iPod Nano មានប្រវត្តិដ៏ចម្លែក ក្រោយចេញលក់បាន ១២ ឆ្នាំ
- 2017-08-01 02:50:05
- ចំនួនមតិ 0 | ចំនួនចែករំលែក 0
iPod Nano មានប្រវត្តិដ៏ចម្លែក ក្រោយចេញលក់បាន ១២ ឆ្នាំ
ចន្លោះមិនឃើញ
iPod Nano ជាឧបករណ៍ស្ដាប់ចម្រៀងដ៏ពេញនិយមមួយកាលពី ១២ ឆ្នាំមុន ប៉ុន្តែក្រោយ iPhone លេចចេញវត្តមាន ទីផ្សារលក់ iPod Nano ក៏បានធ្លាក់ចុះយ៉ាងគំហុក រហូតដល់ខែ កក្កដា ឆ្នាំ ២០១៧ ក្រុមហ៊ុន Apple ក៏បានផ្ដាច់ការលក់ឧបករណ៍នេះចោលតែម្ដង។ Sabayសូមបង្ហាញត្រួសៗអំពីដើមកំណើតនិងប្រវត្តិនៃការបង្ហាញខ្លួនរបស់ iPod Nano តាំងពីជំនាន់ដំបូង ដល់ជំនាន់ចុងក្រោយបង្អស់។
ជំនាន់ដំបូងបង្អស់នៃ iPod Nano គឺបង្ហាញខ្លួននៅអំឡុងឆ្នាំ ២០០៥ ដែលកាលនោះលោក Steve Jobs នៅមានវត្តមានក្នុងក្រុមហ៊ុន Apple នៅឡើយ។ ជំនាន់ទី ១ មានពណ៌ ខ្មៅ, ស ដែលមានពណ៌ប្រាក់នៅខ្នងក្រោយ។ រូបរាងបែបសាមញ្ញ ដោយមានប៊ូតុង ៤ គ្រាប់ មាន MENU, ប៊ូតុងទៅមុខនិងក្រោយ, ប៊ូតុង Pause/Start។
កន្លងទៅ ១ ឆ្នាំ Apple បានដាក់បង្ហាញជំនាន់ទី ២ ដោយវិវត្តរូបរាងមានលក្ខណៈកោងសងខាង ហើយជម្រើសពណ៌ស្អាតៗបន្ថែម។ យ៉ាងណាមិញជម្រើសពណ៌ទាំងនេះ អាចឲ្យយើងនឹកឃើញដល់កាល iPhone 5c បង្ហាញខ្លួន ដែលមានពណ៌ស្រស់ៗទាក់ទាញជាខ្លាំង។
ចូលដល់ជំនាន់ទី ៣ នេះ ត្រូវជាឆ្នាំដែល iPhone ដំបូងបង្ហាញខ្លួន ព្រមជាមួយការចាប់ផ្ដើមនៃគេហទំព័រ YouTube ជាហេតុធ្វើឲ្យ Apple បានពង្រីកអេក្រង់ iPod Nano កាន់តែធំឡើង ឡើងដល់ ២ អ៊ីញ ងាយស្រួលដល់ការទស្សនាវីដេអូចម្រៀង។ ពណ៌ ២ ថ្មីបានបន្ថែមរួមមាន ទឹកសមុទ្រស្រាល និងបៃតងស្រាល។
ចូលដល់ឆ្នាំបន្ទាប់ Apple បានប្ដូរយុទ្ធសាស្ត្រកែរូបរាងពីទទឹងធំ មកទទឹងរាងតូច ទ្រវែងវិញ។ អេក្រង់រីកបណ្ដោយ និងមានជម្រើសពណ៌សរុបដល់ ៩ ពណ៌ ហើយឆ្នាំ ២០០៨ នេះ iPod Touch ជំនាន់ទី ១ ក៏បានបង្ហាញខ្លួនដូចគ្នា។
២០០៩ ជាឆ្នាំដែល iPod Nano បានទទួលការបញ្ចូលកាមេរ៉ាមួយគ្រាប់នៅខ្នងក្រោយ ទំហំអេក្រង់រាងពង្រីកធំជាងមុនបន្តិច។ របាយការណ៍ខ្លះបានជឿជាក់ថាតាមពិតទៅកាលនោះ iPod ពិតជាមិនត្រូវការកាមេរ៉ាទេ គ្រាន់ថា Apple ចង់ប្រកួតប្រជែងជាមួយឧបករណ៍ Flip Cams ដែលវាមានកាមេរ៉ាក្រោយមកជាមួយ។
ចូលដល់ជំនាន់ទី ១ ក្រុមហ៊ុន Apple បានផ្លាស់ប្ដូរ iPod Nano ថ្មីទាំងស្រុង ដោយសម្រេចលុបចោលប៊ូតុង ៤ គ្រាប់ ដែលធ្លាប់មានពីមុន មកប្ដូរជាអេក្រង់ Touch Screen ហើយមានរាងតូចទៅវិញ។ ចូលដល់ពេលនោះ មានអ្នកខ្លះច្រើនយល់ច្រឡំថា វាជាឧបករណ៍ចម្លែកដោយមិនអាចសម្គាល់បានថាជា iPod Nano របស់ Apple បានទៀតឡើយ។
បាត់មុខ ៣ ឆ្នាំ Apple បានត្រលប់មកវិញ ដោយបន្តចេញលក់ iPod Nano ទៀត ប៉ុន្តែត្រូវបានបរាជ័យក្រោយមតិភាគច្រើនមានការមិនពេញចិត្តពីរូបរាងប្លែក មិនទំនងរបស់វា ទាំង icon និងកម្មវិធី ក៏ដូចជាប្រព័ន្ធដំណើរការ ហាក់បីមិនស៊ីចង្វាក់គ្នា ជាមួយផលិតផល Apple ដទៃទៀតឡើយ។ មានបន្ថែមនូវគ្រាប់មូលមួយ នៅកណ្ដាល ប៉ុន្តែរក្សាអេក្រង់ Touch Screen ដដែល គ្រាន់តួខ្លួន បែរជាវិលត្រលប់ទៅរក iPod Nano ជំនាន់ចាស់។
ត្រឹមជំនាន់ទី ៧ និងទី ៨ នេះហើយដែល Apple បានផ្ដាច់ការលក់នៅលើគេហទំព័រ Apple Store របស់ខ្លួនព្រមជាមួយ iPod Shuffle។
សរុបជារួម Apple ហាក់បីជាធ្វើមិនបានល្អ ជាមួយឧបករណ៍ស្ដាប់ចម្រៀងដ៏ពេញនិយមមួយនេះឡើយ ក្រោយពេលដែលវត្តមាន iPhone និង iPod Touch ចាប់ផ្ដើមចេញលក់។ ដោយវាមានការផ្លាស់ប្ដូរទៅវិញទៅមក រហូតដល់ជំនាន់ចុងក្រោយបើជាប្លែកខុសគេ ជាកត្តាធ្វើឲ្យតួលេខលក់មានការធ្លាក់ចុះខ្លាំង៕
ទទួលបានព័ត៌មានថ្មីៗ គន្លឹះមានប្រយោជន៍រួមទាំងចំណេះដឹងផ្សេងៗពីបច្ចេកវិទ្យា កុំភ្លេចចុច Like Page Sabay News Technology...
ចុចអានបន្ត ៖