សំបុត្រចូលរួម WWDC ថ្លៃស្មើ iPhone 7 ពីរគ្រឿង ចង់ទិញទាល់ពឹងលើសំណាងទៀត

2017-06-05 03:13:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាច្រើនឆ្នាំមកហើយសំបុត្រចូលរួមព្រឹត្តិការណ៍ WWDC របស់ Apple គឺមានដាក់លក់សម្រាប់ Developer ដោយអាចទិញបានដោយងាយស្រួល។ ប៉ុន្តែចាប់តាំងពីប្រជាប្រិយភាពនៃព្រឹត្តិការណ៍មានការកើនឡើង រួមទាំងបញ្ហាទីតាំងផងនោះ ការទិញសំបុត្រចូលរួមមិនមែនជារឿងងាយប៉ុន្មានទេ។

សំបុត្រ WWDC ត្រូវបានលក់អស់គ្មានសល់ជាលើកដំបូងនៅឆ្នាំ ២០០៨ បន្ទាប់មកនៅឆ្នាំ ២០១៣ សំបុត្រចូលរួមត្រូវបានលក់អស់ក្នុងពេលត្រឹម ២ នាទីដំបូង។ ចាប់តាំងពីឆ្នាំ ២០១៤ មក Apple បានប្រព័ន្ធចាប់ឆ្នោតផ្សងសំណាងដើម្បីមានឱកាសទិញសំបុត្រ ហើយក្រុមហ៊ុនបានប្រើប្រព័ន្ធនេះចាប់តាំងពីពេលនោះ។

នៅក្នុងឆ្នាំ ២០១៧ សំបុត្រចូលរួមព្រឹត្តិការណ៍ WWDC ត្រូវបានកំណត់តម្លៃត្រឹម ១ ៥៩៩ ហើយ Apple បានចាប់ផ្ដើមទទួលយកពាក្យចុះឈ្មោះទិញសំបុត្រចាប់ពីថ្ងៃ ២៧ ខែមីនា។ ការចុះឈ្មោះទិញសំបុត្របន្តទទួលយកដល់ថ្ងៃទី ៣១ ខែមីនា ក្រោយមក Apple ក៏ចាប់ផ្ដើមការចាប់ឆ្នោត។ Developer ដែលមានសំណាងឈ្នះបានសំបុត្រ នឹងទទួលបានការផ្ដល់ដំណឹង ហើយក្រុមហ៊ុននឹងកាត់លុយពីក្រេដីតកាតរបស់ពួកគេភ្លាមៗ។

អ្នកចូលរួម WWDC ឆ្នាំនេះក៏ទទួលបានអាវខោវប៊យម៉ាក Levis ដែលរចនាជាពិសេស រួមជាមួយម្ជុលខ្ទាស់ដែលមានជាទង់ជាតិសម្រាប់ប្រទេសនីមួយៗផងដែរ។ បញ្ជាក់ថាព្រឹត្តិការណ៍ WWDC នឹងចាប់ផ្ដើមនៅយប់ម៉ោង ១២ ថ្ងៃចន្ទនេះ (ម៉ោងនៅកម្ពុជា) ដែលរំពឹងថានឹងមានការប្រកាសចេញប្រព័ន្ធប្រតិបត្តិការ iOS, MacOS ជំនាន់ថ្មី រួមនឹងការប្រកាសចេញ Macស៊េរីថ្មីផងដែរ៕

ប្រភព៖ macrumors ប្រែសម្រួល៖ សុខហេង