កំពូលតារាប្រុសសិង្ហបុរី ខំស្វះស្វែងរកថវិកាជួយក្មេងៗនៅកម្ពុជាដល់ម៉្លឹង!

2017-08-04 23:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មានមនុស្សមិនច្រើនទេ ដែលបានដឹងថាតារាសម្ដែងល្បីឈ្មោះម្នាក់របស់ប្រទេសសិង្ហបុរី លោក Thomas Ong បានបរិច្ចាគធនធានផ្ទាល់ខ្លួនសាងសង់សាលាមួយកន្លែងក្នុងប្រទេសកម្ពុជា។

បើតាមវិបសាយសិង្ហបុរី 8days បានឲ្យដឹងថា កាលពី ៥ឆ្នាំមុន តារាប្រុសរបស់ទូរទស្សន៍ក្នុងស្រុក Channel 8 លោក Thomas Ong បានបរិច្ចាគថវិកាទៅដល់សាលារៀន២ ដែលលោកបានសាងសង់ក្នុងប្រទេសកម្ពុជា។ ដោយឡែក មកដល់ពេលបច្ចុប្បន្ន ថវិការបស់តារាវ័យ ៥៨ឆ្នាំរូបនេះក៏កាន់តែអស់បន្តិចម្ដងៗ ហើយលោកក៏កំពុងត្រូវការជំនួយជាច្រើនពីមហាជនដែរ។

Thomas Ong បាននិយាយថា៖ "ពិតជាពិបាកណាស់សម្រាប់ខ្ញុំ ក្នុងការផ្ដល់ថវិកាជួយសាលា តែខ្លួនខ្ញុំម្នាក់ឯង ដើម្បីផ្គត់ផ្គង់ពួកគេ តាំងពីជំនួយត្រឹម ២០០ដុល្លារ ឥឡូវកើនដល់ ១៦០០ដុល្លារ ក្នុង១ខែ"។

លោកបន្តថា៖"ដំបូលសាលាលេច ហើយកុំព្យូទ័រយួរដៃ (Laptop) ដែលខ្ញុំទិញឲ្យក៏ខូចទៀត បញ្ហាមួយទៀតគឺ តម្រូវការសៀវភៅសរសេរក៏ច្រើន ខណៈចំនួនសិស្សចេះតែកើន។ ខ្ញុំត្រូវចំណាយលុយរបស់ខ្ញុំ ហើយណាមួយពេលនេះខ្ញុំក៏មិនមានការងារសម្ដែងអ្វីដែរ ដូចនេះវាជាបញ្ហាមួយដែលខ្ញុំកំពុងខ្វល់”។

តាមព័ត៌មានបានបញ្ជាក់ថា Thomas បានចំណាយលុយប្រហែល ៣០ ០០០ដុល្លាររៀងរាល់ឆ្នាំ ដើម្បីជួយក្មេងៗឲ្យបានបន្តការសិក្សា។ ដោយឡែកថ្មីៗនេះ ដោយសារចង់ឲ្យសាលាឈរជើងបានយូរ លោកក៏បានបង្កើតមូលនិធិសប្បុរសធម៌មួយតាមរយៈគម្រោងថ្មីមួយ។ គម្រោងថ្មីនេះ Thomas នឹងលក់ផលិតផលដែលធ្វើពីស្លឹកគ្រៃក្នុងតម្លៃ ៣៥ដុល្លារ ក្នុង១កញ្ចប់។ រីឯថវិកាដែលបានពីការលក់ លោកនឹងបញ្ចូលក្នុងមូលនិធិសាលា។

បើនិយាយពីគំនិតនៃការលក់ដូរ ផលិតផលទាំងនោះ គឺផុសឡើងក្រោយលោកបានមកទស្សនាប្រទេសកម្ពុជា ហើយបានឃើញចម្ការស្លឹកគ្រៃមួយកន្លែង ដូចនេះបានជាលោកគិតថា ជារឿងល្អបើលក់ផលិតផលទាំងនោះ ហើយយកលុយទៅជួយក្មេងៗក្នុងប្រទេសកម្ពុជា។

តារាសម្ដែងរូបនេះបញ្ជាក់ថា៖ "ប្រសិនគម្រោងមួយនេះបានជោគជ័យ ខ្ញុំនឹងកុម្ម៉ង់ផលិតផលឲ្យបានច្រើន ដើម្បីលក់ ហើយបើវាដំណើរការល្អ ខ្ញុំក៏ចង់ធ្វើកិច្ចការនេះដូចគ្នា សម្រាប់ក្មេងៗក្នុងខេត្ត ឈៀងម៉ៃប្រទេសថៃ។ បំណងរបស់ខ្ញុំ គឺចង់ជួយកុមារៗឲ្យបានច្រើន តាមដែលអាចធ្វើទៅបាន នាពេលអនាគត”។

ទង្វើនេះជាគំរូដ៏ល្អ ក្នុងនាមជាជនល្បីម្នាក់ ប៉ុន្តែតែងយកចិត្តទុកដាក់ដល់ជនក្រីក្រ ជាពិសេសកុមារ ហើយនេះក៏ជាកាយវិការមនុស្សធម៌គួរឲ្យកោតសសើរបំផុត៕