ញាក់សាច់! ពេលដឹងពីទ្រព្យសម្បតិ្តរបស់សមាជិកក្រុម Girls' Generation

2017-08-02 07:54:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមចម្រៀង Girls' Generation មិនត្រឹមជាក្រុមចម្រៀងដែលមានសម្រស់ស្រស់ស្អាតនិងពូកែប៉ុណ្ណោះទេ សមាជិកក្រុមចម្រៀងនេះនីមួយក៏សុទ្ធតែជាតារាដែលមានទ្រព្យសម្បត្តិច្រើនមិនធម្មតា។

ទោះបីជាមានក្រុមចម្រៀងថ្មីបានចាប់ផ្ដើម Debut ជារៀងរាល់ឆ្នាំ ក៏ក្រុមចម្រៀងនេះនៅតែរក្សាឈ្មោះបានជាក្រុមចម្រៀងលំដាប់កំពូលនៅ K-Pop។ ហេតុដូច្នេះហើយទើបពួកគេគឺជាក្រុមចម្រៀងដែលអាចរកចំណូលបានច្រើនមិនធម្មតា។

តោះ! អីចឹងមកដឹងពីទ្រព្យសម្បត្តិរបស់សមាជិកនីមួយៗទាំងអស់គ្នា!

Yoona

Yoona អាចត្រូវគេចាត់ទុកថាជាសមាជិកដែលមានការងារច្រើនជាងគេបើប្រៀបធៀបទៅនឹងសមាជិកទាំងអស់។ នាងមមាញឹកយ៉ាងខ្លាំងទៅលើការថតរឿងនិងផ្សាយពាណិជ្ជកម្ម។ ជាក់ស្ដែងគិតត្រឹមឆ្នាំ ២០១២ សារព័ត៌មាន TvN enews បានបង្ហើបថា Yoona អាចរកប្រាក់ចំណូលបានដល់ទៅ ៣.៤ប៊ីលានវុនឯណោះ (ជាង៣លានដុល្លារ) ពីសំណាក់ការងារទាំងនោះ។ ហើយដោយសារតែកេរ្តិ៍ឈ្មោះដ៏ល្បីរបស់នាងត្រឹមឆ្នាំ២០១៥ សារព័ត៌មាន Ilgan Sports បានប្រកាសថានាងអាចរកចំណូលបាន ២០លានវុន (ជាង១ម៉ឺន៧ពាន់ដុល្លារ) សម្រាប់ការបង្ហាញខ្លួនក្នុងរឿងភាគម្ដងៗ។ គិតត្រឹមឆ្នាំ ២០១៦ ជាមួយនឹងការសម្ដែងរឿងភាគចិនរបស់នាងទៀត សមាជិកក្រុម SNSD រូបនេះអាចរកចំណូលបានដល់ទៅ ១០ប៊ីលានវុន (ជាង៨លានដុល្លារ)។ ក្រៅពីនោះនាងក៏ប្រើប្រាស់ឡានម៉ាក Volkswagen តម្លៃរាប់លានវុនផងដែរ។

Taeyeon

Taeyeon គឺត្រូវបានគេចាត់ទុកថា ជាតារាមួយរូបដែលអាចរកប្រាក់ចំណូលបានយ៉ាងច្រើនប្រចាំក្រុមចម្រៀង Girls' Generation។ ដោយសារតែទ្រព្យសម្បត្តិយ៉ាងច្រើន តារារូបនេះត្រូវបានគេប្រទះឃើញជិះឡានជាច្រើនស៊េរីដូចជា Porsche, Mercedes Benz Slk 55 AMG និង BMW M4 ជាដើម។ មិនត្រឹមតែប៉ុណ្ណោះកាលពីចូលរួមកម្មវិធី "Strong Heart” Taeyeon បានទិញផ្ទះមួយឲ្យឪពុកម្ដាយខ្លួនដែលមានទីតាំងនៅទីក្រុង Jeonju កាលពីឆ្នាំ២០១២ បើគិតត្រឹមពេលនេះគឺមានតម្លៃរាប់លានវុន។

Seohyun

កាលពីខែឧសភាឆ្នាំ២០១២ Seohyun បានទិញផ្ទះអាផាតមិនទំហំ ២៣៨ម៉ែត្រការ៉េ ដែលមានបន្ទប់គេង៤ បន្ទប់ទឹក២ក្នុងតម្លៃ ១,២៩ប៊ីលានវុន (ជាង១លានដុល្លារ)។ ដោយសារតែការទិញអាផាតមិនមួយនេះ តារារូបនេះត្រូវបានគេចាត់ចូលក្នុងចំណោមតារាដែលមានទ្រព្យសម្បត្តិអចលនទ្រព្យក្នុងតំបន់អ្នកមាន Gangnam របស់ប្រទេសកូរ៉េ។ ក្រៅពីនេះ Seohyun មានរថយន្តចំនួនពីរដែលមាន Kia K5 និង Audi A5 Cabriolet។

Tiffany

ថ្មីៗនេះ Tiffany បានធ្វើឲ្យគេភ្ញាក់ផ្អើលដោយនាងប្រើប្រាស់នាឡិកាម៉ាក Rolex ដែលមានតម្លៃដល់ទៅជាង១ម៉ឺន៦ពាន់ដុល្លារឯណោះ។ មិនត្រឹមតែប៉ុណ្ណោះនាងរស់នៅជាមួយក្រុមគ្រួសារនាងដែលមានទីតាំងនៅ រដ្ឋ Carliforniaសហរដ្ឋអាមេរិកដែលមានទីតាំងធំទូលាយសួនច្បារនិងអាងហែលទឹកដ៏ប្រណិត។ Tiffany ពេលនេះកំពុងជិះរថយន្តម៉ាក Chevrolet Spark និង Luxury convertible។

