មហាសេដ្ឋីក្នុងតំបន់អាស៊ានមានជិត ១០០នាក់ ឯអ្នកមានដាច់គេនៅថៃ

2017-07-12 06:34:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសសិង្ហបុរី មានមហាសេដ្ឋី ២១នាក់ ច្រើនជាងគេនៅអាស៊ាន
មហាសេដ្ឋីថៃ មានទ្រព្យ ១៦,៤ប៊ីលានដុល្លារ ជាអ្នកមានជាងគេ
ប្រទេសកម្ពុជា ឡាវ ប្រ៊ុយណេ និងមីយ៉ាន់ម៉ា គ្មានក្នុងបញ្ជី

ទស្សនាវដ្ដី Forbes របស់សហរដ្ឋអាមេរិក បានបង្ហាញថាមហាសេដ្ឋីទឹកប្រាក់ប៊ីលានដុល្លារនៅតំបន់អាស៊ានមានសរុប ៨៩នាក់ ក្នុងប្រទេស៦។ ចំណែកអ្នកមានដាច់គេក្នុងតំបន់អាស៊ាន គឺក្រុមគ្រួសារលោក Charoen Sirivadhanabhakdi ដែលមានទ្រព្យសម្បត្តិសរុប ១៦,៤ប៊ីលានដុល្លារ។

១. ប្រទេសសិង្ហបុរី (មាន ២១នាក់) បងប្អូន Robert និង Philip Ngគឺជាមហាសេដ្ឋីដែលមានទឹកប្រាក់ច្រើនបំផុតនៅប្រទេសសិង្ហបុរី ក្នុងរង្វង់ទ្រព្យសម្បត្តិ ៩,៤ប៊ីលានដុល្លារ។ ប្រភពទ្រព្យសម្បត្តិដ៏ច្រើនរបស់បងប្អូនទាំងពីរនាក់នេះ គឺទទួលបានមកពីក្រុមហ៊ុនអចលនទ្រព្យ។

២. ប្រទេសថៃ(មាន ២០នាក់)

ក្រុមគ្រួសារលោក Charoen Sirivadhanabhakdi ជាមហាសេដ្ឋីដែលមានទឹកប្រាក់ច្រើនបំផុតនៅប្រទេសថៃ ក្នុងរង្វង់ ទ្រព្យសម្បត្តិ ១៦,៤ប៊ីលានដុល្លារ។ ក្រុមគ្រួសារលោក Charoen Sirivadhanabhakdi កំពុងរស់នៅក្នុងរាជធានីបាងកក ហើយប្រភពទ្រព្យសម្បត្តិរបស់គ្រួសារនេះ បានមកពីក្រុមហ៊ុនភេសជ្ជៈផ្សេងៗ និងក្រុមហ៊ុនអចលនទ្រព្យ។

អ្នកមានដាច់គេនៅថៃ Charoen Sirivadhanabhakdi

**៣. ប្រទេសឥណ្ឌូណេស៊ី (មាន ២០នាក់)**

បងប្អូនR. Budi និង Michael Hartono នៅតែជាមហាសេដ្ឋីដែលមានទឹកប្រាក់ច្រើនបំផុតក្នុងប្រទេសឥណ្ឌូណេស៊ី។ ពួកគេកំពុងរស់នៅក្រុង Kudus ប្រទេសឥណ្ឌូណេស៊ី។ បងប្អូនទាំងពីរនាក់នេះមានទ្រព្យសម្បត្តិសរុប ១០,៣ប៊ីលានដុល្លារ ដែលទទួលបានមកពីវិស័យធនាគារ និងការវិនិយោគថ្នាំជក់។

៤. ប្រទេសហ្វីលីពីន (មាន ១៤នាក់)

