ស្ងាត់ៗ ករុណា ពេជ្រ ទិញផ្ទះ២ទៀត ជិតកន្លះលានដុល្លារ

2017-05-31 11:29:40
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ករុណា ពេជ្រ តារាចម្រៀងលេចធ្លោមួយដួងប្រចាំផលិតកម្មថោន ដែលកំពុងតែគៀងគរបានប្រជាប្រិយភាព យ៉ាងច្រើនក្រាស់ក្រែលនោះ ត្រូវបានគេបញ្ចេញថាលោក ទិញផ្ទះ២ល្វែង ក្នុងតម្លៃជាងកន្លះលានដុល្លារ កាលពីពេលថ្មីៗនេះ។

ផ្ទះ២ល្វែងជាប់គ្នាដែល ករុណា ពេជ្រ បានទិញនេះស្ថិតក្នុងគម្រោង ឌី អូលេន ស៊ីធី របស់បុរី ថៃ ឈុនគ្រី នៅភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ ក្នុងតម្លៃជាង ៣០ម៉ឺនដុល្លារ។

ជាមួយគ្នានេះប្រធានគ្រប់គ្រងទូទៅ ក្រុមហ៊ុនថៃ ឈុនគ្រី លោក ឈន់ សកល បានឲ្យដឹងថាករុណា ពេជ្រ ពិតជាបានទិញផ្ទះហ្សប់ហៅ ចំនួនពីរ ជាប់គ្នាមែន គឺផ្ទះលេខ S12 និង S13 ។ លោកបានបន្ថែមទៀតថា៖ "ផ្ទះដែល ករុណាពេជ្រទិញ គឺសុទ្ធតែ ជ្រើសរើសគម្រោងបង់ផ្តាច់ទៀតផង។ ក្រុមហ៊ុនក៏មានកម្មវិធីបង់រំលស់ និងបង់ដំណាក់កាល តែលោក ករុណាពេជ្រ គាត់ខ្ជិលសាំញ៉ាំច្រើន ម្យ៉ាងដោយសារក្រុមហ៊ុនមានការផ្តល់ជូនពិសេសសម្រាប់អតិថិជនបង់ផ្តាច់ផងដែរ។"

ជួបជាមួយសាមីខ្លួនផ្ទាល់ ដែលទើបនឹងក្លាយជាប្រធានគ្រប់គ្រងផលិតកម្មថោន បញ្ជាក់មកកាន់ Sabay មុននេះថា ជាការពិត៖ "ដោយសារផ្ទះរបស់ខ្ញុំនៅ ម្តុំនេះស្រាប់ ហើយគម្រោង ឌី អូលេន ស៊ីធី នេះ ក៏មានលក្ខណៈល្អ ម៉ូតស្អាត ជាប់នឹងផ្សារបឹងបៃតង និងជិតផ្សារអ៊ីអនម៉ល២ ទើបខ្ញុំសម្រេចចិត្ត ទិញផ្ទះនោះទុក ខ្ញុំចង់លក់តទៅទៀតក៏មិនខាតដែរព្រោះតំបន់នោះល្អមែនទែន តែប្រហែលជាទុកឲ្យម៉ាក់នៅហើយមើលទៅ និយាយរួម ចង់លក់យកចំណេញក៏បាន ចង់ឲ្យម៉ាក់នៅក៏បាន។"

យ៉ាងណាមិញ តារាចម្រៀងរូបនេះមិនបានអះអាងពីប្រភពចំណូល ក្នុងការមានលទ្ធភាពទិញផ្ទះនេះ ថាបានមកពីញើសឈាមការងារសិល្បៈ ឬបានមកពីណានោះទេ ដោយលោកបានប្រាប់Sabayថា សូមលាក់សិន។

គួរបញ្ជាក់ថា ផ្ទះហ្សប់ហៅ ដែលលោក ករុណាពេជ្រ ទិញនេះ បច្ចុប្បន្នក្រុមហ៊ុនលក់អស់ហើយ នៅសល់តែ២ ទៅ ៣ផ្ទះតែប៉ុណ្ណោះ ទោះបីការសាងសង់ទើបបញ្ចាប់វគ្គធឹមក្រវ៉ាត់ និងសសរក្រោមក៏ដោយ។ ក្រុមហ៊ុនបានប្រាប់ Sabayថា គម្រោងធ្វើនឹងបញ្ចាប់នាពាក់កណ្តាលឆ្នាំ ២០១៨ ឆ្នាំក្រោយនេះ៕

ដោយ៖ ថា ម៉ាលីដា