ល្បិចអាថ៌កំបាំងក្នុងការថតកុនទាំង ១១ ដែលយើងនឹកស្មានមិនដល់!

2017-07-18 08:25:26
ចំនួនមតិ 0 | ចំនួនចែករំលែក 0

ចន្លោះមិនឃើញ

សិល្បៈកុនគឺជាពិភពពិសេសមួយដែលអាចឲ្យយើងផ្ដោតនិងលំហែអារម្មណ៍ទៅលើវា ដើម្បីបំភ្លេចបញ្ហាខ្លះៗក្នុងជីវិតរស់នៅប្រចាំថ្ងៃ។ ក៏ប៉ុន្តែដើម្បីបង្កើតពិភពនេះបាន ផលិតកររឿងជាច្រើនបានខិតខំគ្រប់បែបយ៉ាង ព្រមទាំងប្រើល្បិចមួយចំនួនទៀតផង។

ថ្ងៃនេះយើងនឹងមកដឹងពីល្បិចខ្លះៗ ដែលផលិតករទាំងនោះប្រើប្រាស់ក្នុងសាច់រឿងដើម្បីឲ្យកាន់តែមានការចាប់អារម្មណ៍ច្រើន និងមើលទៅដូចជាការពិត៕

តោះ! អីចឹងមកដឹងទាំងអស់គ្នា!

១. ផ្លូវតែងតែសើមជានិច្ចនៅពេលយប់

តើអ្នកធ្លាប់ឆ្ងល់ទេ ហេតុអ្វីឲ្យតែនៅពេលយប់តួអង្គតែងតែបើកបរឡាននៅលើផ្លូវសើម ដូចជាទើបតែភ្លៀងហើយ? នេះដោយសារតែនៅពេលផ្លូវសើមវាមើលទៅស្អាតនិងទំនងនៅក្នុងរឿង ពីព្រោះថតនៅលើផ្លូវសើមពេលយប់អាចអោយរូបភាពកាន់តែច្បាស់ និងជះពន្លឺបានល្អ។

២. វ៉ូងមនុស្សក្លែងក្លាយ

នៅក្នុងរឿងជាច្រើន តួជំនួសជាច្រើនត្រូវបានគេប្រើសម្រាប់វ៉ូងមនុស្ស។ ប៉ុន្ដែនេះសម្រាប់តែរឿងដែលមានដើមទុនច្រើនតែប៉ុណ្ណោះ។ សម្រាប់រឿងធម្មតាៗ ផលិតករបានប្រើវិធីសាស្ត្រមួយគឺថតរូបថតមួយសន្លឹករបស់ក្រុមមនុស្សមួយក្រុមជាមួយនឹងជ្រុងដែលត្រឹមត្រូវ ហើយយកវាទៅបញ្ចូលនៅកន្លែងដែលត្រូវការជាមួយនឹងបច្ចេកវិទ្យាកុំព្យូទ័រ។ ចំពោះវិធីសាស្រ្តមួយទៀតនោះគឺគេប្រើ ម៉ាន់នឺកាំងតែម្ដង ដែលជាឧទាហរណ៍គេធ្លាប់ប្រើក្នុងរឿង "The King's Speech”។

៣. ម្សៅទឹកដោះគោប្រើជាគ្រឿងញៀន

ជាការពិតណាស់ គ្មានអ្នកណាម្នាក់គិតថាគ្រឿងញៀនដែលប្រើប្រាស់ក្នុងភាពយន្តគឺជារបស់ពិតនោះទេ។ មានច្បាប់មួយជាធម្មតាសម្រាប់ហូលីវូដរបស់ដែលគេប្រើគឺ ម្សៅទឹកដោះគោ វីតាមីន ឫស្ករស។

៤. ទឹកស៊ឺរ៉ូធ្វើជាឈាម

គ្មានអ្នកណាម្នាក់ចង់បញ្ចេញឈាមពិតដោយសារតែថតរឿងនោះទេ។ ដូច្នេះហើយគេតែងតែប្រើទឹកស៊ឺរ៉ូឫពណ៌សម្រាប់អាហារធ្វើជាឈាម។ កាលពីសម័យកាលភាពយន្តមានពណ៌សខ្មៅ គេប្រើទឹកសុកុឡាធ្វើជាឈាម។

៥. ឈុតស៊ិចស៊ី

ក្នុងឈុតស៊ិចស៊ីភាគច្រើន ដោយសារតែមិនចង់ធ្វើឲ្យតារាសម្ដែងមានអារម្មណ៍ខ្មាស់ឫមិនប្រក្រតីខ្លាំងពេក គេតែងតែប្រើល្បិចនិងរបស់ជំនួយដូចជា ប្រើខ្នើយនៅចន្លោះតួអង្គទាំងពីរ ឫក៏ប្រើប្រាស់សំលៀកបំពាក់ក្នុងដែលមានពណ៌សាច់ជាដើម។

