ជើងខ្លាំង ១៥ ក្រុមខាងគំនិតអាជីវកម្មបែបបច្ចេកវិទ្យា បានទៅវគ្គបន្តក្នុងកម្មវិធី SmartStart

2017-05-23 09:40:52
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធី SmartStart របស់ក្រុមហ៊ុន Smart បានឈានមកដល់វគ្គ Hackaton ហើយដែលមាននិស្សិតជាង ១២០ នាក់ដែលបានចែកជា ៣០ ក្រុមបានចូលរួមដើម្បីធ្វើបទបង្ហាញអំពីគំនិតអាជីវកម្មបែបឌីជីថលរបស់ពួកគេ។

នៅក្នុងវគ្គ Hackaton រយៈពេលពីរថ្ងៃនិស្សិតទាំង ៣០ ក្រុមបានធ្វើការជាក្រុមយ៉ាងក្លៀវក្លា ហើយក្នុងនោះពួកគេក៏មានឱកាសបានបង្ហាត់បង្ហាញពីអ្នកជំនាញនិងក្រុមការងារ Smart ដើម្បីដុសខាត់គំនិតអាជិវកម្មរបស់ពួកគេឲ្យកាន់តែល្អបន្ថែមទៀត។

ជាងនេះទៀត ក្រុមនីមួយៗបានធ្វើតេស្តគំនិតអាជីវកម្មរបស់ពួកគេជាមួយមហាជនផ្សេងៗដើម្បីទទួលបានមតិល្អៗបន្ថែមទៀត ហើយទីបំផុតក្រុមនីមួយៗមានគោលដៅអាជីវកម្មយ៉ាងរឹងមាំមួយ ដើម្បីបង្ហាញទៅគណកម្មការវាយតម្លៃ។

ក្រុមនិស្សិតចូលរួមក្នុងកម្មវិធី SmartStart

គណៈកម្មការវាយតម្លៃបានជ្រើសរើសយក ១៥ ក្រុមប៉ុណ្ណោះសម្រាប់បន្តទៅដំណាក់កាលបន្ទាប់ក្នុងក្នុងកម្មវិធី SmartStart តែទោះជាយ៉ាងណាក្រុមដែលមិនត្រូវបានជ្រើសរើសទៅវគ្គបន្តនៅតែមានស្មារតី និងមិត្តភាពហើយក៏ធ្វើឲ្យពួកគេបានស្គាល់គ្នាកាន់តែជិតស្និទ្ធបន្ថែមទៀត៕

បញ្ជាក់ថា SmartStart គឺជាកម្មវិធីសម្រាប់និស្សិតសាកលវិទ្យាល័យដែលសំដៅជំរុញលើកកម្ពស់ និងផ្តល់ឱកាសឲ្យអ្នកចូលរួមអភិវឌ្ឍគំនិតអាជីវកម្មដែលពាក់ព័ន្ធនឹងវិស័យបច្ចេកវិទ្យា ដើម្បីបើកសក្តានុពលនៃភាពច្នៃប្រឌិត និងផ្តល់ឱកាសឲ្យពួកគេសម្រេចគោលគំនិតអាជីវកម្មតាមរយៈសិក្ខាសាលា និងការបង្ហាត់បង្ហាញផ្ទាល់ពីអ្នកមានបទពិសោធន៍។

ក្រុមដែលឈ្នះចុងក្រោយនឹងទទួលបានការបំពាក់បំប៉នសមត្ថភាពបន្ថែមទៀតក្នុងរយៈពេល ៦ ខែ និងរង្វាន់ទឹកប្រាក់ ៤ ០០០ ដុល្លារ រួមទាំងឱកាសធ្វើដំណើរទស្សនកិច្ចទៅក្រុមហ៊ុនបច្ចេកវិទ្យាធំៗដូចជាក្រុមហ៊ុន Google, Facebook និង Microsoft។

ទស្សនាការធ្វើបទបង្ហាញខ្លីពី SmartStart