ឈប់ច្រឡំទៀតទៅ បែងចែកឱ្យដាច់រវាងបច្ចេកវិទ្យា VR និង AR

2017-07-10 03:09:52
ចំនួនមតិ 0 | ចំនួនចែករំលែក 0

ចន្លោះមិនឃើញ

មានការយល់ច្រឡំរវាងបច្ចេកវិទ្យា VR និង AR។ ថ្ងៃនេះ Sabay នឹងពន្យល់ឱ្យដាច់ស្រឡះរវាងបច្ចេកវិទ្យាទាំងពីរ។

+អ្វីទៅជាបច្ចេកវិទ្យា VR?

VR បង្កើតពិភពសិប្បនិមិត្ត 3D ថ្មីទាំងស្រុង ធ្វើឲ្យអ្នកមានអារម្មណ៍ថាកំពុងស្ថិតនៅក្នុងពិភពមួយផ្សេងទៀត។ វាគ្រាន់តែជាការក្លែងបន្លំដែលបង្កើតឡើង ហាក់ធ្វើឲ្យយើងមានអារម្មណ៍ថាកំពុងជួបប្រទះនឹងរឿងរ៉ាវណាមួយពិតនៅនឹងភ្នែកតាមរយៈការមើលនិងការស្ដាប់។

ដើម្បីប្រើប្រាស់បច្ចេកវិទ្យា VR ជាធម្មតាត្រូវពាក់នូវឧបករណ៍មួយដែលដូចទៅនឹងវ៉ែនតា។

កាលពីឆ្នាំ ២០១៣ ក្រុមហ៊ុន Google បានបញ្ចេញវ៉ែនតា Google Glass បំពាក់ VR ដែលអាចបង្ហាញព័ត៌មានផ្សេងលើរូបភាពនៅខាងក្រៅ តាមរយៈកញ្ចក់វ៉ែនតាអេឡិចត្រូនិកនោះ។ ដោយសារ Google Glass អាចសម្គាល់ផ្ទៃមុខ, ប្រើសំឡេងដើម្បីថត រូបនិងវីដេអូ ទើបមានការព្រួយបារម្ភនិងមិនពេញចិត្តពីបណ្ដាអ្នកប្រើប្រាស់ជាច្រើននៅអាមេរិក ដោយខ្លាចការសន្ទនាពួកគេនឹងត្រូវលួចថតដោយវ៉ែនតាឆ្លាតវៃនេះ។

វ៉ែនតា Hololens របស់ Microsoft កាលពីឆ្នាំកន្លងទៅ ក៏បំពាក់ដោយបច្ចេកវិទ្យា AR ដូចគ្នា។ Hololens អាចបង្ហាញរូបភាពបន្ថែម លើពិភពពិតខាងក្រៅ និងថែមទាំងអាចឲ្យអ្នកប្រើប្រាស់លេងហ្គេមដែលមានតួអង្គសត្វសិប្បនិមិត្តផុសចេញមកលើពិភពពិតខាងក្រៅ។ យ៉ាងណាមិញ វ៉ែនតា Hololens មិនទាន់ដាក់លក់សម្រាប់អ្នកប្រាស់ទូទៅនៅឡើយទេ ដោយបច្ចុប្បន្នដាក់លក់សម្រាប់តែអ្នកអភិវឌ្ឍកម្មវិធីប៉ុណ្ណោះ។ Hololens មួយគ្រឿងលក់ក្នុងតម្លៃ ៣ ០០០ ដុល្លារ។

VR បង្កើតឡើងដោយឆ្លងកាត់តាមរយៈកូដ VRML (Virtual Reality Modeling Language) ដែលអាចបង្កើតឡើងនូវសំណុំរូបភាព និងប្រភេទនៃអន្តរកម្មណាមួយអាចកើតឡើងសម្រាប់អ្នកប្រើប្រាស់។

+អ្វីទៅជាបច្ចេកវិទ្យា AR

AR ឬ Augmented Reality ជាបច្ចេកវិទ្យាទំនើបមួយដែលធ្វើឲ្យរូបភាពឌីជីថលនិងពិភពពិតច្របាច់បញ្ចូលគ្នាទៅជាពិភពតែមួយ។ បើនិយាយឲ្យស្រួលយល់ បច្ចេកវិទ្យានេះស្រដៀងគ្នាទៅនឹងបច្ចេកវិទ្យាបង្ហាញក្នុងរឿងហូលីវូដបែបវិទ្យាសាស្ត្រជាច្រើន ដូចជា Iron Man ជាដើម ដែលតួអង្គអាចមើលនិងចុចលើព័ត៌មានផុសចេញលើលំហ។

AR ខុសពីពី VR (Virtual Reality) ត្រង់ថា វាប្រើប្រាស់ពិភពពិតមានស្រាប់ខាងក្រៅ ដោយបន្ថែមព័ត៌មានឌីជីថលពីលើ (ព័ត៌មានលើលំហ)។