លោកHenry Sy និងក្រុមគ្រួសារ នៅតែជាមហាសេដ្ឋីដែលមានទឹកប្រាក់ច្រើនបំផុតនៅប្រទេសហ្វីលីពីន ក្នុងរង្វង់ទ្រព្យសម្បត្តិ ១៤ ប៊ីលានដុល្លារ។ លោក Henry មានអាយុ ៩០ឆ្នាំ មានកូន ៦ នាក់ និងកំពុងរស់នៅទីក្រុងម៉ានីល។ ប្រភពទ្រព្យសម្បត្តិដ៏មហាសាលរបស់លោក និងក្រុមគ្រួសារ ទទួលបានមកពីជំនួញជាច្រើនប្រភេទ។

៥. ប្រទេសម៉ាឡេស៊ី (មាន ១២នាក់)

លោកRobert Kuokនៅតែជាមហាសេដ្ឋីដែលមានទឹកប្រាក់ច្រើនបំផុតនៅប្រទេសម៉ាឡេស៊ី ក្នុងរង្វង់ទ្រព្យសម្បត្តិ ១២,៣ប៊ីលានដុល្លារ។ លោក Robert មានអាយុ ៩១ ឆ្នាំ មានកូន ៨នាក់ និងកំពុងរស់នៅទីក្រុងហុងកុង។ បើទោះបីលោកជាជនជាតិម៉ាឡេស៊ី តែប្រភពទ្រព្យសម្បត្តិដ៏មហាសាលរបស់លោក គឺទទួលបានមកពីជំនួញជាច្រើនប្រភេទនៅទីក្រុងហុងកុង ប្រទេសសិង្ហបុរី និងម៉ាឡេស៊ី។

៦. ប្រទេសវៀតណាម (មាន ២នាក់)

កាលពីឆ្នាំ២០១៤ វៀតណាមបានលេចមុខលើបញ្ជី Forbes លើកដំបូងក្នុងប្រវត្តិសាស្ត្រ តាមរយៈ មហាសេដ្ឋីអចលនទ្រព្យ Pham Nhat Vuong ដែលបច្ចុប្បន្នមានទ្រព្យសរុប ២,៤ប៊ីលានដុល្លារ។ ចំណែកឯឆ្នាំ២០១៧ នេះវិញ ចំនួនមហាសេដ្ឋី កើនឡើងដល់ ២នាក់ហើយ។ ម្នាក់ទៀត ដែលទើបលេខមុខនោះ គឺអ្នកជំនួញស្រី Nguyen Thi Phuong Thao ដែលមានទ្រព្យសរុប ១,២ប៊ីលានដុល្លារ។

លោក Pham Nhat Vuong

លោក Pham Nhat Vuong មានអាយុ ៤៨ឆ្នាំ មានកូន ៣នាក់ កំពុងរស់នៅទីក្រុងហាណូយ។ ប្រភពទ្រព្យសម្បត្តិដ៏ច្រើនក្រាល់ក្រែលរបស់លោក ទទួលបានមកពីក្រុមហ៊ុនអចលនទ្រព្យ និងជំនួញមួយចំនួនទៀត ដែលធ្វើឲ្យលោកក្លាយជាអ្នកមានដាច់គេនៅវៀតណាម។ ចំពោះចំណាត់ថ្នាក់សកល លោកឈរនៅលេខរៀងទី ៨៦៧ ក្នុងចំណោមមហាសេដ្ឋីទាំងអស់។

ចំណែកឯប្រទេស ៤ទៀត រួមមាន កម្ពុជា ឡាវ ប្រ៊ុយណេ និងមីយ៉ាន់ម៉ា នៅតែគ្មានវត្តមានក្នុងចំណោមមហាសេដ្ឋីទឹកប្រាក់ប៊ីលានដុល្លាររបស់ទស្សនាវដ្ដី Forbes ដដែល។ ចំពោះចំណាត់ថ្នាក់លេខ១ ឆ្នាំ២០១៧ នេះ នៅតែជាប្រធានក្រុមហ៊ុន Microsoft មហាសេដ្ឋី Bill Gates ដែលមានទ្រព្យសម្បត្តិសរុបរហូតដល់ទៅ ៨៩,៥ប៊ីលានដុល្លារ៕

ចុចអានអត្ថបទពាក់ព័ន្ធ

ប្រភព៖ Forbes ប្រែសម្រួល៖ គង់ វិសាល