អាយុ ១៨ ឆ្នាំក្លាយជាសេដ្ឋី ព្រោះតែ Bitcoin

2017-06-21 03:26:35
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនមួយរូបឈ្មោះ Erik Finman បានភ្នាល់ជាមួយឪពុកម្ដាយរបស់ខ្លួនថាប្រសិនបើគេចូលដល់អាយុ ១៨ ឆ្នាំ ហើយក្លាយជាសេដ្ឋី នោះមិនត្រូវបង្ខំឲ្យខ្លួនទៅរៀនថ្នាក់មហាវិទ្យាល័យឡើយ។ ទីបំផុតយុវជនរូបនេះក៏បានឈ្នះការភ្នាល់ ក្រោយពីបានបណ្ដាក់ទុនលើរូបិយប័ណ្ណ Bitcoin អស់ពេលយ៉ាងយូររួមមក។

បច្ចុប្បន្ន Erik មានចំនួន ៤០៣Bitcoin ដែលមួយ Bitcoin ពេលនេះមានតម្លៃខ្ទង់ ២ ៧០០ ដុល្លារ ។ សរុបទៅ Erik មានទ្រព្យសម្បត្តិ ១,០៩ លានដុល្លារ។ យ៉ាងណាក្ដីតម្លៃ Bitcoin ងាយនឹងប្រែប្រួលណាស់ ហើយវាអាចធ្លាក់ចុះយ៉ាងគំហុក។ អ្នកវិភាគបច្ចេកទេសមួយរូបបានឲ្យដឹងថាតម្លៃ Bitcoin នឹងឡើងដល់ត្រឹម ២ ៨០០ ដុល្លារ ប៉ុណ្ណោះ រួចវានឹងធ្លាក់ចុះវិញ ចំណែកអ្នកវិភាគដទៃទៀតយល់ថាតម្លៃ Bitcoin អាចឡើងដល់ ១ សែនដុល្លារ ក្នុងពេល ១០ ឆ្នាំទៀត។

ដោយឡែក Erik ឯណោះវិញយល់ថា Bitcoin អាចនឹងមានតម្លៃចន្លោះពីរាប់សែនដុល្លារ ដល់ លានដុល្លារ ក្នុងពេលខាងមុខ។ គួរឲ្យដឹងថាយុវជនខាងលើបានបណ្ដាក់ទុនលើ Bitcoin ដំបូងនាខែឧសភា ឆ្នាំ ២០១១ ដោយពេលនោះមួយ Bitcoin តម្លៃ ១ ដុល្លារប៉ុណ្ណោះ។ នៅចុងឆ្នាំ ២០១៣ ពេលមួយ Bitcoin ឡើងដល់ខ្ទង់ ១ ២០០ ដុល្លារ គេក៏បានលក់ Bitcoin ដែលខ្លួនមាន។ ចំពោះ Bitcoin ដែល Erik មានបច្ចុប្បន្ននេះ គេមិនបានឲ្យដឹងថានឹងលក់វាចេញ ឬ បន្តទុកវានោះទេ៕

ចុចអាន៖

ប្រភព៖ CNBC ប្រែសម្រួល៖ សុខហេង