គ្រប់ App លើគ្រឿងអេឡិចត្រូនិកបំពាក់ AR ត្រូវបង្កើតឡើងក្នុងកម្មវិធី 3D ពិសេសមួយដែលអាចឲ្យអ្នកអភិវឌ្ឍកម្មវិធីកំណត់និងចង Animation ឬព័ត៌មានឌីជីថលផ្សេងៗជាមួយនឹង AR Marker ដើម្បីថែមព័ត៌មានផ្សេងពីលើពិភពពិតខាងក្រៅ។ ដូច្នេះ ឧទាហរណ៍ថា នៅពេលអ្នកប្រើប្រាស់យកទូរសព្ទបំពាក់កម្មវិធី AR ទៅថតអគារផ្សេងនៅពិភពខាងក្រៅ នោះផ្ទាំងព័ត៌មានឌីជីថលដែលបានកំណត់ នឹងបង្ហាញយ៉ាងត្រឹមត្រូវពីលើអាគារនីមួយៗតាមរយៈទូរសព្ទ។

បច្ចេកវិទ្យា AR លើស្មាតហ្វូន ជាទូទៅបញ្ចូល កាមេរ៉ាឌីជីថល, សិនស័រអុបទិក (Optical Sensor), សិនស័រឥតខ្សែ, Global Positioning System (GPS) និងត្រីវិស័យទូរសព្ទ សម្រាប់កំណត់ទីតាំងអ្នកប្រើប្រាស់ ដើម្បីអាចចាប់ទិសដៅបានច្បាស់លាស់ ពេលមុខងារ AR ដំណើរការ។

ជាក់ស្ដែង ហ្គេម Pokemon Go ដែលធ្វើឲ្យពិភពលោកកក្រើកមួយរយៈនេះ ជាប្រភេទហ្គេមបំពាក់បច្ចេកវិទ្យា AR។ អ្នកលេងហ្គេម អាចដើរចាប់សត្វ Pokemon ដោយការបើក GPS និងកាមេរ៉ា ដូច្នេះអ្នកប្រើប្រាស់នឹងឃើញសត្វទាំងនោះផុសចេញនៅពិភពខាងក្រៅ តាមរយៈកាមេរ៉ាទូរសព្ទ។

បច្ចេកវិទ្យា AR នេះក៏ធ្លាប់ត្រូវបានប្រើប្រាស់ក្នុងវិស័យយោធា ដើម្បីបង្វឹកអ្នកបើកយន្តហោះចម្បាំង។ Pilot ត្រូវពាក់មួក ដែលកញ្ចក់របស់វាអាចបង្ហាញផ្ទាំងរូបភាព ធ្វើឲ្យមានអារម្មណ៍ថាដូចកំពុងប្រតិបត្តិការសឹកពិតៗ។

+ភាពខុសគ្នារវាង AR និង VR?

- Augmented Reality (AR): ជាការបង្ហាញចេញនូវលទ្ធផលទៅកាន់អ្នកប្រើប្រាស់ផ្ទាល់នឹងភ្នែក (ពុំមានប្រើឧបករណ៍បិទបាំងអ្វីទេ) ឫកម្មវិធី (App) ដែលបញ្ចូលនូវវត្ថុសិប្បនិម្មិតអ្វីមួយ ទៅកាន់កម្មវត្ថុនោះ តាមរយៈកាមេរ៉ារបស់ស្មាតហ្វូន។ -Virtaul Reality (VR): ជាការបង្ហាញចេញដោយបិទបាំងនូវភ្នែករបស់អ្នកប្រើប្រាស់ទាំងស្រុង (ប្រើឧបករណ៍ជំនួយ) ហើយបង្ហាញពីសភាពថ្មី នៃទិដ្ឋភាពនិងបរិយាកាសក្នុងពិភពមួយផ្សេងទៀត។

បញ្ជាក់ថា បច្ចុប្បន្នក្រុមហ៊ុនដែលជោគជ័យលើវិស័យ VR ធំបំផុត គឺក្រុមហ៊ុន SAMSUNG ដែលផ្អែកតាមរបាយការណ៍ចេញពី SuperData និង Unity កាលពីឆ្នាំ ២០១៦ ក្រុមហ៊ុនយក្សកូរ៉េខាងត្បូងមួយនេះ បានលក់ដាច់ឧបករណ៍ Gear VR ដល់ទៅ ៤,៥ លានគ្រឿងឯណោះ។ ជាការប្រកួតប្រជែងដ៏ខ្លាំងក្លាតាមដោយឧបករណ៍ HTC Vive, Playstation VR និង Daydream View។

ចំណែកឯចំណូលនៃការលក់ឧបករណ៍ VR សរុបនៃក្រុមហ៊ុនទូទាំងពិភពលោក ទទួលបានជាង ១,៨ ពាន់លានដុល្លារអាមេរិក ដែលលក់ដាច់បានជាង ៦,៣ លានគ្រឿង ក្នុងឆ្នាំ ២០១៦។

បន្តចុចអាន៖

ប្រភព៖ Androidpit ប្រែសម្រួល៖ រក្សានិងផានិត្យ