ប្រលងបញ្ចប់ឆ្នាំរួចភ្លាម រត់ទៅធ្វើសំណង់ភ្លែត ព្រោះហេតុផលគួរឲ្យរំជួលចិត្ត

2017-07-06 04:50:33
ចំនួនមតិ 0 | ចំនួនចែករំលែក 0

ចន្លោះមិនឃើញ

បងប្រុសអាយុ ១៩ឆ្នាំប្រលងចប់ភ្លាមទៅធ្វើសំណង់រកប្រាក់
ប្អូនប្រុសអាយុ ៣ឆ្នាំ កើតជំងឺមហារីកឈាម មានជីដូនជរាអ្នកមើលថែ
រឿងរំជួលចិត្តបានធ្វើឲ្យគេអាណិត រៃអង្គាសប្រាក់ចំនួនជាង ៨ម៉ឺនដុល្លារ

សិស្សសាលាជនជាតិចិនម្នាក់ បានធ្វើឲ្យមនុស្សជាច្រើនអាណិតអាសូរខ្លាំង បន្ទាប់ពីដឹងថាយកពេលវេលាសម្រាកពីការសិក្សាតិចតួចទៅធ្វើសំណង់រកប្រាក់ដើម្បីព្យាបាលជំងឺប្អូនប្រុសអាយុទើប ៣ឆ្នាំ។

បងប្រុសអាយុ ១៩ឆ្នាំ រូបនេះប្រែជាសម្រក់ទឹកភ្នែក នៅពេលគេប្រាប់ថា ទឹកប្រាក់សម្រាប់ព្យាបាលជំងឺប្អូនប្រុស ត្រូវគេរៃអង្គាសបានគ្រប់គ្រាន់ហើយដោយសារប្រព័ន្ធផ្សព្វផ្សាយ។

លោក Ma ជាសិស្សថ្នាក់វិទ្យាល័យ រស់នៅក្នុងភូមិក្រីក្រមួយក្នុងខេត្តហ៊ូបេ ។ គ្រួសាររបស់គាត់មានជីវភាពក្រតោកយ៉ាកខ្លាំង ថែមទាំងប្អូនប្រុសមានជំងឺមហារីកឈាមថែមទៀត។

រៀនបណ្ដើរ ស៊ីឈ្នួលឲ្យគេបណ្ដើរ លោកបានប្ដេជ្ញាចិត្តមិនបោះបង់ប្អូនចោល ថែមទាំងប្ដេជ្ញាចិត្តធ្វើជាគ្រូពេទ្យឲ្យបាន ដើម្បីព្យាបាលប្អូន "ខ្ញុំត្រូវតែចូលរៀនសាលាពេទ្យឲ្យបាន ព្រោះតែចង់ព្យាបាលជំងឺប្អូនប្រុសរបស់ខ្ញុំ"។ លោកបញ្ជាក់។

លោកខិតខំរៀនសូត្រខ្លាំងរហូតបញ្ចប់ថ្នាក់វិទ្យាល័យ លោកទទួលបាន ៤៥៦ពិន្ទុ ដែលជាចំនួនដ៏ខ្ពស់មួយ។ អ្វីធ្វើឲ្យគេអាណិតគ្រប់គ្នា គឺនៅមួយថ្ងៃបន្ទាប់ពីប្រលងបញ្ចប់ Ma បានរត់ទៅស៊ីឈ្នួលធ្វើកម្មករសំណង់គេភ្លាម មុនលទ្ធផលប្រលងចេញ។

ចំណែកឪពុកម្ដាយរបស់គាត់ចេញទៅធ្វើការខាងក្រៅផ្ទះបាត់រយៈពេលជាងមួយខែហើយ។ សព្វថ្ងៃស្នាក់នៅជាមួយជីដូនជរាអាយុ ៨០ឆ្នាំ ដើម្បីមើលថែចៅប្រុសកើតជំងឺនេះ។ Ma មានបំណងធ្វើអ្វីៗគ្រប់បែបយ៉ាងឲ្យតែអាចរកចំណូល ដើម្បីទិញថ្នាំឲ្យប្អូន។ ការងាររបស់ Ma ដែលគេប្រទះឃើញរាល់ថ្ងៃមានដូចជា លើកឥដ្ឋ ចូកខ្សាច់នៅការដ្ឋានសំណង់មួយដោយទទួលបានប្រាក់ឈ្នួលប្រមាណ ៦ម៉ឺនរៀលក្នុងមួយថ្ងៃ។

រឿងរ៉ាវដ៏រំជួលចិត្តរបស់ Ma ត្រូវបានផ្សព្វផ្សាយនៅតាមសារព័ត៌មានក្នុងស្រុក ធ្វើឲ្យគេអាណិតពន់ពេក។ អត្ថបទនោះមានអ្នកចូលអានចំនួន ៣,១លានដង ហើយលំហូរជំនួយពីសប្បុរសជនបានកើតមានដូចគេចាក់ទឹក។ ត្រឹមរយៈពេល ២៤ម៉ោង ជំនួយពីសប្បុរសជនប្រមូលបាន ៦០ម៉ឺនយ័ន ឬប្រមាណ ៨,៨ម៉ឺនដុល្លារអាមេរិក។ ចំនួនទឹកប្រាក់នេះ គ្រប់គ្រាន់សម្រាប់ទូទាត់ថ្លៃការវះកាត់ប្ដូរខួរឆ្អឹងខ្នងឲ្យប្អូនបាន។ ឆាប់ៗខាងមុខ លោកនឹងយកប្អូនទៅព្យាបាលហើយ៕