ជ្រូកក្រចកប្រាំ ហាមចិញ្ចឹមដាច់ខាត បើមិនចង់បានបញ្ហា!

2017-07-07 02:15:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ចិញ្ចឹមជ្រូកក្រចកប្រាំ ធ្វើឱ្យខាតបង់ទ្រព្យសម្បត្តិ ឬអាចឈានដល់អាយុជីវិត
ពេលតា កែម កាត់ច្រចកជ្រូកនេះហើយ រំលងមិនបានប៉ុន្មានផង គោគាត់ហើមពោះស្លាប់

ជ្រូកក្រចកប្រាំត្រូវបានចាស់ៗផ្ដាំតកូនតចៅមិនឱ្យចិញ្ចឹមដាច់ខាត ព្រោះបើហ៊ានជម្នះចង់ចិញ្ចឹមនោះ ប្រាកដជានាំរឿងមិនល្អ ឬកើតហេតុភេទអាក្រក់ណាមួយ ដល់ក្រុមគ្រួសារអ្នកចិញ្ចឹមនោះមិនខាន។

បើតាមព្រឹទ្ធាចារ្យ អ៊ួង ស៊ុំ បានប្រាប់ថា ជ្រូកក្រចកប្រាំពិតជាចង្រៃ ឬនាំសំណាងមិនល្អ ដល់ក្រុមគ្រួសារ។ កាលណាប្រជាកសិករយកមកចិញ្ចឹម ប្រាកដជាធ្វើឱ្យខាតបង់ទ្រព្យសម្បត្តិ ឬអាចឈានដល់អាយុជីវិតម្ចាស់ផងក៏មានដែរ។

ព្រឹទ្ធាចារ្យវ័យ ៨១ ឆ្នាំខាងលើ លើកឡើងដូច្នេះ៖ "ពិតមែនចៅ ជ្រូកក្រចកប្រាំហ្នឹងពិតជាចង្រៃមែន អាហ្នឹងវាមានហេតុមានភេទធ្លាប់ឃើញគេហើយណា។ ចិញ្ចឹមអត់ដែលបានសុខទេ វាធ្វើទុក្ខម្ចាស់ខ្លួនហ្នឹង ខាតរបស់ក្នុងផ្ទះខាតទាល់អស់មិនសល់ទេ បើមិនខាតជីវិតមនុស្សក៏ទ្រព្យក្នុងផ្ទះដែរ"។

ជាឧទាហរណ៍ជាក់ស្ដែង លោកតាបញ្ជាក់ថា មានតាម្នាក់ឈ្នោះ កែម បានទៅរកទិញជ្រូកមកចិញ្ចឹម តែចៃដន្យ ពេលចាប់ញាត់ជុចមកដល់ផ្ទះទើបឃើញជ្រូកនោះមានក្រចកប្រាំ។ គាត់ក៏កាត់ចោល១ទៅ ប៉ុន្តែរំលងមិនបានប៉ុន្មានថ្ងៃផង គោដែលគាត់ផ្ញើនឹងគេនៅទន្លេ ក៏ហើមពោះងាប់ៗភ្លាមៗ និងនៅមានករណីជាច្រើនទៀត។

លោកតាបន្ថែមថា ទោះបីជាមានជ្រូកក្រចកប្រាំរត់ចូលមកក្នុងផ្ទះក្ដី ក៏មិនត្រូវចិញ្ចឹមជាដាច់ខាត ហើយត្រូវនាំគ្នាដេញវាចេញ ព្រោះជ្រូកនេះមិនចេះងាយងាប់ផ្ដេសផ្ដាសនោះទេ។ មុននិងក្រោយប្រាកដជាមិនបានសុខ បើនៅតែហ៊ានជម្នះចិញ្ចឹមជ្រូកក្រចកប្រាំនេះ៕