ហេតុផលអ្វីដែល យ៉ាងគួ និងសៀវឡុងនី ដាច់ចិត្តថតរឿងរួមគ្នាជាថ្មី ក្រោយរៀបការ ៨ឆ្នាំ?

2017-07-24 06:04:47
ចំនួនមតិ 0 | ចំនួនចែករំលែក 0

ចន្លោះមិនឃើញ

គូស្វាមីភរិយាតារាសិង្ហបុរី Christopher Lee និង Fann Wong នឹងចាប់ដៃគ្នាម្ដងទៀតសម្ដែងរឿង បន្ទាប់ពីធ្លាប់បដិសេធថាមិនសម្ដែងរួមគ្នាទេ ក្រោយរៀបការរួច។ តើមានហេតុផលអ្វីពីក្រោយទៅ ដែលបណ្ដាលឲ្យប្ដីប្រពន្ធ ២នាក់នេះសម្រេចទទួលយកថតរួមគ្នាជាថ្មី?

បន្ទាប់ពីរយៈពេល ១២ឆ្នាំ (រឿងភាគ: Always On My Mind) និង ៨ឆ្នាំ (រឿងកុន: The Wedding Game) ដែលពួកគេបានថតរួមគ្នា នេះជាស្នាដៃទីដំបូងបំផុត ដែលប្ដីប្រពន្ធតារាប្រុសស្រីទាំង ២ សម្រេចចាប់ដៃសម្ដែងជាមួយគ្នាជាថ្មី បន្ទាប់ពីរៀបការ មានកូន ១រួចមក។

កាលពីថ្ងៃទី ២០ ខែកក្កដា ក្នុងសន្និសីទកាសែត លោក Lee បាននិយាយថា៖ "ពេលពួកយើងរៀបការហើយថ្មីៗ ពួកយើងមានអារម្មណ៍អៀនខ្មាសពេលត្រូវសម្ដែងឈុតឆាកស្នេហា ព្រោះវាហាក់ដូចជាឆ្លុះបញ្ចាំងពីជីវិតពិត”។

រីឯ Fann Wongក៏បានបន្ថែម៖ "ខ្ញុំធ្លាប់ព្រួយបារម្ភថា ទស្សនិកជនប្រាកដជាមិនអាចបែងចែកឲ្យដាច់រវាង សាច់រឿង និងជីវិតពិតឡើយ ដូចនេះហើយទើបពួកយើងសម្រេចមិនថតជាមួយគ្នាតែម្ដងពេលនោះ”។ ម្យ៉ាងវិញទៀត នាងថែមទាំងបាននិយាយទៀតថា ពេលសម្ដែងជាមួយប្ដី នាងចេះតែផ្ទុះសំណើច ហើយសើចទាល់តែហៀរទឹកភ្នែក ជាហេតុនាំឲ្យមានកំហុសពេលថតច្រើន។

យ៉ាងណាមិញ ពេលនេះគូស្នេហ៍ទាំង ២បានធ្វើឲ្យអ្នកគាំទ្រទាំងអស់ភ្ញាក់ផ្អើល ដោយសារពួកគេបានចាប់ដៃគ្នាសម្ដែងជាថ្មី ក្រោយផ្អាកជាច្រើនឆ្នាំ។ មូលហេតុ គឺដោយសារបច្ចុប្បន្ន ពួកគេបានស្គាល់ចិត្ត ស្គាល់ថ្លើមគ្នាច្បាស់ហើយ។

ដោយឡែក ស្នាដៃជារឿងភាគរបស់ពួកគេ ដែលមានចំណងជើងថា "Doppelganger" គ្រោងនឹងបញ្ចាំងលើ ទូរទស្សន៍សិង្ហបុរី Channel 8 នៅថ្ងៃទី ១៣ ខែមីនា ឆ្នាំក្រោយ។ រីឯរឿងកុនវិញ ជាភាពយន្តចិន មានចំណងជើងថា "Yi Nian” នឹងត្រូវបញ្ចាំងនៅចុងឆ្នាំនេះហើយ៕

ចុចអាន៖

ប្រភព៖ Yahoo | entertainment.toggle ប្រែសម្រួល៖ យី សុធារី