ដោយសារបទ "Gangnam Style" តើជីវិតរបស់ PSY ផ្លាស់ប្ដូរអ្វីខ្លះ?

2017-07-16 02:26:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ឆ្នាំ២០១៧នេះ ជាខួប ៥ឆ្នាំរបស់បទចម្រៀងដែលទទួលបានការគាំទ្រភ្លូកទឹកភ្លូកដី "Gangnam Style” របស់ តារាចម្រៀង PSY ហើយ តែសន្ទុះនៃការគាំទ្រ នៅតែមានមិនចាញ់ឆ្នាំកន្លងមកទេ។

ជារឿងគួរជាទីមោទនៈបំផុត សម្រាប់បទចម្រៀងកូរ៉េ "Gangnam Style” របស់ PSY ដែលនៅតែជាបទចម្រៀងពេញនិយម។ ឈានដល់ចំណុចនេះ Billboard ក៏បានចោទជាសំណួរទៅកាន់ម្ចាស់បទ ថា ហេតុអ្វី បទនេះមានឥទ្ធិពល រហូតបានក្លាយជាបទល្បីទូទាំងពិភពលោក។ បកស្រាយនូវសំណួរ តារាចម្រៀងវ័យ ៤០ឆ្នាំរូបនេះ បានលើកឡើងថា លោកក៏មិនដឹងដូចគ្នាថា ហេតុអ្វីបទនេះ វាពិសេសដល់ម្ល៉ឹង។

ចូលដល់សំណួរបន្ទាប់ Billboard ក៏បានសួរទៀតថា តើបទដ៏ល្បីនេះបានផ្លាស់ប្ដូរ PSY ដូចម្ដេចខ្លះ ជាពិសេសនៅពេលដែលវាក្លាយជាបទពេញនិយមជុំវិញពិភពលោក?

PSY ក៏បាននិយាយថា៖ "មុន និងក្រោយ 'Gangnam Style' ជីវិត និងអាជីពរបស់ខ្ញុំបានផ្លាស់ប្ដូរច្រើន។ បទថ្មីរបស់ខ្ញុំ មិនហក់ខ្លាំងដូចបទ "Gangnam Style” ក៏ពិតមែន ប៉ុន្តែគ្រប់ពេលដែលខ្ញុំចេញវីដេអូបទថ្មី មានមនុស្សជាច្រើនមកពីច្រើនប្រទេស ទស្សនា តាមដាន និងគាំទ្រជានិច្ច”។

កាលពីឆ្នាំ ២០១២ បទ "Gangnam Style” ជាបទចម្រៀងដែលបានបំបែកកំណត់ត្រា មានចំនួនចូលទស្សនាលើ YouTube ច្រើនជាងគេ ហើយអ្វីដែលរឹតតែអស្ចារ្យ វាបានឈរជើងជាវីដេអូបទចម្រៀង កំពូលអស់រយៈ ៥ឆ្នាំមកហើយ។ យ៉ាងណា ថ្មីៗនេះ វាបានធ្លាក់មកលេខរៀងទី២ បន្ទាប់ពីបទ "See You Agian" បានឡើងស្នងតំណែងកំពូលក៏ដោយ ក៏ PSY នៅតែមានមោទនភាព និងទទួលយកលទ្ធផលដោយពេញចិត្ត៕