អគារប៊ូឌីញ "ស" នឹងត្រូវកម្ទេចនៅខែក្រោយនេះ

2017-06-02 02:46:27
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកនាំពាក្យក្រសួងដែនដីបានអះអាងថា គម្រោងរុះរើអគារប៊ូឌីញ "ស" នឹងត្រូវកម្ទេចខែក្រោយនេះ។ គិតរហូតមកដល់ពេលនេះ ពលរដ្ឋប្រមាណព្រមកិច្ចសន្យាលក់បន្ទប់ទៅឲ្យក្រុមហ៊ុន ៩៥.៣២ ភាគរយហើយ នៅសល់ពលរដ្ឋ២៣ គ្រួសារ ឬប្រមាណជា ៤ភាគរយទៀត មិនព្រមចាកចេញ ដោយបន្តទាមទារសំណងខ្ពស់ជាងក្រសួងកំណត់ឲ្យ។

ក្រួសួងដែនដីជឿជាក់ថា ពលរដ្ឋ ២៣គ្រួសារដែលមិនព្រមតម្លៃ១ ៤០០ ដុល្លារក្នុងមួយម៉ែត្រការ៉េ នៅពេលនេះ គឺពួកគេប្រាកដជាព្រមទទួលតម្លៃនេះក្នុងរយៈពេល ដ៏ខ្លីខាងមុខនេះ។ ព្រោះថាតម្លៃ១ ៤០០ដុល្លារ ជាតម្លៃខ្ពស់បំផុត ហើយសមស្របជាមួយនឹងស្ថានភាពអគារប៊ូឌីញ ដែលកំពុងចាស់ទ្រុឌទ្រោមស្រាប់ផងនោះ មិនយូរទេពួកគេនឹងចាកចេញដោយឯកឯង។

បើតាមអ្វីដែលលោក សេង ឡូត អ្នកនាំពាក្យក្រសួងដែនដីបញ្ជាក់ប្រាប់សារព័ត៌មាន Sabay ឲ្យដឹងនៅល្ងាចម្សិលមិញនេះថា ជាគោលការណ៍ច្បាប់ ៧៥ ភាគរយ អគារសហកម្មសិទ្ធ គឺអាចសម្រេចយកជាផ្លូវការបាន ពោល គឺអ្នកទទួលសំណងពីក្រុមហ៊ុនត្រូវតែចាកចេញទាំងស្រុង។ យ៉ាងណាមិញ ក្រសួងដែនដីក៏អំពាវនាវដល់ពលរដ្ឋប៊ូឌីញដែលនៅសល់ថា ក្រសួងមិនអាចដំឡើងតម្លៃសំណងខ្ពស់ជាងនេះបានទេ ហេតុនេះពលរដ្ឋគួរឆ្លៀតរកទីកន្លែងរស់នៅប្រកបដោយសុវត្ថិភាពប្រសើរជាង។

គួររំលឹកថា ក្រុមហ៊ុនជប៉ុន Arakawa វិនិយោគទឹកប្រាក់ប្រមាណ ៨០លានដុល្លារ ក្នុងនោះចំណាយ ២៣លានដុល្លារ ដើម្បីទិញអគារប៊ូឌីញដ៏ចាស់នេះ។ ចំណែកនៅសល់ គឺសម្រាប់គម្រោងសាងសង់អគារថ្មីដែលមានកម្ពស់ ២១ជាន់ ក្នុងនោះ មានទីតាំងចំណត ៣ជាន់ កន្លែងលក់ដូរ ១ជាន់ និងកន្លែងស្នាក់នៅ ៥ជាន់។ បន្ទប់ស្នាក់នៅនីមួយៗ នឹងមានទំហំធំជាងមុន ១០ភាគរយ ហើយចាប់ពីជាន់ទី ៩ឡើងទៅ នឹងផ្ដល់ជាកម្មសិទ្ធិវិនិយោគរបស់ក្រុមហ៊ុន Arakawa៕