សៀវ ង៉ុយ ខ្ចីលុយគេ 250$ ព្យាបាលកូនស្រីដែលបាក់ជើងពេលគ្រោះថ្នាក់ចរាចរណ៍

2017-07-03 07:43:17
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ល្បីឈ្មោះ សៀវ ងុយ ដាច់ចិត្តខ្ចីលុយគេ 250$ ដើម្បីឲ្យថ្លៃពេទ្យ ក្រោយពេលជួបគ្រោះថ្នាក់ចរាចរណ៍កាលពីថ្ងៃសៅរ៍ ទី១ ខែកក្កដា ឆ្នាំ២០១៧ នៅផ្លូវនរោត្ដម ម្ដុំអង្គភាពប្រឆាំងអំពើពុករលួយ នាពេលកន្លងទៅនេះ។

កីឡាករ សៀវ ង៉ុយ

បើតាមការឲ្យដឹងពីអ្នកស្រី សួង ស៊ីណា ដែលជាប្រពន្ធកីឡាករ សៀវ ង៉ុយ ថាក្រោយពេលជួបគ្រោះថ្នាក់ចរាចរណ៍ភ្លាមៗ អ្នកស្រីសួង ស៊ីណា និងប្ដីរួមទាំងកូនស្រី បានត្រូវគេបញ្ជូនទៅព្យាបាលរបួសបឋមនៅមន្ទីរពេទ្យឯកជនមួយនៅក្បែរផ្សារបឹងកេងកង។ ដោយសាររបួសកូនស្រីធ្ងន់ធ្ងរ អ្នកស្រីក៏សុំចេញពីពេទ្យឯកជននោះ ប៉ុន្តែត្រូវបង់ថ្លៃព្យាបាល 250$ សិនទើបអាចចេញបាន ដូចនេះអ្នកស្រីក៏ខ្ចីលុយមីងដើម្បីបង់ថ្លៃពេទ្យ ហើយនាំប្ដីនិងកូនស្រីចេញតែម្ដង។

អ្នកស្រីបន្តទៀតថា បច្ចុប្បន្ននេះកូនស្រីរបស់ខ្លួន (ង៉ុយ ស្រីណែត) ដែលរបួសបាក់ជើងទាំងសងខាងនិងបែកក្បាលដេរអស់៩ថ្នេរ កំពុងសម្រាកព្យាបាលរបួសនៅមន្ទីរពេទ្យគន្ធបុប្ផា ខណៈប្ដីរបស់ខ្លួនបែកក្បាលដេរអស់ ៤ថ្នេរ និងកំពុងព្យាបាលនៅផ្ទះ។

កីឡាករ សៀវ ង៉ុយ ខៀវ

ប្រពន្ធអ្នកប្រដាល់រូបនេះ ក៏សូមអំពាវនាវដល់សប្បុរសជន និងអ្នកគាំទ្រប្រដាល់ទាំងអស់ ឲ្យជួយឧបត្ថម្ភដល់ក្រុមគ្រួសារអ្នកស្រីផង ព្រោះមិនមានលទ្ធភាពក្នុងការចំណាយដើម្បីព្យាបាលប្ដី និងការចំណាយប្រចាំថ្ងៃពេលមើលថែកូននៅមន្ទីរពេទ្យនោះឡើយ ទម្រាំពេលប្ដីជាពីរបួសនិងបានឡើងប្រកួតរកប្រាក់វិញបាន។

អ្នកប្រដាល់ សៀវ ង៉ុយ ជាម្ចាស់ខ្សែក្រវាត់៣ស្ថាបត្រគឺ ខ្សែក្រវាត់ Nagaword ខ្សែក្រវាត់ សមរភូមិអ្នកប្រយុទ្ធ និងខ្សែក្រវាត់ Skyland។

អត្ថបទ៖ នួន ស៊ីណា