៦. បារីសុវត្ថិភាព

អ្នកចូលចិត្តទស្សនារឿងហូលីវូដជាច្រើនតែងតែឆ្ងល់ថាហេតុអ្វីបានជាតារាសម្ដែងភាគច្រើនដែលផ្សព្វផ្សាយពីការរស់នៅឲ្យមានសុខភាពល្អ ប៉ុន្តែបែរជាជក់បារីនៅក្នុងរឿងទៅវិញ? ប៉ុន្តែតាមពិតបារីដែលគេប្រើប្រាស់នោះមិនអាចបណ្ដាលឲ្យគ្រោះថ្នាក់ដល់សុខភាពនោះទេ ដោយសារវាមិនមានជាតិនីកូទីន។ ម្យ៉ាងទៀតដើម្បីឈុតមួយឈុតដែលតម្រូវឲ្យតួម្នាក់ជក់បារីឲ្យត្រូវអាចថតច្រើនដង ពេលខ្លះអាចដល់១០ដងឯណោះ ដូច្នេះវាអាចបង្កគ្រោះថ្នាក់ដល់តារាសម្ដែង។

៧. បច្ចេកទេសថតដោយប្រើរបស់តូចៗ

ដើម្បីបញ្ចៀសការចំណាយដ៏ច្រើនលើសលុប ផលិតករខ្លះបានស្វែងរកមធ្យោបាយដើម្បីថតឈុតឆាកផ្ទុះឫកម្ទេចរបស់របរអ្វីមួយ ដោយប្រើរបស់របរតូចៗជំនួសវិញ បន្ទាប់មកយកទៅកែច្នៃតាមកុំព្យូទ័រ។

៨. កញ្ចក់ដែលអាចញ៉ាំបាន

វាកម្រណាស់សម្រាប់រឿងលក្ខណៈវិទ្យាសាស្ត្រឫបាញ់ប្រហារដែលគ្មានឈុតតួអង្គហក់កាត់បង្អួចឫទ្វាកញ្ចក់។ ជាទម្លាប់កញ្ចក់ដែលធ្វើពីស្ករគឺតែងតែត្រូវគេប្រើសម្រាប់ឈុតបែបនេះ។ វាមើលទៅដូចជាកញ្ចក់ពិតអីចឹង ម្យ៉ាងទៀតវាមានសុវត្ថិភាពក្នុងការប្រើប្រាស់ ព្រមទាំងមានរសជាតិឆ្ងាញ់ទៀតផង។

៩. តួអង្គនិយាយគ្នាក្នុងឡាន

ពេលដែលតួអង្គកំពុងនិយាយគ្នានៅក្នុងឡានគឺមើលទៅដូចជាការពិតអីចឹង រហូតដល់ពេលខ្លះអ្នកទស្សនាបារម្ភពីតួសម្ដែងដែលនិយាយគ្នាច្រើនមិនផ្ដោតអារម្មណ៍លើការបើកបរ។ ប៉ុន្តែការពិត ជួនកាលគេប្រើវិធីសាស្រ្តមួយដែលតម្រូវឲ្យអ្នកសម្ដែងចូលទៅក្នុងឡានរួចជជែកគ្នាជាធម្មតាប៉ុន្តែឡាននោះមិនបានធ្វើចលនាទៅណាឡើយ។

១០. ពពកទឹកដោះគោ

ដើម្បីថតឈុតឆាកមួយដែលមានពពកបាំងជិតទីក្រុងមួយជាដើម ផលិតករបានប្រើប្រាស់វិធីសាស្ត្រមួយដោយប្រើម៉ាស៊ីនបង្កើតពពក ក្នុងនោះគេបញ្ចូលថ្នាំពណ៌សឫក៏ម្សៅទឹកដោះគោទៅក្នុងម៉ាស៊ីននោះ។

១១. ប្រើឪឡឹកជាឧបករណ៍ជំនួយបច្ចេកទេសសំឡេង

ដើម្បីបង្កើតឈុតឆាកមួយអមដោយសំឡេងដ៏ល្អ វិស្វករផ្នែកសំឡេងត្រូវតែប្រើល្បិចជាច្រើនប្រភេទ។ ដូចជាការបាញ់កាំភ្លើងច្រើនគ្រាប់ត្រូវបានគេជំនួយដោយប្រើកាំជ្រួច និងសំឡេងស្លាបសត្វហើរត្រូវជំនួសដោយការបើកសៀវភៅ។ ប៉ុន្តែឧបករណ៍ជំនួយមួយដែលអ្នកស្មានមិនដល់នោះគឺផ្លែឪឡឹក។ ផ្លែឪឡឹកត្រូវបានគេប្រើជាសំឡេងពេលបែកក្បាល ដាល់ចំមុខឫពងសត្វនាគញាស់ជាដើម៕

ចុចអានអត្ថបទ៖

ប្រភព៖ Brightside ប្រែសម្រួល៖ ធារ៉ូ