PNN ផ្ដួចផ្ដើមយករឿងប្រលោមលោកល្បីៗ មកផលិតជារឿងភាគទូរទស្សន៍

2017-05-25 10:18:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីជាការលើកស្ទួយរឿងប្រលោមលោកខ្មែរ PNN បានផ្តួចផ្តើមនាំយករឿងប្រលោមលោកល្បីៗមកផលិតចេញជារឿងភាគមួយចំនួន ដូចជា រឿង"បំភ្លេចមិនបាន" "មន្តស្នេហ៍លេខា" ជាដើម។

ជាក់ស្តែងរឿង"បំភ្លេចមិនបាន" កំពុងតែចាក់ផ្សាយនៅរៀងរាល់ថ្ងៃព្រហស្បតិ៍ ដល់សៅរ៍ វេលាម៉ោង៨យប់ នៅPNN គឺជាប្រលោមលោកជាប់លេខមួយស្ទួនដែលនិពន្ធដោយលោកស្រី ប៉ាល់ វណ្ណារីរក្ស។

រីឯរឿង "មន្តស្នេហ៍លេខា" កំពុងតែចាក់ផ្សាយនៅពេលថ្មីៗនេះនៅលើកញ្ចក់ទូរទស្សន៍PNN ពីថ្ងៃចន្ទ ដល់ពុធ វេលាម៉ោង៨យប់ ក៏ត្រូវបានផលិតឡើងពីប្រលោមលោកដែលមានអ្នកអានជាង ១លាននាក់ពីគេហទំព័រសប្បាយផងដែរ។ "មន្តសេ្នហ៍លេខា" ជាប្រលោមលោកដែលទទួលបានជោគជ័យខ្លាំង និងជាការតាក់តែងដោយអ្នកនិពន្ធ ប៉ាកាខ្មៅ។

កន្លងមក ស្ថានីយទូរទស្សន៍ PNN ក៏បានសហការជាមួយបណ្តាផលិតកម្មល្បីៗជាច្រើនក្នុងប្រទេសកម្ពុជា ដើម្បីផលិតចេញជាខ្សែភាពយន្តភាគខ្មែរដែលមានគុណភាពល្អ ផងដែរ ចំណែកសាច់រឿងត្រូវបាននិពន្ធឡើងដោយកូនខ្មែរ ដែលមានដូចជា រឿង "ម្ទេសហឹរប៉ះអំបិលប្រៃ" "សង្គ្រាមបេះដូង" "មន្តស្នេហ៍ក្រមុំបាយឆា" និង "កែវភ្នែក" ជាដើម។

អ្នកស្រី ទូច បុប្ផា ប្រធានផ្នែកកម្មវិធីផ្សាយនៃស្ថានីយទូរទស្សន៍ភីអិនអិនបាននិយាយថា៖ "ដោយយើងយល់ឃើញថា វាពិតជាមានសារៈសំខាន់ណាស់ក្នុងការដែលយើង ផលិតភាពយន្តទូរទស្សន៍ក្នុងស្រុក ពីព្រោះវាអាចបង្ហាញនូវទំនៀមទម្លាប់ ជីវភាពរស់នៅ និងអត្តសញ្ញាណរបស់ខ្មែរ។

ប្រធានផ្នែកកម្មវិធីផ្សាយនៃស្ថានីយទូរទស្សន៍ភីអិនអិនបន្តឲ្យដឹងទៀតថា៖"ហើយជាពិសេសខ្មែរយើងក៏មានសាច់រឿងច្រើនក្នុងការយកមកផលិតជារឿងភាគទូរទស្សន៍ តែយើងត្រូវតែធ្វើយ៉ាងម៉េចដើម្បីពង្រឹងគុណភាពនៃការតែងនិពន្ធ និងគុណភាពផលិតឲ្យបានល្អ រួមជាមួយការផ្សព្វផ្សាយ និងរៀបចំកម្មវិធីផ្សាយឲ្យត្រូវទៅតាមតម្រូវការ ទស្សនិកជន នោះយើងជឿជាក់ថា ភាពយន្តខ្មែរទាំងនេះនឹងទទួលការគាំទ្រច្រើនពីទស្សនិកជន"។

PNN នឹងបន្តនាំយកនូវប្រលោមលោកល្អៗជាច្រើនទៀតទាំងស្នាដៃរបស់កវីនិពន្ធជើងចាស់ និងថ្មី ដើម្បីផលិតចេញជារឿងភាគ ក្នុងគោលដៅផ្តល់នូវចំណេះដឹង និងការកំសាន្តដល់អ្នកទស្សនា។ បច្ចុប្បន្នរឿង "មន្តសេ្នហ៍លេខា" កំពុងតែទទួលបានការគាំទ្រខ្លាំងពីសំណាក់ទស្សនិកជន ទាំងអ្នកដែលធ្លាប់បានអានរឿងនេះពីមុនមក និងអ្នកដែលមិនធ្លាប់បានអានក៏អាចមកទស្សនាខ្សែភាពយន្តដ៏ល្អមួយនេះបានដែរ។

"មន្តសេ្នហ៍លេខា" ផ្សាយជូនទស្សនានៅរៀងរាល់ថ្ងៃ ចន្ទ ដល់ពុធ វេលាម៉ោង៨ ដល់៩ យប់នៅលើកញ្ចក់ទូរទស្សន៍PNN។

ទស្សនាឈុតខ្លីរបស់រឿង "មន្តស្នេហ៍លេខា" សូមចុច៖

ដោយ៖ ថា ម៉ាលីដា