ខ្សែអាត់វីដេអូទីក្រុងហ៊ីរ៉ូស៊ីម៉ា ដ៏មមាញឹក មុនអាមេរិកទម្លាក់គ្រាប់បែកខ្ទេចរាបជាផេះ

2017-07-11 04:00:19
ចំនួនមតិ 0 | ចំនួនចែករំលែក 0

ចន្លោះមិនឃើញ

វីដេអូថតក្នុងឆ្នាំ ១៩៣៥ មុនទម្លាក់គ្រាប់បែក ១០ឆ្នាំ
វីដេអូសខ្មៅ ថតដោយអ្នករស់នៅទីក្រុងផ្ទាល់
សារមន្ទីរសន្តិភាពហ៊ីរ៉ូស៊ីម៉ា ទើបបញ្ចេញឲ្យសាធារណជនបានឃើញ

កាលប៉ុន្មានថ្ងៃថ្មីៗនេះ សារមន្ទីរសន្តិភាពហ៊ីរ៉ូស៊ីម៉ារបស់ជប៉ុន បានផ្សព្វផ្សាយខ្សែអាត់វីដេអូដ៏កម្របានឃើញស្ដីពីទិដ្ឋភាពទីក្រុងហ៊ីរ៉ូស៊ីម៉ា ក្នុងឆ្នាំ ១៩៣៥ គឺ ១០ឆ្នាំ មុនពេលសហរដ្ឋអាមេរិកទម្លាក់គ្រាប់បែកអាតូមិចកណ្ដាលក្រុង។

វីដេអូខ្លីនេះ ថតដោយអ្នករស់នៅក្នុងទីក្រុងផ្ទាល់ គឺលោក Genjiro Kawasaki និងជាខ្សែអាត់វីដេអូតែមួយគត់ឆ្លុះបញ្ចាំងពីការរស់នៅក្នុងទីក្រុងមុនសង្គ្រាមលោកលើកទី ២។

វីដេអូមានរយៈពេល ៣នាទី និង ៩វិនាទីនេះ ត្រូវបានបុគ្គលិកនៅសារមន្ទីរចាត់ទុកថា ជាទិន្នន័យដ៏មានតម្លៃសម្រាប់បង្ហាញយ៉ាងច្បាស់ ថាតើទីក្រុងហ៊ីរ៉ូស៊ីម៉ា មានទិដ្ឋភាពដូចម្ដេច មុនទម្លាក់គ្រាប់បែក។

ក្នុងវីដេអូសខ្មៅនេះ បង្ហាញអំពីប្រជាជនធ្វើដំណើរទៅមកតាមដងផ្លូវទាំងប្រញាប់ប្រញាល់ដោយថ្មើរជើង ជិះរថយន្តឯកជន រថយន្តក្រុង ជិះទូកជាដើម។ ស្ត្រីភាគច្រើនត្រូវគេមើលឃើញថា ស្លៀកពាក់ឈុតប្រពៃណីគីម៉ូណូ ឯបុរសស្លៀកផ្សេងៗគ្នា។

គួររម្លឹកថា ទីក្រុងហ៊ីរ៉ូស៊ីម៉ា ត្រូវបានសហរដ្ឋអាមេរិកទម្លាក់គ្រាប់បែកលើនៅថ្ងៃទី ៦សីហា ឆ្នាំ ១៩៤៥ សម្លាប់មនុស្សប្រមាណ ១៥ម៉ឺននាក់ និងនៅ ៣ថ្ងៃបន្ទាប់ គឺថ្ងៃទី ៩សីហា អាមេរិកទម្លាក់មួយគ្រាប់ទៀតនៅទីក្រុងណាហ្គាសាគី សម្លាប់មនុស្សប្រមាណ ៥ម៉ឺននាក់ ដោយបង្ខំឲ្យជប៉ុនព្រមចុះចាញ់សង្គ្រាមលោកដោយឥតលក្ខខណ្ឌ៕