នាយកសាលារូបនេះ ទម្រាំបានប៉ុណ្ណឹង ត្រូវឆ្លងកាត់ព្យុះធំៗ ៤
- 2017-08-02 04:56:17
- ចំនួនមតិ 0 | ចំនួនចែករំលែក 0
នាយកសាលារូបនេះ ទម្រាំបានប៉ុណ្ណឹង ត្រូវឆ្លងកាត់ព្យុះធំៗ ៤
ចន្លោះមិនឃើញ
សាលាបឋមសិក្សាវត្ដបូព៌ មានទីតាំងស្ថិតនៅចំកណ្ដាលក្រុងសៀមរាប ត្រូវបានចាត់ទុកជាសាលា ដែលមានសណ្ដាប់ធ្នាប់ និងវិន័យល្អជាងគេមួយក្នុងក្របខ័ណ្ឌទូទាំងប្រទេសកម្ពុជា។ ទន្ទឹមនឹងទទួលបានការវាយតម្លៃកម្រិតស្ដង់ដារខ្ពស់ ប្រចាំប្រទេសបែបនេះ លោក ពិន គឹមឆេន នាយកសាលាបឋមសិក្សាវត្តបូព៌ បានឲ្យដឹងថា ទម្រាំតែអាចធ្វើឲ្យសាលាមានដំណើរការល្អប្រសើរ រហូតមកដល់ពេលបច្ចុប្បន្ន លោកត្រូវជួបប្រទះព្យុះធំៗរហូតដល់ទៅ ៤ ឯណោះ។
តាំងពីទទួលតំណែងជានាយកសាលាបឋមសិក្សាវត្ដបូព៌ក្នុងឆ្នាំ ១៩៩៤មក លោក ពិន គឹមឆេន បានធ្វើកំណែទម្រង់ជាច្រើន ជាពិសេសផ្ដោតទៅលើសណ្ដាប់ធ្នាប់ វិន័យ និងចក្ខុវិស័យសំខាន់ៗរបស់សាលាបឋមសិក្សានេះតែម្ដង។ លោកថា ដំណើរការកែទម្រង់ដំបូងពិតជាមានការលំបាកដោយសារតែថ្នាក់លើទាំងខ្សែបណ្ដោយ និងខ្សែទទឹង មិនយល់អំពីចក្ខុវិស័យរបស់សាលា។ ជាមួយគ្នាគ្រូបង្រៀននៅក្រោមបង្គាប់ទាំងអស់ បានបង្ហាញការមិនសប្បាយចិត្ត ចំពោះការរឹតបន្ដឹងវិន័យ ដោយពួកគេយល់ថាប្រាក់ខែគ្រូមានកម្រិតដូចៗគ្នាទេ ចុះហេតុអ្វីចាំបាច់ត្រូវធ្វើឲ្យល្អជាងគេយ៉ាងនេះ។
ចំណែកឯបញ្ហាមួយទៀតនោះគឺ មាតាបិតា និងអាណាព្យាបាលរបស់សិស្ស។ ពួកគេមិនទាន់យល់ និងមិនដែលជួបប្រទះ ចំពោះការរឹតបន្ដឹងវិន័យ សណ្ដាប់ធ្នាប់របស់សិស្ស ដូច្នេះហើយពួកគេបានបញ្ចេញនូវប្រតិកម្មយ៉ាងខ្លាំងនាពេលនោះ។ ប៉ុន្ដែនាពេលបច្ចុប្បន្នមានមាតាបិតាសិស្សតិចណាស់ ដែលប្រតិកម្ម ដោយភាគច្រើន ពួកគេបានបង្ហាញការគាំទ្រចំពោះការរៀបចំរបស់សាលាទៅវិញ។ ចំពោះព្យុះទី៤ គឺលោកជួបនឹងបញ្ហាគ្រួសារផ្ទាល់តែម្ដង ដោយសារតែមានប្រតិកម្មច្រើនពីគ្រូបង្រៀនក្រោមបង្គាប់ផង និងមាតាបិតាសិស្សផង។ អ្នកផ្ទះរបស់លោកមិនសប្បាយចិត្តឡើយ ចំពោះអ្វីដែលលោកបានអនុវត្ត ព្រោះលោកបានចំណាយពេលច្រើនលើការងារ ព្រលឹមចេញពីផ្ទះ ហើយយប់ចូលផ្ទះ តែទទួលបានមកវិញនូវការប្រតិកម្មជាច្រើនទៅវិញនោះ។ នាយកសាលារូបនេះឲ្យដឹងថា ទោះជាត្រូវប្រឹងប្រែងដើរទៅមុខដោយលំបាកក្ដី ក៏ប៉ុន្ដែលោកបានជំនះលើព្យុះធំទាំង ៤នេះរួចរាល់ហើយ។
សាលាបឋមសិក្សាវត្តបូព៌ មានអគារសិក្សាចំនួន ១៤ ខ្នង ស្មើនឹង ៦០ បន្ទប់ រួមជាមួយនឹងគ្រូបង្រៀនសរុបចំនួន ១១៦ នាក់។ ក្នុងឆ្នាំសិក្សា ២០១៦-២០១៧ សាលា មានសិស្សានុសិស្សចូលសិក្សាសរុបចំនួន ៦ ៣៧៦ នាក់ ស្រីចំនួន ៣ ០៧២៕