យុគសម័យស្មាតហ្វូនតម្លៃ ១ ពាន់ដុល្លារជិតមកដល់ហើយ

2017-07-01 00:20:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីសប្ដាហ៍មុនវិបសាយ Venture Beat បានចេញផ្សាយដំណឹងថា Galaxy Note 8ដែលគ្រោងប្រកាសនាពេលខាងមុខនឹងមានបំពាក់អេក្រង់រាងកោងទំហំ ៦,៣ អ៊ីញ ប្រភេទ Infinity Display និង RAM ទំហំ 6 GB ជាដើម។ វាជាដំណឹងល្អមួយសម្រាប់អ្នកចង់បានស្មាតហ្វូនកម្លាំងខ្លាំង ប៉ុន្តែដំណឹងអាក្រក់នោះគឺត្រង់តម្លៃ Galaxy Note 8 នេះតែម្ដង។

យោងតាមវិបសាយខាងលើឲ្យដឹងថា Note 8 ដែលលក់នៅទីផ្សារអឺរ៉ុបនឹងមានតម្លៃដល់ ៩៩៩ អឺរ៉ូ។ ចំណែកនៅសហរដ្ឋអាមេរិកទីផ្សារដែលស្មាតហ្វូនមានតម្លៃថោកនោះ អតិថិជនក៏នឹងត្រូវចំណាយដល់ ៩០០ ដុល្លារ ប្រសិនបើចង់បាន Note 8។

រូបរាងគំរូ iPhone 8

ក្រឡេកទៅ Apple ឯណោះវិញ កន្លងមកគេដឹងថាក្រុមហ៊ុននេះអាចរក្សាតម្លៃស្មាតហ្វូនម៉ូដែលថ្មីៗរបស់ខ្លួនឲ្យនៅថេរបានល្អណាស់។ ប៉ុន្តែ Apple បានល្មើសត្រង់ចំណុចនេះដោយឆ្នាំមុនបានដំឡើងតម្លៃ iPhone 7 Plus ថ្លៃជាងមុន ២០ ដុល្លារ។ មិនតែប៉ុណ្ណោះមានប្រភពជាច្រើនបានលើកឡើងដូចៗគ្នាថា iPhone 8 ដែលចេញឆ្នាំនេះអាចនឹងមានតម្លៃដល់ខ្ទង់ ១ ០០០ ដុល្លារ។

ត្បិតថាស្មាតហ្វូនរបស់ក្រុមហ៊ុនលំដាប់កំពូលៗទាំងពីរអាចនឹងឡើងថ្លៃដល់ជិតខ្ទង់១ ពាន់ដុល្លារប៉ុន្តែជឿថានឹងអាចលក់ដាច់បានច្រើនដូចធម្មតា។ បញ្ហាគឺនៅត្រង់តម្រូវការអតិថិជន។ នៅលើទីផ្សារមានស្មាតហ្វូនសមត្ថភាពខ្លាំងដែលមានតម្លៃធូរថ្លៃជាច្រើន។ យ៉ាងណាក្ដីអ្នកប្រើប្រាស់ភាគច្រើនមិនចាប់អារម្មណ៍លើផលិតទាំងនោះឡើយ។

មិនតែប៉ុណ្ណោះដោយសារតែ Samsung និង Apple ជាក្រុមហ៊ុនកំពូលដែលកាន់កាប់ទំហំទីផ្សារស្មាតហ្វូនច្រើនជាងគេ ហេតុនេះក្រុមហ៊ុនទាំងពីរអាចដំឡើងតម្លៃស្មាតហ្វូនរបស់ខ្លួនបានតាមចិត្ត។ ណាមួយអតិថិជនបច្ចុប្បន្នចង់បានផលិតផលតម្លៃថ្លៃច្រើនជាង ដោយមិនខ្វល់ពីសមត្ថភាពពិតរបស់ផលិតផលប៉ុន្មានឡើយ៕

ចុចអាន៖

ប្រភព៖ Zing ប្រែសម្រួល៖ សុខហេង