ទឹម រដ្ឋា-ដួង ម៉ានិច ស្លៀករ៉ូបច្នៃចេញសូត្រ និងក្រមាខ្មែរតែតម្លៃវិញមិនធម្មតា (វីដេអូ)

2017-07-27 04:16:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងកម្មវិធីសន្និសីទសារព័ត៌មានលើកទី២ ស្ដីអំពីពិព័រណ៍អាពាហ៍ពិពាហ៍លើកទី៤ មហាស្រពសិល្បៈដណ្ដាំម្ហូបអាហារលើកទី១៨ និងបង្ហាញទម្រង់សំលៀកបំពាក់ប្រពៃណីខ្មែរលើកទី១៧នេះ ទឹម រដ្ឋា និង ដួង ម៉ានិច បានឈរកាច់ឫក កាច់រាងដាក់គ្នាជាមួយសំលៀកបំពាក់ដែលច្នៃចេញសូត្រ និងក្រមា។

បើតាមលោក អិត វាសនា នាយកខ្មែរឌីហ្សាញបានលើកឡើងថា រ៉ូបដែលកញ្ញា ទឹម រដ្ឋា ស្លៀកគឺជារ៉ូបរាត្រីស្រមោលស ច្នៃចេញពីក្រណាត់សូត្រខ្មែរមានតម្លៃ១២០០ ដុល្លារអាមេរិក។ ចំណែកឯរូបរាត្រីស្រមោលស កញ្ញា ដួង ម៉ានិច វិញច្នៃចេញពីក្រមាខ្មែរ តម្លៃ៣០០ ដុល្លារ។

នាយក ខ្មែរឌីហ្សាញរូបនេះបន្តថា៖ “បាទវត្តមាន ទឹម រដ្ឋា និង ដួង ម៉ានិច ឈរកាច់ឫករាងបង្ហាញពុកម៉ែបងប្អូនមកចូលរួមថ្ងៃនេះ គឺក្នុងគោលបំណងជួយលើកស្ទួយកំណត់ហូលផាមួង និងក្រមារបស់ខ្មែរ យើងអាចយកទៅកែច្នៃចេញជាឈុតរាត្រីស្រមោលសបានយ៉ាងស្រស់ស្អាត រ៉ូបទាំងពីរហ្នឹងខ្ញុំប្រើពេលកាត់តែមួយថ្ងៃទេ"។

កម្មវិធីសន្និសីទសារព័ត៌មានលើកទី២នេះដែរ លោក ទេព សិដ្ឋាន់ណា អគ្គនាយករងក្រុមហ៊ុនសិរីមង្គល បានមានប្រសាសន៍ថា កម្មវិធីនេះធ្វើឡើងក្នុងគោលបំណង បង្ហាញម៉ូដសំលៀកបំពាក់អាពាហ៍ពិពាហ៍ខ្មែរក្នុងសម័យហ្វូណន ចេនឡា និងម៉ូដសំលៀកបំពាក់ប្រពៃណីខ្មែរពីមួយជំនាន់ទៅមួយជំនាន់ ព្រមទាំងបង្ហាញមុខម្ហូប និងបង្អែមខ្មែរដែលធ្វើចេញពីផ្លែត្នោត។

“សន្និសីទសារព័ត៌មានថ្ងៃនេះ យើងធ្វើឡើងក្នុងគោលបំណង ចង់បង្ហាញសំលៀកបំពាក់រៀបមង្គលការនៅសម័យហ្វូណន ចេនឡា និងម៉ូដសំលៀកបំពាក់ប្រពៃណីខ្មែរពីមួយជំនាន់ទៅមួយជំនាន់ ឲ្យកូនខ្មែរបានឃើញ ក្រៅពីបង្ហាញម៉ូដសំលៀកបំពាក់ប្រពៃណីខ្មែរយើងក៏មានការបង្ហាញមុខម្ហូបប្រពៃណីខ្មែរដែលផលិតចេញពីផ្លែត្នោតផងដែរ"។ អគ្គនាយករងក្រុមហ៊ុនសិរីមង្គលថ្លែងបញ្ជាក់។

សន្និសីទការសែតព្រឹកមិញនេះដែរមានការអញ្ជើញចូលរួម ពីសំណាក់ ឯកឧត្ដមឧទ្ទេសាចារ្យ ញាណ ភឿន អនុរដ្ឋលេខាធិការក្រសួងធម្មការ និងសាសនា លោក ហ៊ឹម វិបុលផល ប្រធាននាយកដ្ឋានអភិវឌ្ឍន៍វប្បធម៌ និងភ្ញៀវកិត្តិយសជាច្រើនរូបទៀត។ គួរបញ្ជាក់ថា ការតាំងពិព័រណ៍លើកទី៤ មហាស្រពសិល្បៈបណ្ដាំស្លម្ហូបអាហារលើកទី១៨ និងការបង្ហាញទម្រង់ម៉ូដសំលៀកបំពាក់ប្រពៃណីខ្មែរលើកទី១៧ នឹងត្រូវបានធ្វើឡើងនៅថ្ងៃទី ៥-៦ ខែ សីហា ឆ្នាំ២០១៧ ខាងមុខនេះ នៅមជ្ឈមណ្ឌលសន្និបាត និងពិព័រណ៍កោះពេជ្រ។

ទស្សនា វីដេអូ ទឹម រដ្ឋា និង ដួង ម៉ានិច ឈរកាច់ឫក កាច់រាងខាងក្រោមនេះទាំងអស់គ្នា៖