មកដឹងពីបញ្ហាបង់ពន្ធដ៏ស្មុគស្មាញ នៅអេស្ប៉ាញ អ៊ីចឹងតើបានកីឡាករល្បីៗចេះតែគេចវេះ

2017-08-05 10:12:33
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកដែលធ្វើការរកស៊ី នៅប្រទេស អេស្ប៉ាញគ្រប់រូប មានកាតព្វកិច្ចបង់ពន្ធលើប្រាក់ចំណូល។ បើតាមច្បាប់បង់ពន្ធឆ្នាំ២០១៦ ប្រាក់ចំណូលចាប់ពី១២ ៤៥ អឺរ៉ូ ទៅដល់ ៦០០ ០០០ អឺរ៉ូ ត្រូវបង់ពន្ធចាប់ ពី១៩% ទៅ៤៥%។

ដោយឡែករដ្ឋបានកំណត់ "ពន្ធពិសេសសម្រាប់ជនបរទេស ធ្វើការនៅអេស្ប៉ាញ" ដែលធូរប្រមាណពាក់កណ្ដាលបើធៀប នឹងកាបង់ទូទៅ។ ការកំណត់បែបនេះមានគោលបំណង លើកទឹកចិត្តឲ្យអ្នកមានទេពកោសល្យ និង កំពូលកីឡាករជុំវិញពិភពលោក ទៅប្រកបអាជីពនៅប្រទេសនេះ។ ច្បាប់នេះ ជួនកាលគេហៅថា "ច្បាប់ Beckham” (Beckham Law) ព្រោះកាលពីឆ្នាំ២០០៣ ពេលDavid Beckham ទៅលេងឲ្យ Real Madrid គាត់ចំណេញថ្លៃបង់ពន្ធពាក់កណ្ដាល ឬបង់ត្រឹម ២៤% ប៉ុណ្ណោះ។

ច្បាប់លើពន្ធពិសេសនេះ តម្រូវឲ្យបង់ត្រឹម ២៤% ចំពោះចំណូលក្រោម ៦០ ០០ អឺរ៉ូ តែបើលើសពីនេះ នៅតែត្រូវបង់ ៤៥% ដដែល។ លក្ខណៈពិសេសមួយទៀតរបស់ "ច្បាប់ Beckham” គឺ មិនថាចំណូលច្រើនប៉ុណ្ណាក៏ដោយ បង់ពន្ធត្រឹម២៤% ទេ ក្នុងរយៈពេល៥ ឆ្នាំដំបូង ផុតពីនោះ ៤៥%ដដែល។

ជារួម កីឡាករមានតម្លៃខ្លួនកប់ពពកនៅអេស្ប៉ាញ ដូចប្រឹងរកលុយបាន ហើយចែកពាក់កណ្ដាលម្នាក់ជាមួយរដ្ឋាភិបាលអ៊ីចឹង។ ម្ល៉ោះហើយបានជាកំពូលកីឡាករដូចជា Messi, Ronaldo និង Neymar សុទ្ធតែធ្លាប់ត្រូវបានតុលាការកោះហៅរឿងមិនបង់ពន្ធ។

Messi និង ឪពុកត្រូវបានតុលាការចោទពីបទបោកប្រាស់រដ្ឋាភិបាលអេស្ប៉ាញ ដោយគេចវេះមិនព្រមបង់ពន្ធ គិតជាទឹកប្រាក់ប្រមាណ ៤,៦លានដុល្លារ, Ronaldo ត្រូវចោទពីបទស្រដៀងគ្នា ដែលមិនបានបង់ពន្ធ គិតជាទឹកប្រាក់ប្រមាណ ១៤,៧ លានដុល្លារ ខណៈ Neymar ត្រូវបានចោទពីបទប្រព្រឹត្តអំពើពុករលួយពេលផ្ទេរពី Santos មក Barcelona ដូចដែលក្លឹបនិយាយថាគេបានចំណាយប្រាក់ 57 លានអឺរ៉ូ សម្រាប់Neymar កាលពីឆ្នាំ 2013 ប៉ុន្តែតុលាការរកឃើញថាតម្លៃពិតប្រាកដជិត 83 លានអឺរ៉ូតែពួកគេបានលាក់បាំងនូវកិច្ចព្រមព្រៀងនេះ៕

ប្រភព៖ BBC ប្រែសម្រួលៈ សុខ លាងហ៊ត