ក្រសួងថៃស្នើរដ្ឋាភិបាល ផ្ដល់ប្រាក់ខែឲ្យពលរដ្ឋក្រីក្រ

2017-07-28 10:07:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងហិរញ្ញវត្ថុថៃ កំពុងធ្វើសំណើផ្ដល់ប្រាក់ខែសុខុមាលភាពឲ្យប្រជាជនក្រីក្រចំនួន ២ ៧៥០បាត ឬប្រមាណ ៨២ដុល្លារ ចំពោះពលរដ្ឋណា រកចំណូលបានទាបជាង ៩០០ដុល្លារក្នុងមួយឆ្នាំ។

ប្រសិនបើសំណើត្រូវរដ្ឋាភិបាលយល់ព្រម ប្រាក់សុខុមាលភាពនេះត្រូវគេរំពឹងថានឹងមានចំនួនសរុបទាំងអស់ ១,២ពាន់លានដុល្លារក្នុងមួយឆ្នាំ ដែលត្រូវផ្ទេរចូលទៅក្នុងគណនីរបស់ពលរដ្ឋក្រីក្រដោយចាប់ផ្ដើមនៅខែតុលាខាងមុខ។

បន្ថែមលើនេះ ពលរដ្ឋដែលចុះឈ្មោះទទួលប្រាក់ខែ ត្រូវតែចូលរួមវគ្គបណ្ដុះបណ្ដាលពង្រឹងជីវភាពខ្លួនពួកគេបន្ថែមទៀត។ នេះបើតាមការបញ្ជាក់របស់អគ្គលេខាធិការហិរញ្ញវត្ថុលោក Somchai Sujjapongse កាលពីថ្ងៃអង្គារកន្លងទៅ។

ពលរដ្ឋក្រីក្រដដែល ក៏នឹងត្រូវក្រុមការងាររដ្ឋាភិបាលចុះមកវាយតម្លៃជីវភាពជារៀងរាល់ខែដែរ ហើយពលរដ្ឋរូបណាអាចរកចំណូលប្រសើរជាងមុន គឺច្រើនជាង ៩០០ដុល្លារហើយ ប្រាក់ខែខាងលើនឹងត្រូវកាត់ផ្ដាច់មកវិញ។

ប្រភពពីក្រសួងបញ្ជាក់ថា ប្រាក់ខែទាំងនោះនឹងសម្រាប់ឲ្យពលរដ្ឋក្រីក្រចាយវាយទៅលើថ្លៃចំណាយជិះរថភ្លើង ជិះរថយន្តក្រុងឆ្លងខេត្ត រថយន្តក្រុងក្នុងក្រុង ថ្លៃប្រើប្រាស់ភ្លើង និងថ្លៃទឹក។ ទោះយ៉ាងណា សំណើនេះកំពុងស្ថិតក្នុងដំណាក់កាលពិចារណានៅឡើយ តែពលរដ្ឋអ្នកមានភាគច្រើនមិនយល់ស្របក្នុងការផ្ដល់ប្រាក់ទទេៗដល់អ្នកក្រនោះឡើយ៕