ពានសម្ដេច ហេង សំរិន បង្កើតឆ្នាំនេះមានលក្ខណៈពិសេសដូចលីគអាជីព

2017-07-24 03:43:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានរង្វាន់ សម្ដេច ហេង សំរិន លើកទី១ ឆ្នាំ២០១៧ ត្រូវបានធ្វើការចាប់ពូលកាលពីម្សិលមិញនេះ ដោយមានការរៀបចំពិសេសដូចជាលីគអាជីពយ៉ាងដូច្នេះដែរ។

ពានរង្វាន់នេះគ្រោងដំណើរការប្រកួតចាប់ពីថ្ងៃទី២៩ ខែកក្កដាតទៅរហូតដល់ថ្ងៃទី៨ ខែតុលា ឆ្នាំ២០១៧ នៅទីលានស្តាតចាស់ ដោយមាន ១៨ក្រុមចូលរួម ត្រូវបានបែងចែកជា ៣ពូល។ ក្រុមលេខ១ និងក្រុមលេខ ២នៅតាមពូលនីមួយៗ ព្រមទាំងក្រុមលេខ៣ល្អពីរក្រុម នឹងបានឡើងទៅវគ្គ៨ក្រុមចុងក្រោយ។

ឧត្ដម ថុល នាង

ថ្លែងក្នុងសន្និសីទកាសែតកាលពីម្សិលមិញនេះឯក ឧត្ដម ថុល នាង ប្រធានគ្រប់គ្រងការប្រកួតផ្នែកបច្ចេកទេសបានឲ្យដឹងថា ពានរង្វាន់នេះមានលក្ខណៈពិសេសខុសពីពានរង្វាន់មិនអាជីពដទៃ។ ដូចជាមានក្មេងរើសបាល់ មានឡានសង្គ្រោះបន្ទាន់ មានសន្តិសុខជួយសម្រួលក្នុងការប្រកួតជាដើម។

លោកបន្ថែមថា មួយទៀតពានរង្វាន់មានទិសដៅច្បាស់លាស់ក្នុងការបណ្ដុះស្មារតីយុវជនកម្ពុជា ឲ្យស្រលាញ់កីឡា និងមានបំណងជួយអភិវឌ្ឍន៍វិស័យកីឡាបាល់ទាត់នៅកម្ពុជាទិសដៅឆ្នាំ២០២៣ ដែលកម្ពុជាធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម។ លោករំពឹងថា នាឆ្នាំក្រោយ នឹងអាចបង្វើតពានរង្វាន់នេះម្ដងទៀត ដោយមានក្រុមចូលរួមច្រើនជាងឆ្នាំដំបូងនេះ។

ពានរង្វាន់សម្ដេច ហេង សំរិន លើកទី១ ឆ្នាំ២០១៧ នេះកំណត់មិនឲ្យកីឡាករលេងនៅលីគអាជីពកម្ពុជា ឆ្នាំ២០១៦, ឆ្នាំ២០១៧, កីឡាករបរទេស និងកីឡាករក្រោមអាយុ ២០ឆ្នាំលេងនោះទេ។

សម្រាប់រង្វាន់ក្រុមលេខ ១ទទួលបាន ទឹកប្រាក់ ២៤លានរៀលពាន១ និងមេដាយ លេខ២ទទួលបានប្រាក់រង្វាន់១២លានរៀល ទង់១ និងមេដាយ និងលេខ ៣ទទួលទឹកប្រាក់ ៦លានរៀលមេដាយនិងទង់មួយ។ អ្នករកគ្រាប់បាល់បានច្រើនជាងគេទទួលបានពានមួយ និងថវិកា ៨០ម៉ឺនរៀល អ្នកចាំទីល្អទទួល ៨០ម៉ឺនរៀល និងពានមួយ និងចុងក្រោយក្រុម Fair Play ទទួលបានពានមួយ និងទឹកប្រាក់ ២លានរៀលផងដែរ៕