ចេះ១១ក្បាច់មេគុនកែងរបស់ល្បុក្កតោនេះ ធានាអាចការពារខ្លួនបាន

2017-07-01 00:17:00
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្ពីរក្បាច់គុនបុរាណខ្មែរ«ល្បុក្កតោ»ត្រូវបានសម្ពោធជាផ្លូវការនាព្រឹកថ្ងៃទី២៩ ខែមិថុនា ឆ្នាំ២០១៧នេះនៅទីស្នាក់ការនៃគណៈកម្មាធិការជាតិអូឡាំពិកកម្ពុជា។ ១១ក្បាច់នេះ Sabay បានដកស្រង់ចេញជំពូកទី៦ នៃសៀវភៅគម្ពីរក្បាច់គុនល្បុក្កតោខ្មែរដែលត្រៀមចេញលក់និយាយអំពីមេគុនកែង។

១-កែងរុញស្រប៖ ចលនានេះគឺឃុំជំហរខ្ពស់ ជើងឆ្វេងនៅពីមុខ ហើយយកដៃឆ្វេងរុញកែងពុះត្រង់ទៅមុខ (ស្រប)។ ២-កែងរុញខ្វែង ចលនាឈរដូចគ្នាជើងឆ្វេងទៅមុខ ហើយយកកែងស្ដាំរុញបុកទៅចំហៀងខាងឆ្វេង(ខ្វែង)។ ៣-កែងខោក៖ ចលនាកែងខោកឈរជំហរខ្ពស់ ដាក់កែងដៃទាំងពីរបញ្ឈរពីមុខត្រង់។ ៤-កែងគាស់៖ ចលនានេះត្រូវលើកកែងដៃ ពីក្រោមឡើងលើត្រង់ ដាក់ក្បែរគុម្ពត្រចៀក (ឆ្វេង,ស្ដាំ)

៥-កែងអុកចុះ៖ ចលនានេះត្រូវលើកដៃឡើងលើឲ្យខ្ពស់លាបាតដៃចេញទៅក្រៅ បន្ទាប់មកដាក់កែងដៃអុកចុះ នៅពេលជាមួយគ្នានោះក្ដាប់ដៃភ្លាមឲ្យស្របពេលទៅដល់ចំណុចគោលដៅ។ ៦-កែងបុកទៅក្រោយត្រង់៖ ចលនានេះត្រូវឈរឱនបន្តិច ហើយដាក់ដៃទាំងពីរទៅមុខត្រង់ លាបាតដៃកុំឲ្យប្រឹង នៅពេលអុកកែងទៅក្រោយទើបប្រឹងឲ្យរឹងចម្ងាយ ១០សង់ទីម៉ែត្រពីគោលដៅ។ ៧-កែងគាស់ត្រង់៖ ចលនានេះត្រូវឈរជំហរខ្ពស់ឱនបន្តិច បែរទៅខាងឆ្វេង ទើបយកកែងដៃស្ដាំគាស់ឡើងលើត្រង់ បែរបាតដៃចេញក្រៅ។ ដៃម្ខាងទៀតឃុំបិទ។ ៨-កែងអុកចំហៀង៖ ចលនានេះត្រូវឈរជំហរខ្ពស់លើកកែងដៃឆ្វេងឲ្យស្មើស្មាលាបាតដៃ បន្ទាប់រុញកែងដៃទៅខាងឆ្វេង ហើយផ្អៀងខ្លួនទៅជាមួយ។

៩-កែងសក៖ ចលនានេះត្រូវបត់ដៃឲ្យស្មើស្មា ហើយយកកែងអុកសកទៅក្រោយស្មើស្មា។ ១០-កែងសកពុះ៖ ចលនានេះត្រូវលើកដៃឡើងលើត្រង់ ឲ្យខ្ពស់ជាងក្បាល ហើយបែរខ្លួនមកស្ដាំទើបអុកកែងចុះត្រង់ឲ្យខ្លាំង។ ១១-កែងថ្ពក់៖ ចលនានេះត្រូវវាយកែងចំហៀងពីមុខ។ ជាចលនាវាយកែងថ្ពក់ត្រូវយកម្រាមដៃឆ្វេងថ្ពក់នឹងម្រាមដៃស្ដាំលើកក្រោម។ ម្រាមដៃដែលនៅក្រោម សម្រាប់ទាញយកល្បឿន និងជួយបន្ថែមកម្លាំង។ បន្ទាប់មកបោះជើងស្ដាំទៅមុខទើបធាក់ជើងឆ្វេងលោតទៅមុខ ហើយយកកែងដៃស្ដាំវាយកែងពុះចុះក្រោមត្រង់។