ពាន Svay Rieng Cup ឆ្នាំ២០១៧ ចាប់ផ្តើមលក់ពាក្យហើយ

2017-06-13 09:37:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានរង្វាន់ស្វាយរៀង ខាប់ លើកទី៣ ឆ្នាំ២០១៧ បានចាប់ផ្តើមលក់ពាក្យសុំចូលរួមប្រកួតកាលពីថ្ងៃទី១១ ខែមិថុនា ដែលអាចរកជាវបាននៅទីស្នាក់ការ សហភាពសហព័ន្ធយុវជនកម្ពុជា ខេត្តស្វាយរៀង ដោយក្នុង១ច្បាប់តម្លៃ៣០០០០រៀល។

ការលក់ពាក្យ និងដាក់ពាក្យសុំចូលរួមប្រកួតនឹងត្រូវផុតកំណត់នៅថ្ងៃទី២ ខែកក្កដា ឆ្នាំ២០១៧។ ការប្រកួតបាល់ទាត់ពានរង្វាន់ស្វាយរៀង ខាប់ ឆ្នាំនេះគឺជាការៀបចំលើកទី៣ហើយ ដោយលើកទី១ និងលើកទី២ ក្រុមបាល់ទាត់ សសយក ក្រុងបាវិត ជាម្ចាស់ជើងឯកទាំង២ឆ្នាំ។ ចំពោះការប្រកួតធ្វើឡើងនៅលើទីលានស្មៅធម្មជាតិ នៃកីឡដ្ឋានខេត្តស្វាយរៀង។

ដើម្បីឲ្យមានការប្រកួតប្រជែងខ្លាំងជាងឆ្នាំមុនៗ បទបញ្ជានៃការប្រកួតត្រូវបានកែប្រែបន្តិច ដោយនៅឆ្នាំនេះអនុញ្ញាតឲ្យនាំយកកីឡាករក្រៅខេត្តចំនួន៣នាក់ ក្នុង១ក្រុមកីឡា ដែលឆ្នាំមុនមិនអនុញ្ញាតឲ្យនាំយកកីឡាករក្រៅខេត្តមកលេងនោះទេលើកលែងតែកីឡាករក្រៅខេត្ត ដែលមានការងារច្បាស់លាស់នៅក្នុងខេត្តស្វាយរៀង អាចចូលរួមប្រកួតបាន។ ចំពោះកីឡាករអាជីព ក្នុងពានរង្វាន់លីគបាល់ទាត់កំពូលកម្ពុជាចាប់ពីឆ្នាំ២០១៥ ដល់បច្ចុប្បន្ន គឺមិនអនុញ្ញាតឲ្យចូលរួមប្រកួតឡើយ។

ពានរង្វាន់ស្វាយរៀងខាប់ ត្រូវបានផ្តួចផ្តើមបង្កើតឡើង នៅឆ្នាំ២០១៥ ដោយសហភាពសហព័ន្ធយុវជនកម្ពុជា ខេត្តស្វាយរៀង ដែលមានឯកឧត្តម ឌី វិជ្ជា ជាប្រធាន។ ដោយទទួលបានការគាំទ្រពីសំណាក់ប្រជាពលរដ្ឋ និងកីឡាករ យ៉ាងច្រើនទើប សហភាពសហព័ន្ធយុវជនកម្ពុជា ខេត្តស្វាយរៀង ជំរុញឲ្យមានការប្រកួតរៀងរាល់ឆ្នាំ ដើម្បីលើកស្ទួយវិស័យកីឡា ក៏ដូចជាជំរុញឲ្យប្រជាពលរដ្ឋ និងយុវជន យកពេលទំនេរ មកលេងកីឡា ដើម្បីជៀសវាងយកពេលវេលាទៅប្រើប្រាស់ឥតប្រយោជន៍។

ជាក់ស្តែងនៅក្នុងវគ្គផ្តាច់ព្រ័ត្រ នៃពានរង្វាន់ស្វាយរៀង ខាប់ លើកទី២ គឺមានការគាំទ្រពីសំណាក់មហាជន និងយុវជនចូលរួមទស្សនាប្រមាណ២០០០នាក់នៅកីឡដ្ឋានស្វាយរៀង ក្រោមវត្តមាន ឯកឧត្តម ម៉ែន វិបុល អភិបាលនៃគណៈអភិបាលខេត្ត និងឯកឧត្តម ឌី វិជ្ជា ប្រធាន សសយក ខេត្ត ជាគណៈអធិបតី។ លើសពីនេះក៏មានតារាចម្រៀងល្បីៗ ចូលរួមសម្តែង និងច្រៀងជូនទស្សនិកជនសម្រាប់ទស្សនាផងដែរ។ ចំណុចដែលមហាជនចាប់អារម្មណ៍លើពានរង្វាន់នេះ ដោយការប្រកួតទាំងអស់ប្រកួតតែថ្ងៃសៅរ៍-អាទិត្យ និងថ្ងៃឈប់សម្រាកប៉ុណ្ណោះ ដើម្បីផ្តល់ឱកាសដល់កីឡាករជាមន្ត្រីរាជការ បុគ្គលិកឯកជន នានាអាចចូលរួមបានច្រើន៕