នឹងមានអ្វីកើតឡើង បើជ្រុះបាត់លិខិតឆ្លងដែននៅម៉ាឡេស៊ី?

2017-07-10 08:33:37
ចំនួនមតិ 0 | ចំនួនចែករំលែក 0

ចន្លោះមិនឃើញ

លិខិតឆ្លងដែនម៉ាឡេស៊ី មានឥទ្ធិពលបំផុតទី៤ លើលោក និងអាចធ្វើដំណើរទៅកាន់ ១៥៦ប្រទេសពុំចាំបាច់វីសា
អ្នកបាត់លិខិតឆ្លងដែន ៧២% ដោយសារវង្វេងដៃទុក
បើបាត់លិខិតឆ្លងដែនលើកទីមួយនឹងពិន័យ ៤៦ដុល្លារ

លិខិតឆ្លងដែនរបស់ប្រទេសម៉ាឡេស៊ី បានជាប់ចំណាត់ថ្នាក់ជាលិខិតឆ្លងដែនមានឥទ្ធិពលបំផុតទី ៤ ក្នុងលោកស្មើនឹងប្រទេសជប៉ុន ស្វីស ហូឡង់ បែលហ្សិក លុចហ្សំបួរ អូទ្រីស និងព័រទុយហ្គាល់។ នេះបើតាមការចាត់ថ្នាក់របស់ Global Passport Power Rank 2017។

ក្នុងឆ្នាំ ២០១៧ អ្នកបាត់លិខិតឆ្លងដែនជិត ៧២% អះអាងថា ពួកគេមិនចាំកន្លែងទុក។ នាយកដ្ឋានអន្តោប្រវេសន៍ម៉ាឡេស៊ី មានការធុញទ្រាន់នឹងការឮម្ដងហើយម្ដងទៀតពីពលរដ្ឋចំពោះការដោះសារថា វង្វេងកន្លែងទុកលិខិតឆ្លងដែន រួចមករកមន្ត្រីឲ្យជួយដោះស្រាយ។

អគ្គនាយកដ្ឋានអន្តោប្រវេសន៍លោក Mustafar Ali បានក្រើនរម្លឹកអ្នកកាន់លិខិតឆ្លងដែនទាំងអស់ត្រូវប្រុងប្រយ័ត្នខ្ពស់ និងទទួលខុសត្រូវ។ លិខិតឆ្លងដែនម៉ាឡេស៊ី ស្ថិតក្នុងចំណោមឯកសារដែលចាំបាច់បំផុតក្នុងលោកសម្រាប់ធ្វើដំណើរ ហើយគេអាចធ្វើដំណើរទៅកាន់ ១៥៦ ប្រទេស ដោយមិនត្រូវការទិដ្ឋាការ (វីសា)។

ចំពោះការធ្វើឲ្យបាត់បង់វិញ ច្បាប់នឹងពិន័យជាទឹកប្រាក់ចំនួន ២០០ រីងហ្គីត (រូបិយប័ណ្ណម៉ាឡេស៊ី) ឬប្រមាណ ៤៦ដុល្លារ មុនប្រគល់ថ្មីឲ្យ។ បើបាត់ជាលើកទីពីរនឹងពិន័យ ៥០០ រីងហ្គី ប្រមាណ ១១៦ដុល្លារ និងបាត់លើកទី ៣ ពិន័យ ១ពាន់រីងហ្គីត ឬចំនួន ២៣២ដុល្លារឯណោះ។ ប៉ុន្តែការបាត់បង់ដោយសារចោរលួច ឬគ្រោះថ្នាក់ មិនត្រូវផាកពិន័យឡើយ។

ឯតម្លៃធម្មតាសម្រាប់ធ្វើលិខិតឆ្លងដែន គឺ ៤៦ដុល្លារ មានសុពលភាព ៥ឆ្នាំ តែអាចបញ្ចុះតម្លៃពាក់កណ្ដាលចំពោះពលរដ្ឋអាយុចាប់ពី ៦០ឆ្នាំឡើងទៅ និងក្មេងអាយុក្រោម ១២ឆ្នាំ រួមទាំងនិស្សិតអាយុក្រោម ២១ឆ្នាំដែលចង់ទៅសិក្សានៅក្រៅប្រទេស៕