Yuri

កាលពីឆ្នាំ ២០១២ Yuri បានទិញផ្ទះអាផាតមិនមួយនៅ 9th Sangji Ritzville Building តំបន់ Gangnam ដូច Seohyun ដែរ។ អាផាតមិននោះមានបន្ទប់ដេកចំនួន៤ បន្ទប់ទឹកចំនួន៣ និងបន្ទប់លសំលៀកបំពាក់។ ទីលំនៅនេះមានទំហំ ២០៤ម៉ែត្រការ៉េ និងមានតម្លៃប្រមាណ ១,៧ប៊ីលានវុន(ប្រហែល១,៥លានដុល្លារ)។ មិនត្រឹមតែប៉ុណ្ណោះទីតាំងនេះគឺស្ថិតនៅក្បែរទីលំនៅរបស់ BoA និង Jessica ផងដែរ។ បូករួមនឹងអចលនទ្រព្យ Yuri ជិះរថយន្ត BMW Z4 ដែលមានតម្លៃជាង៥ម៉ឹនដុល្លារ។

Sooyoung

Sooyoung មានដើមកំណើតពីក្រុមគ្រួសារអភិជន។ ជីតារបស់នាងគឺជាម្ចាស់ក្រុមហ៊ុនស្ថាបត្យកម្មដ៏ធំមួយនៅប្រទេសកូរ៉េជាមួយនឹងសមិទ្ធផលល្បីៗជាច្រើន។ Sooyoung ធ្លាប់សម្ញែងផ្ទះរបស់ក្រុមគ្រួសារនាងដែលមានទីតាំងនៅ ក្រុង Gwangju ខេត្ត Gyeonggi។ នៅប្រទេសកូរ៉េមានតែអ្នកមានប៉ុណ្ណោះដែលអាចរស់នៅវិឡាធំៗបែបនេះ។ ដោយមិនគិតពីគ្រួសារនាង ចំពោះទ្រព្យសម្បត្តិដែលនាងអាចរកបានខ្លួនឯង នាងបានទិញវិឡាប្រណិតមួយឈ្មោះ Nonhyeon La Folium ក្នុងតម្លៃ ២,៧៣ប៊ីលានវុនកាលពីឆ្នាំ ២០១៣ ដែលមានទីតាំងនៅតំបន់ Gangnam។

Hyoyeon

Hyoyeon មិនសូវជាមានការងារលក្ខណៈផ្ទាល់ខ្លួនជាច្រើនណាស់ណានោះទេ បើប្រៀបធៀបនឹងសមាជិកដទៃទៀតរបស់ SNSD ប៉ុន្តែនាងនៅតែមានទ្រព្យសម្បត្តិច្រើនមិនធម្មតា។ នាងមានរថយន្តផ្ទាល់ខ្លួន៣គ្រឿងគឺ Range Rover, Audi A4 និង BMW Mini Cooper។ មិនត្រឹមតែប៉ុណ្ណោះនាងក៏ម្ចាស់ Condo ទំហំ ២៩៤ម៉ែត្រការ៉េដែលមានទីតាំងនៅជាន់ទី៦០អាគារ Art Prugio នៅទីក្រុង Songdo-dong តម្លៃប្រមាណ១,២៩ប៊ីលានវុន (ប្រហែល១លានដុល្លារ) ដែលទិញកាលពីឆ្នាំ ២០១០។

Sunny

បើប្រៀបធៀបទៅហ្នឹងសមាជិកផ្សេងទៀត Suuny មើលទៅមិនទម្រើសខ្លួនជាមួយទ្រព្យសម្បត្តិដែលខ្លួនមាននោះទេ ដែលធ្វើឲ្យមនុស្សជាច្រើនកោតសរសើរនាង។ នាងគឺជាក្មួយស្រីរបស់លោក Lee Soo Man ម្ចាស់ផលិតកម្ម SM Entertainment តែម្ដង។ រថយន្តដំបូងរបស់ Sunny គឺBMW ហើយនាងក៏មានរថយន្ត BMW Mini Cooper មួយគ្រឿងទៀតផងដែរ។

Jessica (អតីតសមាជិក)

កាលពីឆ្នាំ ២០១១ Jessica បានទិញអាផាតមិនមួយកន្លែងនៅ Cheongdamdong តំបន់ Gangnam ដែលមានទីធ្លាទំហំ ២៣២ម៉ែត្រការ៉េមានបន្ទប់គេង៣និងបន្ទប់ទឹក៣ ដែលមានតម្លៃ១,២ប៊ីលានវុន (ជាង១លានដុល្លា)។ Jessica មានរថយន្តផ្ទាល់ខ្លួនចំនួនពីរ BMW 320i ព័ណ៌សមួយ និង Range Rover Sport HSE Dynamic។ បន្ទាប់ពីចាកចេញពីក្រុម Jessica បានចាប់ផ្ដើមអាជីពជំនួញរបស់ខ្លួន ដែលរីកធំធាត់ជាច្រើនប្រទេសលើពិភពលោក ដែលធ្វើឲ្យនាងក្លាយជាតារាកូរ៉េម្នាក់ដែលជោគជ័យក្នុងវិស័យជំនួញ៕

ចុចអានអត្ថបទ៖

ប្រភព៖ Kenh14 ប្រែសម្រួល៖ ធារ៉ូ