិនបានពង្រឹងសមត្ថភាពខ្លួនឯងឲ្យបានខ្លាំង នៅរាល់ពេល SISTAR ចេញបទថ្មីម្ដងៗ។ ថ្ងៃខាងមុខ ខ្ញុំនឹងមិនភ្លេចអនុស្សាវរីយ៍ល្អៗ ហើយនឹងរឹងមាំជាបន្ត។ ឥលូវសមាជិកទាំងអស់ នឹងជ្រើសផ្លូវរៀងៗខ្លួន ហើយខ្ញុំនឹងនៅតែលើកទឹកចិត្តពួកគេជានិច្ច។ អរគុណសម្រាប់ ពេលវេលាដ៏រីករាយ និងក្ដីស្រលាញ់ចំពោះ SISTAR និងខ្ញុំផ្ទាល់”។

ដោយឡែកអាល់ប៊ុមថ្មីចុងក្រោយ របស់ SISTAR នឹងចេញនៅទី ២៩ ខែឧសភានេះហើយ។ គួរបញ្ជាក់ថា នេះជាក្រុមនារីកូរ៉េមួយទៀត ហើយដែលត្រូវរំសាយ បន្ទាប់ពីក្រុម 2NE1, Wonder Girls, 4Minutes,Kara និងក្រុមផ្សេងទៀត៕

*ជុំវិញតារាអន្តរជាតិ

*ព័ត៌មានកូរ៉េផ្សេងទៀត

*ហេតុផលនេះតើ! ទើបតារាមុខក្មេងជាងអាយុ Sandara Park អត់មានមិត្តប្រុស

ប្រភព៖ Allkpop | Koreaboo ប្រែសម្រួល៖ យី សុធារី