ឯកឧត្ដម ហង់ជួន ណារ៉ុន៖ សិស្សឆ្នើម៧០% មកពីខេត្តប្រឡងជាប់សាលាកំពូលៗនៅភ្នំពេញ

2017-07-12 08:37:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្លែងនៅក្នុងសន្និសីទសារព័ត៌មាន ជុំវិញការប្រឡងបាក់ឌុបឆ្នាំ ២០១៧ នេះឯកឧត្ដម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងថា ៧០% នៃសិស្សដែលអាចប្រឡងចូលរៀននៅសាលាកំពូលក្នុងរាជធានីភ្នំពេញដូចជា សាលាតិចណូជាដើម គឺសុទ្ធតែមកពីជនបទទាំងអស់។

រដ្ឋមន្ត្រីក្រសួងអប់រំ ថ្លែងបែបនេះបន្ទាប់ពីមានការលើកឡើងថា សិស្សនៅជនបទអាចប្រឈមបញ្ហាច្រើន នៅពេលក្រសួងរឹតបន្តឹងការប្រឡងសញ្ញាបត្រទុតិយភូមិ ព្រោះលក្ខខណ្ឌការសិក្សាមានលក្ខណៈខុសគ្នាពីអ្នកទីក្រុង។ ឯកឧត្ដម បានលើកឡើងថា ចំពោះលក្ខខណ្ឌក្នុងការសិក្សានៅទីក្រុង ប្រាកដជាល្អជាង នៅទីជនបទហើយ ព្រោះមានជីវភាពធូរធារ មានសៀវភៅគ្រប់គ្រាន់ ប៉ុន្តែនេះមិនឆ្លុះបញ្ចាំងស្ថានភាពជាក់ស្ដែងទេ។ សិស្សប្រឡងជាប់និទ្ទេស A ភាគច្រើនគឺមកពីជនបទ ដើរទៅរៀននេះហើយ។

មិនត្រឹមប៉ុណ្ណោះ ៧០%នៃសិស្សឆ្នើម ដែលប្រឡងចូលសាលាកំពូលៗដូចជា សាលាតិចណូ សាលាពេទ្យ គឺមកជនបទ ភាគច្រើនសុទ្ធតែដើរទៅរៀន មិនមែនជិះឡានទៅរៀនទេ ហើយសុទ្ធតែប្រឡងជាប់និទ្ទេស A ឬ B។ មូលហេតុនេះ ដោយសារសិស្សនៅជនបទខំប្រឹងរៀនខ្លាំង ជាងអ្នកទីក្រុង មិនមានពេលដើរលេងច្រើន ហើយក៏មិនដឹងដើរទៅណាទៀត មានតែការខំប្រឹងរៀនតែម្យ៉ាង។ ឯកឧត្ដម ហង់ជួន ណារ៉ុន បន្ថែម។

យ៉ាងណាក្ដី នេះមិនមែនមានន័យថា អ្នកនៅរាជធានីភ្នំពេញរៀនខ្សោយនោះទេ បើសិនជាតាំងចិត្តខំរៀនពិតប្រាកដគឺមានលក្ខខណ្ឌល្អជាងអ្នកនៅជនបទ។ ជាក់ស្ដែងកាលពីឆ្នាំទៅសិស្សនៅភ្នំពេញជាប់និទ្ទេស A ប្រមាណជាង ១០០នាក់៕

ចុចអានអត្ថបទពាក់ព័ន្ធ៖

អត្ថបទ៖ វឌ្ឍនៈ