គម្រោងផ្សារបណ្ដែតទឹក នឹងរចនាលំនាំតាមសម័យបន្ទាយលង្វែក

2017-06-20 03:11:53
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្រោងសាងសង់ផ្សារបណ្ដែតទឹក ដែលល្បីតៗគ្នាថានឹងលេចរូបរាងនៅតំបន់វិហារសួគ៌ ខេត្តកណ្ដាល នឹងយកលំនាំរចនាបថដូចបន្ទាយលង្វែកសម័យបុរាណ។ នេះបើតាម លោកឧកញ៉ា ស្រី ចាន់ថន អគ្គនាយកក្រុមហ៊ុន Sky land។

លោកឧកញ៉ា ស្រី ចាន់ថន បានប្រាប់ Sabay តាមរយៈទូរសព្ទថា គម្រោងផ្សារបណ្ដែតទឹក នឹងសាងសង់ដូចលំនាំបន្ទាយលង្វែកសម័យបុរាណ។ លោកថា ដោយសារតែផ្សារនេះជាផ្សារទឹកដំបូងនៅកម្ពុជា យើងក៏សម្រេចជ្រើសរើសការរចនាម៉ូតបន្ទាយលង្វែកដែលជាម៉ូតខ្មែរ។

លោករំពឹងថា រចនាបទផ្សារបណ្ដែតទឹកដែលយកលំនាំតាមសម័យលង្វែក នឹងទាក់ទាញភ្ញៀវទេសចរឲ្យកម្ពុជាកាន់តែច្រើនបន្ថែមទៀត។

រូបថតយកពីហ្វេសបុកផេក Sky Land

អគ្គនាយកក្រុមហ៊ុនខាងលើ បានឲ្យដឹងថា បច្ចុប្បន្នក្រុមហ៊ុនបានដាក់ផែនការមេនៃការអភិវឌ្ឍផ្សារបណ្ដែតទឹកទៅកាន់ក្រសួងពាក់ព័ន្ធដើម្បីទទួលបានការយល់ព្រមមុននឹងចាប់ផ្ដើមការសាងសង់។ ដោយគម្រោងផ្សារបណ្ដែតទឹកនេះ មានទំហំប្រហែល៥០ហិកតារ ដែលសាងសង់នៅដី និងក្នុងទឹកស្ថិតនៅក្នុងឃុំវិហារសួគ៌ ខេត្តកណ្ដាល។

លោកបន្តថា យើងមានទីតាំងអំណោយផលជាប់នឹងទន្លេមេគង្គដែលកាន់តែងាយស្រួល នៃចរន្តផ្លូវទឹក។ លោកថា ពេលផ្សារនេះត្រូវបានសាងសង់រួចរាល់ វានឹងមិនគ្រាន់តែជាទីផ្សារសម្រាប់កសិផលរបស់ប្រជាពលរដ្ឋនៅជុំវិញតំបន់នេះទេ ប៉ុន្តែវាក៏សម្រាប់គោលដៅទេសចរណ៍ផងដែរ។

លោកបានថ្លែងថា៖ « ពេលនេះយើងកំពុងរង់ចាំកិច្ចប្រជុំជាមួយក្រសួងពាក់ព័ន្ធនានា ពិសេសក្រសួងទេសចរណ៍ដើម្បីស្វែងរកការគាំទ្រ ដោយសារតែផែនការមេនេះនឹងបម្រើតម្រូវការរបស់ភ្ញៀវទេសចរ»។ យ៉ាងណាមិញ ទំហំវិនិយោគលើគម្រោងសាងសង់ផ្សារបណ្ដែតទឹកទាំងមូល ប្រមាណជា ៥លានដុល្លារអាមេរិក។ លោក ស្រី ចាន់ថន បញ្ជាក់៕

អត្ថបទ៖ ស៊ិន សាវ៉េត