កូនស្រីចៅហ្វាយក្រុងហ្វីលីពីនចោទប៉ូលិសថា បានរៀបចំសម្លាប់គ្រួសារខ្លួន

2017-08-02 03:39:41
ចំនួនមតិ 0 | ចំនួនចែករំលែក 0

ចន្លោះមិនឃើញ

កូនស្រីរបស់ចៅហ្វាយក្រុង Ozamiz ប្រទេសហ្វីលីពីន បានចោទប៉ូលិសកាលពីថ្ងៃអង្គារម្សិលមិញថា បានរៀបគម្រោងសម្លាប់សមាជិកគ្រួសាររបស់ខ្លួន។

នាង Nova Princess ដណ្ដប់ភួយពេលចាប់បញ្ជូនទៅក្រុងម៉ានីល

ការចោទប្រកាន់បែបនេះ គឺធ្វើឡើងបន្ទាប់ពីប៉ូលិសជាច្រើននាក់ បានសម្រុកចូលវាយឆ្មក់ភូមិគ្រឹះរបស់ចៅហ្វាយក្រុង Ozamiz លោក Reynaldo Parojinog កាលព្រលឹមថ្ងៃអាទិត្យដោយសម្លាប់ចៅហ្វាយក្រុង ភរិយាចៅហ្វាយក្រុងអ្នកស្រី Susan និងបងប្អូនប្រុសគាត់ម្នាក់ទៀត សរុបអ្នកស្លាប់ទាំងអស់ ១៦នាក់។

ចំណែកកូនស្រីចៅហ្វាយក្រុងនាង Nova Princess Parojinog ជាអភិបាលក្រុងរង Ozamiz អមជាមួយបងប្អូនប្រុស Reynaldo Jr. ម្នាក់ទៀតត្រូវបានចាប់ខ្លួនបញ្ជូនទៅសាកសួរនៅទីក្រុងម៉ានីល។ អ្នកទាំងពីរត្រូវចោទថា បានរក្សាទុកគ្រឿងញៀន និងអាវុធខុសច្បាប់។

ទោះយ៉ាងនេះក្ដី នាង Nova បានទទូចថា ក្រុមប៉ូលិសបានរៀបគម្រោងធ្វើបាបគ្រួសាររបស់ខ្លួន ព្រោះផ្ទះរបស់នាងមិនដែលរក្សាទុកគ្រឿងញៀនទាំងនេះឡើយ។ នាងចង់សំដៅថា អាវុធ និងគ្រឿងញៀនរកឃើញក្នុងផ្ទះរបស់នាង គឺប៉ូលិសយកទៅដាក់ដើម្បីទម្លាក់កំហុស។

ឯអ្នកគាំទ្រចៅហ្វាយក្រុងបានបង្ហាញសេចក្ដីក្រៀមក្រំចំពោះការសម្លាប់ខាងលើ និងអះអាងថា សមាជិកគ្រួសារចៅហ្វាយក្រុង គឺសុទ្ធតែជាមេដឹកនាំល្អៗ។

មែនទែនទៅ បើគេក្រឡេកទៅមើលកាលឆ្នាំ ២០១៦ លោកប្រធានាធិបតីហ្វីលីពីន រ៉ូឌ្រីហ្គូ ឌូតឺតេ ធ្លាប់បានអានឈ្មោះលោកចៅហ្វាយក្រុង Parojinog និងកូនស្រីរបស់គាត់ថា ស្ថិតក្នុងចំណោមមន្ត្រីហ្វីលីពីនពាក់ព័ន្ធគ្រឿងញៀនមានទាំងចៅហ្វាយក្រុង មេធាវី និងប៉ូលិស អំឡុងពេលកំពុងចាក់ផ្សាយលើកញ្ចក់ទូរទស្សន៍។

យ៉ាងណាក្ដី យើងរង់ចាំមើលការស៊ើបអង្កេតបន្ត តែមេធាវីពួកគេអះអាងថា អ្នកទាំងពីរគួរត្រូវបានដោះលែងឲ្យមានសេរីភាពវិញក្នុងរយៈពេល ៣៦ម៉ោង៕