ឌូតឺតេ ព្រមានថាខ្លួនអាចសាហាវព្រៃផ្សៃជាងភេរវក ៥០ដង
- 2017-04-25 02:36:00
- ចំនួនមតិ 0 | ចំនួនចែករំលែក 0
ឌូតឺតេ ព្រមានថាខ្លួនអាចសាហាវព្រៃផ្សៃជាងភេរវក ៥០ដង
ចន្លោះមិនឃើញ
ប្រធានាធិបតីហ្វីលីពីនលោក រ៉ូឌ្រីហ្គូ ឌូតឺតេ បានព្រមានកាលពីថ្ងៃអាទិត្យកន្លងទៅថា លោកអាចសាហាវព្រៃផ្សៃជាងសកម្មប្រយុទ្ធរដ្ឋឥស្លាម IS ១០ដង ហើយលោកក៏អាចស៊ីពួកជ្រុលនិយមទាំងនោះដែរ បើទាហានរបស់លោកចាប់បានទាំងរស់។
ឌូតឺតេ បានព្រមានសារជាថ្មីចំពោះការសម្លាប់ជនសង្ស័យគ្រឿងញៀន ភេរវក ប៉ុន្តែលើកនេះ គឺជាសារគួរឲ្យរន្ធត់ចិត្តក្នុងនាមជាប្រធានាធិបតីនៅពិធីសម្ពោធការប្រកួតកីឡាជាតិ។
លោកបានបញ្ជាឲ្យទាហានតាមសម្លាប់សកម្មប្រយុទ្ធរដ្ឋឥស្លាមដែលកំពុងរត់គេចខ្លួនក្រោយវាយប្រហារដ៏រជើបរំជួលក្នុងរមណីយដ្ឋានមួយ នៃខេត្ត Bohol កន្លងទៅ ដោយមិនបាច់នាំខ្លួនទាំងរស់ទេព្រោះចាត់ទុកថាពួកគេជា "សត្វ"។
ប្រធានាធិបតីចិត្តខ្លាំងខាងលើបន្តថា "ប្រសិនបើភេរវកនាំខ្លួនមកឲ្យខ្ញុំឃើញចំពេលអារម្មណ៍មិនល្អ សូមឲ្យអំបិល និងទឹកខ្មេះមកខ្ញុំ ខ្ញុំនឹងស៊ីថ្លើមពួកគេឲ្យមើល។" បន្ទាប់ពីមានប្រសាសន៍ចប់ មហាជនផ្ទុះសំណើច តែ ឌូតឺតេ ថ្លែងកាត់ថា "វាជារឿងពិត ប្រសិនបើអ្នកធ្វើឲ្យខ្ញុំខឹងខ្លាំង។"
គួររម្លឹកថា លោក ឌូតឺតេ ធ្លាប់ធ្វើជាចៅហ្វាយក្រុង Davao ជាច្រើនឆ្នាំ និងល្បីឈ្មោះខាងសម្លាប់ឧក្រិដ្ឋជនរាប់មិនអស់ព្រមទទួលការសាទរពីប្រជាជនរស់នៅទីក្រុង។ លោកបានឈ្នះការបោះឆ្នោតក្នុងខែឧសភា ឆ្នាំ ២០១៦ ហើយសន្យាប្រឆាំងដាច់ខាតគ្រឿងញៀន អំពើពុករលួយ និងភេរវកម្ម៕