កំពូលអ្នកមានដាច់គេនៅវៀតណាម កើនទ្រព្យរាប់រយលានដុល្លារក្នុងពេល ៣ឆ្នាំ

2017-07-03 03:19:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ឆ្នាំ២០១៤ មានទ្រព្យ ១,៦ប៊ីលានដុល្លារ
ឆ្នាំ២០១៧ កើនទ្រព្យដល់ ២,៤ប៊ីលានដុល្លារ
ប្រភពចំណូលបានពីក្រុមហ៊ុនអចលនទ្រព្យ និងជំនួញជាច្រើនទៀត

នៅក្នុងតំបន់អាស៊ាន មានមហាសេដ្ឋីទឹកប្រាក់ប៊ីលានដុល្លារដល់ទៅជាង ១០០នាក់ ក្នុងប្រទេសចំនួន៦។ ចំនួននេះគឺរាប់តែបុគ្គល និងក្រុមគ្រួសារណាដែលមានទឹកប្រាក់ចាប់ពី ១ប៊ីលានដុល្លារឡើងទៅប៉ុណ្ណោះ។ ចំណែកប្រទេសវៀតណាមវិញ មានមហាសេដ្ឋី ២រូប ហើយលោក Pham Nhat Vuong គឺជាអ្នកមានដាច់គេ ដែលកើនទ្រព្យសម្បត្តិ ៨០០លានដុល្លារ ក្នុងរយៈពេល ៣ឆ្នាំ។

កាលពីឆ្នាំ២០១៤ វៀតណាមបានលេចមុខលើបញ្ជី Forbes លើកដំបូងក្នុងប្រវត្តិសាស្ត្រ តាមរយៈ មហាសេដ្ឋីអចលនទ្រព្យ Pham Nhat Vuong ដែលមានទ្រព្យសម្បត្តិសរុប ១,៦ប៊ីលានដុល្លារ។ យ៉ាងណាក្ដី ទ្រព្យសម្បត្តិរបស់ជើងខ្លាំងខាងជំនួញរូបនេះ បានកើនដល់ ២,៤ប៊ីលានដុល្លារនៅឆ្នាំ២០១៧។

លោក Pham Nhat Vuong មានអាយុ ៤៨ឆ្នាំ មានកូន ៣នាក់ កំពុងរស់នៅទីក្រុងហាណូយ។ ប្រភពទ្រព្យសម្បត្តិដ៏ច្រើនក្រាល់ក្រែលរបស់លោក ទទួលបានមកពីក្រុមហ៊ុនអចលនទ្រព្យ និងជំនួញមួយចំនួនទៀត ដែលធ្វើឲ្យលោកក្លាយជាអ្នកមានដាច់គេនៅវៀតណាម។ ចំពោះចំណាត់ថ្នាក់សកល លោកឈរនៅលេខរៀងទី ៨៦៧ ក្នុងចំណោមមហាសេដ្ឋីទាំងអស់។

លោក Pham Nhat Vuong គឺជាស្ថាបនិក និងជាប្រធានក្រុមហ៊ុន Vingroup ដែលមានក្រុមហ៊ុនបុត្រសម្ព័ន្ធជាច្រើនទៀត។ ក្រុមហ៊ុននេះទទួលបានចំណូលពីការលក់ផ្ទះ ខុនដូរ ហើយបន្ទាប់មកក៏វិនិយោគលើផ្នែកជាច្រើនទៀតដូចជា កន្លែងបោះទំនិញ កសិកម្ម ការអប់រំ និងផ្នែកសុខភាព។

ចំពោះជំនួញលើហាងលក់ទំនិញ Vinmart និង Vinmart+ ពេលនេះកំពុងរីកជាលំដាប់រហូតកើនដល់ជាង ១០០០សាខា និងផ្សារទំនើប ៣១កន្លែងទៀត។ ចំណែកក្រុមហ៊ុន Vinpearl បានដំណើរការសណ្ឋាគារលំដាប់ផ្កាយ៥ ជាច្រើន ដែលមានជាង ៥០០០បន្ទប់ ទូទាំងប្រទេសវៀតណាម។ គម្រោងធំបំផុតគឺ Vinhomes Central Park ដែលមានតម្លៃ ១,៥ប៊ីលានដុល្លារ រំលេចដោយអគារកម្ពស់ ៨១ជាន់ ព្រមទាំងអគារជាច្រើនទៀត។ លោក Pham Nhat Vuong នៅមានជំនួញច្រើនទៀតក្នុងដៃ ដែលធ្វើឲ្យលោកកើនទ្រព្យរាប់រយលានដុល្លាររៀងរាល់ឆ្នាំ ក្នុងនាមជាអ្នកមានបំផុតនៅវៀតណាម។

ប្រទេស ៤ទៀត រួមមានកម្ពុជា ឡាវ ប្រ៊ុយណេ និងមីយ៉ាន់ម៉ា នៅតែគ្មានវត្តមានក្នុងចំណោមមហាសេដ្ឋីទឹកប្រាក់ប៊ីលានដុល្លាររបស់ទស្សនាវដ្ដី Forbes ដដែល។ ចំពោះចំណាត់ថ្នាក់លេខ១ ឆ្នាំ២០១៧ នេះ នៅតែជាប្រធានក្រុមហ៊ុន Microsoft មហាសេដ្ឋី Bill Gates ដោយលោកមានទ្រព្យសម្បត្តិសរុប ៨៦ប៊ីលានដុល្លារ៕

ចុចអានអត្ថបទ៖

ប្រភព៖ Forbes ប្រែសម្រួល៖ គង់ វិសាល