Taylor Swift សម្ងំពួនក្នុងវ៉ាលីពេលចេញពីផ្ទះ ដើម្បីគេចពីអ្នកកាសែត?

2017-07-18 04:11:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះមានអ្នកសង្ស័យថាកំពូលតារាចម្រៀង Taylor Swift បានពួនសម្ងំក្នុងវ៉ាលីឥវ៉ាន់ពេលចេញទៅក្រៅពីផ្ទះម្តងៗ។ ប៉ុន្មានខែកន្លែងមកនេះ គេសង្កេតឃើញថា Taylor Swift បានបាត់មុខបាត់មាត់ពីព័ត៌មានផ្សេងឲ្យឈឹង។ អ្នកប្រមាញ់ថតរូបជាច្រើនលែងមានឱកាសបានថតរូបតារាស្រីដ៏ល្បីម្នាក់នេះដែលជារឿងដ៏ចម្លែកមួយ។

វ៉ាលីដែលគេសង្ស័យថា Taylor Swift លាក់ខ្លួននៅខាងក្នុង

ហើយថ្មីៗនេះនៅលើបណ្ដាញអ៊ីនធឺណិត មានរូបថតមួយចំនួនដែលគេសង្ស័យថាជាចម្លើយ ទៅនឹងការគេចពីអ្នកប្រមាញ់ថតរូបយ៉ាងល្អ។ វាគឺជាបណ្ដារូបថតបុរស២នាក់លើកវ៉ាលីដ៏ធំមួយចេញពីផ្ទះដែល Taylor កំពុងរស់នៅ។ ពេលនោះមានបណ្តាញសារព័ត៌មានមួយឈ្មោះ Splash News ដែលជាវិបសាយដែលលក់រូបថតរបស់តារាល្បីៗ បានសរសេរកំណត់រូបថតថា៖ "Swift កំពុងតែត្រូវគេជញ្ជូនចេញពីផ្ទះនៅក្នុងវ៉ាលីដ៏ធំមួយ។

តារាចម្រៀង Taylor Swift

បន្ទាប់មក Splash News ក៏ដកសម្ដីនេះមកវិញដោយបាននិយាយថា អ្នកគ្រប់គ្រងរបស់ Taylor Swift បានទូរស័ព្ទមកកាន់ពួកគេ ហើយពួកគេក៏បានដកសម្ដីនោះចេញផងដែរ។

បើយោងទៅតាម Splash News អ្នកប្រមាញ់រូបថតម្នាក់ដែលផ្តល់ព័ត៌មានឲ្យនោះក៏មិនបានដឹងឲ្យប្រាកដដែរថាតើ Taylor នៅក្នុងវ៉ាលីនោះឫអត់? នេះគឺដោយសារតែពាក្យចចាមអារ៉ាមកាលពីខែឧសភាថា Taylor លាក់ខ្លួនក្នុងវ៉ាលីដើម្បីគេចពីអ្នកប្រមាញ់ថតរូបនិងអ្នកគាំទ្ររបស់នាងដែលនៅខាងក្រៅកន្លែងនាងស្នាក់នៅ។

គូសបញ្ជាក់ដែរថាការលាក់ខ្លួននៅក្នុងវ៉ាលីនេះមិនមានជារឿងថ្មីនោះទេ កាលពីខែមិនាតារាចម្រៀង Adele ក៏បានធ្វើរឿងស្រដៀងនេះដែរ ដោយលាក់ខ្លួននៅក្នុងប្រអប់ធំមួយពេលធ្វើដំណើរទៅលើឆាក ដូច្នេះហើយទើបនាងមិនមានការលំបាកដោយការហ៊ុំព័ទ្ធពីអ្នកគាំទ្រដ៏ច្រើនលើសលុប៕